JOHAN 11 - DAÜLANGPÜ LAIHING (BSI)

Lazar Dipü

¹ Shaang Bethany am Lazar shei menpü shennyak hük tüngteke. Bethany-ü Mary hatü chenaü Martha am ching nyuteke.

² Mary, üpai Shembüpalei la kü vong meipü meli nyiotü pinnyülei sho-i thitpa, pinnyülei chenaü Lazar tüngei nyuteke.

³ Hanangkü nyahinaü nyi-i Jisu kü, “Shembüpa, nüngi bampü themei tüngei nyüke” shei shahjang shom.

⁴ Mechem Jisui ha danpa, büpai, “Hapa dinshani büpa nedipih, shejao hapayü Kahvang müknyinshekhang shingvaishi nyüke, shejüang hapa homei Kahvang Ha müknyinshekhanghen” shei e.

⁵ Jisui Martha, chenya hatü Lazar kü bamjao,

⁶ Lazar tüngpü danpheikü büpa nyupü shingei shao nyih nyi nyeishi themdai.

⁷ Hapheikü büpai nanglomthü kü, “Jenphong shao Judealei heihshah” shei e.

⁸ Nanglomthüi büpa kü, “Nyuhbü, Jehoda ami nüng kü yaongi shükhen kheteijü nüng shao halei heihhen je?” shei e.

⁹ Jisui jangei, “Nyih kü ghonda anpünyi nenyupü je? Üami nyihnüng kam, jomi huluh neshuohnyih; mehenangkü jomi kahdoknyü vangngai eenyüpeih.

¹⁰ Shejao üam shangmang kü kam, huluh shuohnyüpeih; mehenangkü jom kü vangngai neshiü” shei e.

¹¹ Ha epheikü shao büpai jomphong kü, “Jenei küphü Lazar shidaiteke, shejao ngei büpa phuknüng halei dainyeih” shei e.

¹² Nanglomthüi büpa kü, “Shembüpa, büpa shidaipü vaijema, büpayü meheyao nevaipih” shei e.

¹³ Shejao Jisui büpa didaipü jung eteke, shejao jomi büpa heiüng shipü jung epeih shei deih.

¹⁴ Hahepak kü Jisui jomphong kü ngaiheyei, “Lazar didaiteke.

¹⁵ Ammei men kü ngei büpa mü nenyupü kü mongongnyeih, shejüang ammi hinglemhen. Shejao jenphong büpa yemei daishah” shei e.

¹⁶ Thomas, üpa kü Didymus shei nyük, büpai küphü nanglomthü kü, “Büpa mü dihen jenao daishah” shei e.

Jisu-ü Yangei Leipü hatü Yangnyuyem

¹⁷ Mechem Jisu ngoijapa, Lazar diyei mahngchongei nyih alipabü nyuteke.

¹⁸ Shaang Bethany-ü Jerusalem yopailei mile nyi hükshing daiyei nyu,

¹⁹ hatü Jehoda am longi Martha hatü Mary nyi kü chenaü didaipü nangkü jom mong nyiumeihühen thaiyei nyu.

²⁰ Mechem Martha-i Jisu peikünyüke shei danpa, Mary shemei tuhphongtü pinnyüi Jisu ombaong heih.

²¹ Martha-i Jisu kü, “Shembüpa, nüng hatouei nyulangmeyü ngelei naüpeü nedihah shepeih.

²² Shejao shaang vaijao nüngi mehe yühenshang Kahvangi yahphahen shei ngei nyingnyeih” shei e.

²³ Jisui pinnyü kü, “Anaü shao yangei leikahen hih” shei e.

²⁴ Martha-i büpa kü, “Dohpü nyih yangei leipü hepak kü büpaao yangei leikahen” shei e.

²⁵ Jisui pinnyü kü, “Ngeiyü yangei leipü hatü yangnyuyem. Üpai ngei kü hinglem, jom dijao yemmü nyuhen,

²⁶ hatü üami yemmü nyuei ngei kü hinglemhen mechemao nedihen. Nüngi ha kü hinglemnyüla?” shei e.

²⁷ Pinnyüi büpa kü, “Hih, Shembüpa, nüngü Messiah, kahdoknyülei peipü Kahvang Ha” shei e.

Jisui Thep

²⁸ Mechem pinnyüi ha eyei kempa, pinnyü nyokei leiyei chenaü Mary kü nyüktü pinnyü kü joei, “Nyuhbü hatouei nyüke hatü nüng kü nyüknyüke” shei e.

²⁹ Mechem pinnyüi ha danpa, pinnyü met shei yaongei büpa touei heih.

³⁰ Shaang Jisu-ü ching mangngoi-i Martha-i büpa pongpü shingei nyu.

³¹ Jehoda am pinnyü mü shemei mong nyiushemmei shah eyei nyupüthüi Mary shülangi yaongei vamdaipü eeteke. Jomi pinnyü phei mü; mehenangkü pinnyü mahngchongei mahngthep heihnyu khih shei jomi deih.

