JOHAN 1 - DAÜLANGPÜ LAIHING (BSI)

Shah-i Phai Leipü

¹ Chongpangpülei Shah nyu, hatü Shah Kahvang mü nyu, hatü Shah-ü Kahvang nyuteke.

² Büpayü chongpangpülei Kahvang mü nyu.

³ Douthü peü büpa homei vam; lingei nyupü douthü peü büpa ne-omi hükao neling.

⁴ Büpa kü yangnyuyem nyu, hatü ha yangnyu-ü hangkuli peüei vangngai nyuteke.

⁵ Hapa vangngai-i shangmang kü khang, hatü shangmangi ha nemettükaok.

⁶ Kahvang leipü shompü shennyak hük Johan shei mentü nyu.

⁷ Peüi büpa homei hinglemhen shingvaishi büpai hapa vangngai nang denpü shuohhen denbü hük vaishi pei.

⁸ Büpayü hapa vangngai nevai, shejao büpai hapa vangngai nang denpü shuohhen pei.

⁹ Peü kü vangngai shuohpü hapa hingshangpü vangngai kahdoknyülei pei.

¹⁰ Büpa kahdoknyülei nyu, hatü kahdoknyü-ü büpa homei ling, shejao kahdoknyüi büpa nenying.

¹¹ Büpa laophülei nanglak touei pei, shejao laophülei nanglaki büpa neyah.

¹² Shejao üami büpa yah, büpalei men kü hinglem, büpai hathü peü kü Kahvang hathü leihen ngan shuohteke.

¹³ Jomphongü iy nevaijü phai-i mongpü nevaijü hangku-i mongpü kü bühpü nevai, shejao Kahvangi bühpüthü.

¹⁴ Hapa Shah phai lei hatü jen mü nyu, hatü jeni büpalei müknyinshekhang, Pa leipü Halomei müknyinshekhang keiha phahji hatü shahhingi maei eeteke.

¹⁵ Johani büpa nang denpü shuoh. Büpai lenei, “Ngei üpa nang e, hayü büpa hih. ‘Ngei pheikü üpa peikünya, büpayü ngei mü longpüba; mehenangkü büpayü ngei shekü nyuhampeih.

¹⁶ Büpalei phahji mapü kübü jen peü moihiman hük pheikü hük dangteke.

¹⁷ Mehenangkü shahkungü Mosa homei shuoh, shejao phahji hatü shahhingü Jisu Khrista homei peipeih.

¹⁸ Üpaiyao Kahvang ne-ee, shejao hapayü Kahvang Halom Ha, üpa Pa philei nyu, büpai büpa nyinghüteke.’ ”

Johan Baptükbüi Denpü Shuohpü

¹⁹ Hapayü Jehoda ami Jerusalem leipü ngongpathü hatü Levi ami büpa kü, “Nüng üpaang?” shei phenüng shomshingkü Johani shuohpü denpü nyüke.

²⁰ Büpai nelahpih shei ne-e, shejao ngaiheyei, “Ngeiyü Messiah nevaipih” shei lahteke.

²¹ Jomi büpa kü, “Shejema nüng üpaang? Nüngü Elijah je?” shei phe. Büpai, “Nevaipih” shei e. Nüngü thibü je? Büpai, “Nevaipih” shei jang.

²² Jomi büpa kü, “Nüng üpaang? Hamphong shompüthü kü ejahen shahnyok yahshih. Nüngi nüng nang mehe enya?” shei phe.

²³ Büpai jangei Isaiah thibüi epükei, “Ngeiyü Shembüpalei lem kangshangi temtuh shei jahpanei lenpü ngeü hük hih” shei eteke.

²⁴ Shaang jomphongü Pharisee khong kübü shomteke.

²⁵ Jomi büpa kü, “Shejema nüngü Messiah-ao nevai, Elijah-ao nevai, nevaijü thibü hükao nevaivai-i mehekei baptüknya?” shei phe.

²⁶ Johani jomphong kü, “Ngei yungi baptüknyeih. Am khongkü ammi nenyingi hük yaongshi nyüke,

²⁷ ngei pheikü üpa peikünya, ngei büpalei lathuhvü dangkao laihen neshangangpih” shei e.

²⁸ Hapayü Bethany kahdokei Johani baptükei nyupü Jordan yungdang philei vamteke.

