JEREMIAH 9 - DAÜLANGPÜ LAIHING (BSI)

¹ Oh ngelei shangjing paoh yunglok vailangmeyü, ngelei mük kü paoh mükphi yunglok vailangmeyü, ngelei nanglakthü jütükpü nangkü nyakhingai thüngei ngei thephen vaipeih.

² Oh ngei paoh bhih kahdokei yendai am paümhen shing nyulangmeyü, ngei ngelei nanglakthü tuhphongtü lüdaihah shepeih. Jom peü mükbungjuyungpüthü, hatü peileipüthü mon nyüke.

³ Jomi jomei yei pülah kei komaoknyüke, Jomü shahhing shing nevai, shahshem kü wong kohshi longnyüke; mehenangkü jom ten kübü ten dükei dainyüke, hatü jomi ngei nenyingnyu shei Shembüpai enyüke.

⁴ Nüngei küphü kü lituh, hatü nüngei jeihinaü üpa kao hingtelem; mehenangkü nüngei jeihinaüthü lueilempüthü mon, küphü anaü kemei lueilempü am kei shinei kamteinyüke.

⁵ Jom peü laophülei chingyow kü lueilemnyüke, hatü üpaiyao shahhing ne-enyu; Jomi jomei yei shahshem ehen nyuhtüktü nyüke, Jomi mang thahnyüke hatü haleipü mong lepei leihen longi wongshi nyüke.

⁶ Shüveipü pheikü shüveipü, lueilempü pheikü lueilempü! Jomi ngei nyinghen nemongnyu shei Shembüpai enyüke.

⁷ Hanangkü Jeiyong Shembüpai hapakei enyüke: Ngei shaang jom dokei veihen, ngelei mang nanglakthü kü ngei mehe dükhenang?

⁸ Jomei yeijaangü dibenüng lahhan; ju kübü vamei lueilemei enyüke. Jom peü küphüthü kü shahmei enyüke, shejao mongeiyü jühen nangkü taphen temnyüke.

⁹ Henüng douthü kü ngei hanghi neshuohhen je? hatü henüng keipü jathili kü ngei bhüh neyemhen je? shei Shembüpai enyüke.

¹⁰ Ngei kahshangthü nangkü thephen; mehenangkü üpaiyao nelongteihen mü lavüngtoiyei nyüke; halei mohoh vaüpü nedannyu; Ouhiyüh hatü yemhimak peü lüdaikemneshiü.

¹¹ Ngei Jerusalemü benei shüngpü dou leitükhen, mahuthü nyuishing leitükhen, hatü Judah jilathü shennyak neshiüi lavüngtoiyei leitükhen.

¹² Ha nyingaokhen mü üpa kü kon changshi nyüpa? Ha baongei ehen mü üpa kü Shembüpalei ju kübü vamei eshuohpa? Üpaiyao peih-ei nekamteihen mü mehekei hapa kahdokü lavüngtoiyei yakphongpa?

¹³ Shembüpai enyüke: Ngei jom kü shuohpü shahkungnyü yaktükpü nangkü, hatü ngelei shah nebang nevaijü hapa kü jiüshi nekam,

¹⁴ shejao jomei mong vaanei chebü chepai nyuhshuohpü keiha Baal kahvang pheikü lüdaipü nangkü ha vampeih.

¹⁵ Hanangkü Jeiyong Shembüpa, Israel Kahvangi hapakei enyüke: Ngei hapa nanglakthü kü laonghiyak ühshuohnyeih hatü leü nemeipü yung yingshuohnyeih.

¹⁶ Jom nevaijü chebü chepai nenyingpü jatthü touei ngei jom haitükhen; jom mangmah thahshi ngei jom pheikü yan shomhen.

Jerusalem am Sheühpü Yüpü

¹⁷ Jeiyong Shembüpai hapakei enyüke: Mahng thepteipü nyühathü kü nyüktuh; thephen manshi theppü nyüyongthü nyüknüng shomtuh.

¹⁸ Hamei mük kü mükphi lomi vamhen shangmü jom lomi ham kü mahng kesho venei nyemtheppha.

¹⁹ Mehenangkü Zion leipü ngeü hük, “Ham mekei lomohpa! Ham mekei veü pongpa! Mehenangkü hami kahdok tuhphong, hatü hamei nyushingü bentükteke” shei epü dannyüke.

²⁰ Shembüpalei shah bangtuh, Oh nyüha, hatü büpalei ju kübü shah nüngei dhaongei shühahtuh; Anha kü mahng kesho hük nyuh-eishuoh, hatü nüngei küphü kü mahng thephen nyuh-eishuoh.

²¹ Dipü jenei ümha shadenei peiteke; hapa jenei ongshemei shüteke; hapai chingyangshong leipü hashihthü jütükhen, bhei leihshing leipü nethethü mahtükhen.

²² Shembüpai hapakei enyüke shei etuh! “Hangku mahngü chingyangshongei nühinam shüngpükei nyuhen, hah vetpü am pheikü manang yaüpükei nyuhen, hatü hathü üpaiyao nejunghen.”

²³ Shembüpai hapakei enyüke: Kon kohpüthüi laophülei kon kü techangmeihü, wong kohpüthüi laophülei wong kü mongtelemhü, shemmeithüi laophülei mop kü techangmeihü;

²⁴ shejao üami changmeinya, jomi Shembüpa nyingpü nangkü maühehütuh; ngei monghahpü douthüyü bampai, shahhingi hatü daülangpai hapa kahdoknyü kü dou düknyeih shei Shembüpai enyüke.

²⁵ Ngei shuw mon jappüthü kü hanghi shuohhen nyihthü ngoikünyüke shei Shembüpai enyüke.

²⁶ Hathüyü Ijip, Judah, Edom, Ammon, Moab hatü jomei sho shohloh-i jappüthü peü. Mehenangkü bhih kahdokei nyupü jatthü peü, hatü Israel am kemei jomei mongdang shuw nejapi nyüke.