JOHAN 10 - DAÜLANGPÜ LAIHING (BSI)

Jisu Mi Yombü Meipü

¹ “Hingmei mü ngei am kü enyeih, üpai mi khaok shaden homei neshüi lebü lemei bakei shünya, büpayü gühpa hatü peileipa.

² Üpa shaden homei shünya, büpayü mithü yombü.

³ Shaden yombüi büpa kü mi khaok sha apnyüke, hatü mithüi büpalei ngeü dannyüke. Büpai laophülei mithü kü men homei nyüknyeih, hatü müei dainyüke.

⁴ Mechem büpai laophülei mithü khaok leipü ngaihenshang, büpa jom shekü dainyeih, hatü mithü büpa phei münyüke; mehenangkü hathüi büpalei ngeü nyingnyüke.

⁵ Mithüi yenthüng phei nemühen shejao jomphong büpa toueipü nyaidaihen; mehenangkü jomi büpalei ngeü nenying.”

⁶ Jisui jomphong kü hapa e, shejao büpai mehe enya jomi ha nenying.

⁷ Hanangkü shao Jisui jomphong kü, “Hingmei ngei am kü enyeih, ngeiyü mi khaok shaden.

⁸ Ngei shekü peipüthü peü gühpa hatü peileipa, hatü mithüi jomphong kü nebangnyu.

⁹ Ngeiyü shem shaden. Üami ngei homei shühen yanghen, hatü daitü lei, daitü lei shei nyuhen hatü hahying danghen.

¹⁰ Gühpayü gühhen, jühen hatü mangtükhen nangkü mon peinyeih. Ngeiyü jomphong yangnyuyem nyuhen, hatü changshi nyuhen shingvaishi yiüpeih” shei e.

¹¹ Ngeiyü mi yombü meipü. Mi yombü meipai mithü shingvaishi laophülei yangnyu lanei shuohnyeih.

¹² Üpa mi yombü nevai, shejao lathahbü mon hatü laophülei mi nenyu, büpai shahhishuw peipü eeyei mithü mon tuhphongtü mokdainyeih, hatü shahhishuw peiyei jom shüknyüke hatü yantüknyüke.

¹³ Lathahbü mokdainyüke, mehenangkü lathahbüi mi kü nejungnyu.

¹⁴ Ngeiyü mi yombü meipü. Ngei ngelei mithü nying hatü ngelei mithüi ngei nying.

¹⁵ Opai ngei nyingpü keiha ngei Opa nyingnyeih, hatü ngei ngelei yangnyu mithü shingvaishi lanei shuohnyeih.

¹⁶ Hapa mi khaok kü nepaümpü lebü mithü nyüpeih. Ngei jomphong müei leihen hatü hathüi ngelei ngeü banghen. Hanangkü mi khong hük hatü mi yombü hük mon nyuhen.

¹⁷ Mehenangkü ha tata kü Opai ngei kü bamnyeih, mehenangkü nyipabü anlanghen shingvaishi ngei ngelei yangnyu lanei shuohnyeih.

¹⁸ Üpaiyao ngelei yangnyu ngei kübü neyahlang, shejao ngei ha ngei nyingi mongei shuohnyeih. Lanei shuohhen hatü nyipabü yahlanghen ngei kü wong nyüpeih. Hapa shahkung ngei Opa leipü dangpeih.

¹⁹ Hathü shah nangkü Jehoda am shao khong hanteke.

²⁰ Longshi shingi, “Büpa kü kahshih nyüke hatü ngadainyu khih. Mehekei büpai epü bangnya?” shei e.

²¹ Lebüthüi, “Hapayü kahshih nyupülei shahthü nevaipih. Kahshih-i mükphüngpalei mük apaokhen je?” shei e.

Jisu Neyahpü

²² Hapa hepak kü Jerusalem phopshem Daüpü Mo ngoi. Hayü ünyü hepak,

²³ hatü Jisu phopshemei Solomonei shemshomei kamteiyei nyu.

²⁴ Hanangkü Jehoda am büpa shonei thaitü büpa kü, “Nüngi meshük lushi hamphong hapakei küpshi tuhhen? Nüng Messiah vaijema ngaiheyei ham kü eshih” shei e.

²⁵ Jisui jomphong kü, “Ngei am kü etepih shejao ammi hingnelem. Opalei men kü ngei dükpü douthü ngei jung denpü shuohnyüke;

²⁶ shejao ammi hingnelem; mehenangkü amphongü ngelei mithü nevai.

²⁷ Ngelei mithüi ngelei ngeü dannyeih, ngei jom nyingnyeih, hatü hathü ngei phei münyeih.

²⁸ Ngei jom kü vanyangyem shuohnyeih, hatü jom mechemao nemahhen. Ngelei lak leipü üpaiyao jom aetei nedaiaokpih.

²⁹ Mehe ngelei Opai ngei kü shuohtepa, hayü peü mü longpüba; Opalei lak leipü üpaiyao aetei dainüng neaok” shei e.

³⁰ Opa hatü ngeiyü hük.

³¹ Jehoda ami shao büpa kü shükhen yaong homei noteke.

³² Jisui, “Ngei am kü Opa leipü doumei longi hutepih. Ha tata kü ammi ngei kü yaongi shüknüng yaongnyu je?” shei e.

³³ Jehoda ami, “Hami doumei nangkü nüng kü yaongi shüknüng yaongnyu nevaipih, shejao Kahvang khüei eelapü nangkü hih; mehenangkü nüngü shennyak hük mon tuhtü Kahvang hih shei epü nangkü hih” shei e.

³⁴ Jisui, “Kahvangi, ‘Amphongü kahvangthü’ shei ammei Shahkungthü kü nyangei nenyupü je?

³⁵ Üam touei Kahvangei shah pei, hathü kü ‘Kahvangthü’ shei nyükjema laihing shah mangtüknüng neaok–

³⁶ ‘Ngeiyü Kahvang Ha’ shei epü nangkü Opai daütüktü kahdoknyülei shompü hüki thaüvaüei enyüke shei ammi eaokhen je?

³⁷ Ngei Opalei dou nedükpü vaijema ngei kü hingtelem.

³⁸ Shejao ngei hathü dükjema, ammi ngei kü hingnelemjao dou kü hinglemtuh, shejüang Pa ngei kü nyüke, hatü ngei Pa kü nyüke shei ammi nyinghen hatü danaokhen” shei e.

³⁹ Hahepak kü shao jomi büpa yepnüng khe, shejao jomei lak kübü büpa yangdai.

⁴⁰ Büpa Jordan yung homei shelei Johani baptükpü shingei daiyei büpa halei nyu.

⁴¹ Büpa touei shennyakthü longi pei, hatü jomi, “Johani meheyao nyangeihepü nedük, shejao hapa shennyak jung Johani epü lemphüli jiüteke” shei e.

⁴² Halei shennyak longi büpa kü hinglem.