Kahvang Mi Cheha

²⁹ Nyihphei Jisu büpa philei heihja-i eeyei büpai, “Kahdoknyü mang koei lüdaipü Kahvang Mi Cheha kü veituh” shei e.

³⁰ “Ngei pheikü shennyak hük peikünyüke, büpa ngei mü longpüba; mehenangkü büpa ngei shekü nyuhampeih” shei ngei ehampeyü büpa hih.

³¹ Ngeiyao büpa nenyingham, shejao büpa Israel am kü shakei vamhühen tata kü ngei yungi baptükei peipeih.

³² Johani, “Ngei vangsho leipü Laangha athuba kei yiüei büpa kü bakpü eepeih” shei denpü shuoh.

³³ Ngeiyao büpa nenyingham, shejao üpai ngei yungi baptükhen shom, büpai ngei kü, “Üpa kü nüngi Laangha yiüei bakei ee, büpai Laangha Daülangpai baptükphahen shei ephopeih,

³⁴ hatü ngei nyingiyao eeteke, hatü hapayü Kahvang Ha shei denpü shuohnyeih” shei eteke.

Shongpü Jisulei Nanglomthü

³⁵ Shao nyihphei Johani büpalei nanglom nyi mü yaongshi nyu,

³⁶ hatü büpai Jisu kamei daijapü eeyei büpai, “Kahvang Mi Cheha kü veituh!” shei e.

³⁷ Mechem büpai ha epü nanglom nyi-i danpa, jijinyi-i Jisu phei mü.

³⁸ Yaakei veishingkü Jisui jiji müjapü eeyei, “Anji mehe napa?” shei phe. Jijinyi-i, “Rabbi, lappai, ‘Nyuhbü’ nüng melei nyunya?” shei phe.

³⁹ Büpai, “Peiyei veituh” shei e. Hanangkü jiji daiyei büpa nyupü shing ee, hatü ha nyih büpa mü themteke. Hapayü an baji yangkü nyuteke.

⁴⁰ Johani epü danei Jisu phei müpü nyi khongkü hükü Simon Peterlei chenaü Andrew nyu.

⁴¹ Büpai shongei chejei Simon pongei büpa kü, “Hamphongi Messiah, (lappai, Khrista) pongpeih” shei e.

⁴² Büpai Jisu touei büpa müei dei. Jisui büpa kü veitü, “Nüngü Johanei cheha Simon. Nüng kü Cephas, (lappai, Peter) shei nyükhen” shei eteke.

Jisui Philip hatü Nathanael Nyi Nyükpü

⁴³ Nyihphei Jisui Galilei heihhen tem. Büpai Philip heüei, “Ngei phei mükei” shei e.

⁴⁴ Shaang Philipü Andrew hatü Peter am ching Bethsaida leipü nyuteke.

⁴⁵ Philipi Nathanael pongei büpa kü, “Hamphongi Nazareth am Josephei cheha, üpa jung Mosai shahkungnyüthü kü hatü thibüthüi eyei nyu ha pongtepih” shei e.

⁴⁶ “Nazareth leipao lemhük mei vamaokhen je?” shei Nathanaeli phe. Philipi, “Peiyei veituh” shei e.

⁴⁷ Mechem Jisui Nathanael ngoijapü eepa, “Meheyao shahshem neshiüpü hingshangpü Israel am hatouei nyüke” shei büpai büpa nang e.

⁴⁸ Nathanaeli, “Nüngi ngei mekei nyingpa?” shei phe. “Philipi nüng kü nyükshekü ngei nüng adhapü phangei uoshi eetepih” shei Jisui jangei e.

⁴⁹ Nathanaeli jangei, “Nyuhbü, nüngü Kahvang Ha khih! Nüngü Israel amei Ongpa khih!” shei e.

⁵⁰ Jisui, “Ngei nüng adhapü phangei uoshi eepeih shei ephopü nangkü nüngi ngei kü hinglemnyu je? Nüngi hathü mao longpü douthü eehen hih” shei e.

⁵¹ Shao büpai büpa kü, “Hingmei mü ngei nüng kü enyeih, nüngi vangsho shaden aptüktü Shennyak Ha shak kü vangsho phongshanthü aongpü leipü eehen hih” shei eteke.