³² Mechem Jisu nyupü shingei Mary ngoiyei büpa eepa, pinnyüi büpalei la tüngei aümei shatü, “Shembüpa, nüng hatouei nyulangmeyü naüpeü nedihah shepeih” shei e.

³³ Mechem Jisui pinnyü theppü hatü pinnyü mü peipü Jehoda ami theppü eepa, büpalei mong kü hong, hatü thephüei pei.

³⁴ Büpai, “Ammi büpa melei vüpa?” shei phe. Jomi büpa kü, “Shembüpa, peiyei veituh” shei e.

³⁵ Jisui thep.

³⁶ Hanangkü Jehoda ami, “Veituh, büpai büpa kü meshük bampüang!” shei e.

³⁷ Shejao jomphong hanei-i, “Mükphüngdaipü shennyakei mük aphüpü shennyaki hapa shennyak nedihüi netuh-aokpü je?” shei e.

Jisui Lazar Yangei Leishihpü

³⁸ Hapheikü shao Jisu thephüei deih, hatü mahngchongei heih. Hapayü yaongsha hük nyu, hatü ha kü yaong hük küpshi nyu.

³⁹ Jisui, “Ha yaong yahlangtuh” shei e. Dipü shennyakei chenya Martha-i büpa kü, “Shembüpa, büpa dipheikü nyih alipabü hih; hanangkü shie longi büdaitih” shei e.

⁴⁰ Jisui pinnyü kü, “Nüngi hinglemjema Kahvang müknyinshekhang eehen shei ngei nüng kü ne-eangpü je?” shei e.

⁴¹ Hanangkü jomi yaong ngowtük, hatü Jisui shang lemei ngangei veitü, “Opa, nüngi ngei kü bangpü nangkü menvih shuohnyeih.

⁴² Nüngi düngei ngei kü bangnyeih shei ngei nying, shejao ngei hayü hatouei yaongpü khong men kü enyeih, shejüang nüngi ngei shompü khih shei jomi nyinghen” shei e.

⁴³ Büpai ha epheikü büpai ngeü longpai lenei, “Lazar vamkei!” shei e.

⁴⁴ Dipü shennyak lakhila kü, hatü dhe kü ashaki ngeihtüktü vam. Jisui jomphong kü, “Büpa kü ha sheyeishuoh hatü büpa leishihtuh” shei e.

Jisu Jühen Phaüshah Showpü

⁴⁵ Hanangkü Mary mü peipü Jehoda ami Jisui mehe dük, ha ee, hatü büpa kü hinglem.

⁴⁶ Shejao jom hanei Phariseethü touei peiyei Jisui mehe dük, ha eshuohteke.

⁴⁷ Hanangkü ngongpathü hatü Phariseethüi shahtapei shahthai hük thongei, “Jeni mehe dükhenang? Hapa shennyaki nyangeihepü longi düknyüke.

⁴⁸ Jeni büpa hei-üng tuhjema peüi büpa kü hinglemdaihen khih, hatü Rom am peiyei jenei phopshem hatü kahmük nyiphen mangtükhen khih” shei e.

⁴⁹ Shejao jomphong khongkü hapa bong ngongchong vaipü Kaiaphas-i jomphong kü, “Amphongü meheyao nenyingnyu khih!

⁵⁰ Kahmük hük peü mangtüklei meyü nanglak peü shingvaishi shennyak hük dipü-üng meipeih shei ammi nenyingnyu khih” shei e.

⁵¹ Büpai hayü büpalei mongdeih epü nevai, shejao hapa bong ngongchong vaipü nangkü Jisu-ü jat hük shingvaishi dihen,

⁵² hatü jat hük shing mon nevai shejao haidaipü Kahvang hathü thaiyei leihen jung teteivanei eteke.

⁵³ Hanangkü ha nyih mü leitü büpa jühen küpjan tem.

⁵⁴ Hanangkü Jisu hajük kü ngaiheyei Jehoda am mü nekamtei, shejao hatoueipü jahpan yopailei hapa moidoi kü jila hük Ephraim shei epülei daiyei büpa halei büpalei nanglomthü mü nyu.

⁵⁵ Shaang Jehoda amei Hompü Mo yopailei nyu, hatü kahmük kübü longi Hompü Mo shekü laophü laophüi daütükhen shingvaishi Jerusalemei pei.

⁵⁶ Jomi Jisu yemei phopshemei yaongtü hüki hük mü, “Nüngi mekei deih-angke? Hingmei büpa mo kü nepeikahen hiang yo?” shei etei.

⁵⁷ Shaang ngongpathü hatü Phariseethüi Jisu yephen shingvaishi büpa melei nyu nyingpüthüi jomphong kü shah shuohhen ngeükhüam shuohtüktü nyu.