JOEL 3 - DAÜLANGPÜ LAIHING (BSI)

Kahvangi Jatthülei Shahphenhen

¹ Shembüpai enyüke: Hathü nyih kü hatü hapa hepak kü ngei Judah hatü Jerusalem kü nükhah nyiamhaümhen nyokei shuohhen.

² Ngei jatthü peü thaihen, hatü Shahphenpü Kahjilei müei deihen. Halei jomi ngelei nanglakthü khüei lemphü nemeipü dükpü nangkü ngei jom kü shahphenhen; Mehenangkü jomi ngelei nanglakthü jatthü touei haitükpeih, hatü ngelei kahdok hantükpeih.

³ Jomi ngelei nanglakthü yahhen phongyomteke, hatü bahanaüthü büm yuhen nangkü yutük. Jomi yiü yinghen tata kü nyühanaüthü yutükteke.

⁴ Oh Tyre, Sidon hatü Philistia moidoi kü nyupüthü! Ammi ngei khüei mehe dükhen khenyüpa? Ngei lemhük dükphopü ha kü shemhen khenyu je? Ammi ngei kü ha shemphüjema, ngeiyao shülangi am kü nyokei shemphahen.

⁵ Mehenangkü ammi ngelei hon hi ngin hatü ngelei mopnyümopha ammei khümshemei deilangpeih.

⁶ Ammi Judah hatü Jerusalem nanglakthü jomei nyübüh kahdok leipü tailuei nyemlüdai shei Greek am kü yutükpeih.

⁷ Shaang ngei ammi yutükpü shingthü leipü jom thaiyei leihen; ammi mehe jom kü dükpa, ha am kü ngei shemhen.

⁸ Ngei ammei hapeüthü Judah am kü yutükhen, hatü jomi shao tailu leipü Sabea am kü yutükhen shei ngei, Shembüpai enyüpeih.

⁹ Jatthü kü hapa baongeishuoh: Vehok hokhen temtuh! Hampathü thongei nyüktuh! Ammei veshanthü thaituh, hatü thepju kü daituh!

¹⁰ Hanshong kübü nyiami yanlu, hatü thüng jappü ajapi phung shüktuh; wong nekohpüthüiyao hoktuh.

¹¹ Lomi peikei, am ngeihpü shonpü jatthü peü, hatü halei thaituh. Oh Shembüpa, nüngei veshanthü jom mü hokhenshomshih!

¹² Jatthü peü temtuh, Shahphenpü Kahjilei peikemtuh. Halei ngei Shembüpai, ngeihpü shonpü jatthü kü shahphenhen uohen.

¹³ Jom ahshi-üng nemeiang; hanangkü hahvet longkhoih-i hah vetpükei vettüktuh; Yiü mangyen thahshi nyalingngupai kü ngümpükei jom ngümtüktuh.

¹⁴ Haja dok kü haja Baong Hanpü Kahjilei nyüke! Baong Hanpü Kahjilei Shembüpalei nyih yopailei nyüke.

¹⁵ Lennyü vanghe yimdaihen, hatü hajük kü lithathü nenyahen.

Kahvangi Laophülei Nanglakthü Moihimanhen

¹⁶ Shembüpai Zion Kahshang leipü ngüngnyüke, hatü Jerusalem leipü lennyüke; kahdok vangsho kheünyüke. Shejao Shembüpayü laophülei nanglak loishing, hatü Israel nanglakthü sho joshing vaihen.

¹⁷ Hanangkü ngeiyü Shembüpa, ammei Kahvang, Zion, ngelei daülangpü kahshangei nyunyeih shei ammi nyinghen, hatü Jerusalemü daülangpü shing vaihen, hatü kong ami hajük kü ha ching nehahhen.

¹⁸ “Hapa nyih kü kahshangthüi yiü ja yenphahen, hatü shangtaothü kü amma yenkahen; Judah leipü shohinga peü kü yung changshi yenkahen. Shembüpalei phopshem kübü yunglok hük yenei shaei Akacia Kahji kü yung shuohhen.

¹⁹ Shejao Ijipü shingkong leihen, Edomü bhih kahdok leidaihen; Mehenangkü jomi Judah kahdok hahteke, hatü mang neshiüpü nanglakthü jüteke.

²⁰ Shejao Judah denden kü chingchingei nyuhen, Jerusalem kü hüdenhalenshi nyuhen.

²¹ Jomei iy yenpü bhüh ngei yemhen, hatü ngei nejiüpü am neyanghen; Mehenangkü Shembüpa ngei, Zionlei nyunyüpeih.”