JOB SHAHSHA APPÜ 3 - DAÜLANGPÜ LAIHING (BSI)

Jobi Büpa Bühpü Nyih kü Thaüvaüpü

¹ Hapheikü Jobi büpalei ju kaei büpa bühpü nyih kü thaüvaüteke.

² Büpai e,

³ Ngei bühpü nyih hatü “Yeshang hük bühteke!” shei epü ya mahtüktuh.

⁴ “Hapa nyih-ü vangnyak leitüktuh! Shang Kahvangi ha kü tejung; hapa kü vangngai tekhanghü.

⁵ Shangmangi hatü vangdhüm longpai ha jümlangtuh; phumnyaki ha kü jümtuh; vangnyaki hapalei vanghenyü banglangtuh.

⁶ Hapayü vangnyak chülohpai shümlangtuh; vangbong kübü nyihthü kü ha omei te-it, nevaijü mepa len kao omei te-it.

⁷ Hapayü nyülan kei tuhphongtuh; ha ya mongongmonglepü ngeü tedanhü.

⁸ Üami nyihthü kü thaüvaünya, üami Leviathan phuknya, jomi ha nyih kü thaüvaütuh.

⁹ Hapalei nepnüng litha vangnyak leitüktuh; angsha kü vangngai vamkahen shei monglemeidanhütuh; hapai nepnüng vangngai vampü te-eehü,

¹⁰ mehenangkü hapai onyülei naü uoshing neküptük, nevaijü ngelei mük kübü shanghah nejolang.

¹¹ Mehekei bühshingkü ngei nedidaipa, nevaijü naü uoshing kübü vamshingkü nedidaipa?

¹² Mehekei shüngdok shangkü ngei paümei yahpa, hatü ngei kü amma yingpa?

¹³ Mehenangkü shaang keiyü ngei chingmei kü lemshi nyuhen; nyiushemmei kü ngei shishi,

¹⁴ kahdoknyü kü ongpathü hatü vanglem lempüthü üami laophü shingvaishi ongshemthü ling, jom mü,

¹⁵ nevaijü hon angpü ongpathü, shem maei ngin angpüthü mü nyuhen vaipeih.

¹⁶ Nevaijü mehekei hepak mangngoi-i angpü naü keiha, nevaijü vangngai mang-eepü aküngnaüha kei ngei nejophongpa?

¹⁷ Haleipü nemeipüthü-ao douten dükpü kübü dohdainyüke, hatü halei nyupüthüao nyiumei dangnyüke.

¹⁸ Haleipü khoklat kü nyupüthüao jomi mongpükei nyunyüke; jomi halei dou hienbülei ngeü-ao nedannyu.

¹⁹ Halei longpü maanpü peü nyüke, hatü aathüao laophülei shembü leipü bümei leiyei nyüke.

²⁰ Mehekei shangpong kü nyupü am kü, hatü laangha kü shahyaki nyupüthü kü vangngai shuohnya?

²¹ Üami didaihüei ongyangnya, nevaijü jopü mop yempükei mahngsha shopü am kü,

²² mahngchong ngoishingkü nyeinya mongongpüthü kü hapa dihen mehekei nepeihünya?

²³ Lem nedangi nyupü shennyak kü, hatü Kahvangi pe showlangtü nyupü am kü mehekei vangngai shuohnya?

²⁴ Mehenangkü hahying nangjei thephen peikünyüke, ngei youngpünangpü yung keiha bhuei vamkünyüke.

²⁵ Ngei nyembenüng ngei kü vamküteke, ngei hanei nyupü lemphü ngei kü hetküteke.

²⁶ Ngei chingmei neshiü, nyiumei neshiü, nenmü nenyuaok, shejao shanghah mon nyüke.”