JOB SHAHSHA APPÜ 2 - DAÜLANGPÜ LAIHING (BSI)

Job kü Nyipabü Dokpü

¹ Nyih hük vangsho phongshanthü Shembüpa mü pongteinüng pei, hatü Satanao jomphong mü Shembüpa touei pei.

² Shembüpai Satan kü, “Nüng meleipü peiküpa?” shei phe. Satani Shembüpa kü, “Kahdoknyü kü shüaong shülei longteiyei nyupü kübü peiküpeih” shei e.

³ Shembüpai Satan kü, “Nüngi ngei chongphopü Job kü mük shahnyu je? Kahdoknyü kü büpa kei eelashing neshiüpü, kangshangpü shennyak, Kahvang nyempü hatü mang nedükhen kenhingpü neshiüpih. Meheyao nevaipü kü büpa lomohhühen büpa khüei nüngi ngei kü nyeanphülangmao shaang thahshi büpai ngei kü hinglempü lakshing nyüpeih” shei e.

⁴ Satani jangei, “Shuw nangjei shuw” shei e. “Shennyak hüki laophülei yangnyu nangjei büpai angpü lemphüli shuohhen.

⁵ Shejao nüngei lak noei büpalei phai hatü vang kü hongshuohjü büpai nüngei dhe kü nyeanshi thaüvaüphahen hih” shei e.

⁶ Shembüpai Satan kü, “Meiteke, büpa nüngei lak kü yahphünyeih; shejao nüngi büpalei yangnyu mon yangei tuhtuh” shei e.

⁷ Hanangkü Satan Shembüpa toueipü daiyei Job kü shangnyüshang kübü lajaang laishi büm lüpei ngühma vamhü.

⁸ Hanangkü Jobi depla shangkü uotü dükbhaok noshi ma kü ngühteke.

⁹ Hahepak kü chenyühai büpa kü, “Nüng shaang thahshi Kahvang kü lakshing hinglemnyu je? Kahvang kü thaüvaütuh hatü didaituh” shei e.

¹⁰ Shejao büpai pinnyü kü, “Nüngü nganyüi epükei ekünyüke. Jeni Kahvang leipü mei mon yahtü nemeipü neyahhen je?” shei e. Hathü peü pongjao Jobi büpalei jui mang nethah.

Jobei Küphüthü Jom Jem

¹¹ Mechem Jobei küphüthü jom jemi Job ponghahpü jung danpa, jom peü laophülei lem kübü layaongei pei. Jomphongü Teman am Eliphaz, Shuh am Bildad hatü Naamah am Zophar nyuteke. Jom chemi peiyei büpa kü nyiushemmei shah eshuohhen temteiteke.

¹² Mechem jomi tailei büpa eepa, jomi büpa khih shei nenyingaok; mechem büpa khih shei nyingpa, jomi wongmü thep, jomei ashakviha shaaktük, hatü shangjing kü depla nyioteke,

¹³ hatü jomi büpa mü nyih nyet ya nyet thahshi kahdokei uo. Üpaiyao büpa kü shah phahükao ne-e, mehenangkü jomi büpa longi ponghahpü eeteke.