JEREMIAH 8 - DAÜLANGPÜ LAIHING (BSI)

¹ Hapa nyih kü Judah ongthü, lakchongbüthü, ngongpathü, thibüthü hatü Jerusalemei nyupüthülei vangtao mahngsha leipü ngaihen shei Shembüpai enyüke,

² hatü jomi bamei chongphoei, ha phei müei, hatü khümei nyupü vanghenyü, lennyü hatü vangsho lithathü kü yeemei tuhhen; hathü üpaiyao thaiyei kahdokei dungei netuhhen, shejao chingyangshongei nühinam yaüpükei yaüshi tuhphonghen shei Shembüpai enyüke.

³ Ngei melemei jom changtükhen, ha mang jathiliyü yemmü nyupü leimeyü didaipü-üng lümhen shei Jeiyong Shembüpai enyüke.

Mükphüngdaipü Jathili

⁴ Shembüpai hapakei enyüke shei nüngi hathü kü etuh: Mechem hanei am dohen, paoei neyaongaoknyu hiang? Jom lemnyong kü daijü nyokei neleinyu hiang?

⁵ Shejema düngei vaishi mehekei hapa nanglakthü ngaümpheilei leidainya? Jomü lueilempü kü wongshongi shongshi nyüke, jom nyokei leihen nemongnyu.

⁶ Ngei jom kü lihen hatü banghen etepih, shejao jomi jiüshi ne-enyu; “Ngei mehe ten dükpa?” shei üpayao mong lepei neleinyu. Koyei vehokei mokpükei jom peü laophülei lem kü dainyüke.

⁷ Yungou-i dangkao mechem om leihen nyingnyüpeih, athuba, khihmang ouha, hatü ouhathüi om leihen nyingnyüpeih, shejao ngelei nanglakthüi Shembüpalei vanglem nenyingnyu.

⁸ Ammi mekei etü, “Ham nahshi nyüpeih, Shembüpalei shahkung ham mü nyüpeih” shei eaoknya? Shejao veituh, nyangbüthüi nejiüi nyangei shahshem leitükpeih.

⁹ Shembüpalei shah yaktükpü nangkü nahpüthü veühühen; jom longi mongmanghen hatü tai kü manhen. Jomi ngelei shahthü yaktük, shaang jomi mehe kon dangpa?

¹⁰ Hanangkü ngei jomei nyühathü mih kü shuohtükhen, jomei kahthü jom hahpü am kü shuohtükhen; mehenangkü maanpü kübü longpü thahshi shahhing ne-epü mop yemnyüke; thibü kübü ngongpathü thahshi peüi shahshemi mon düknyüke.

¹¹ Jomi ngelei nanglakthülei makaw kü wongshi neshiüpükei deihshi shaphongnyüke. Meishi neshiüshiüi, “Meishi nyüke” shei enyüke.

¹² Jomi veüshi düknyüke, hatü jiühitnalai mang thahnyüke, shejao jom neveünyu, jom dhe haiyei leihen nenyingnyu. Ngei hanghi shuohshingkü dopüthü mü jomao dohen; ngei jom noei yaktükhen shei Shembüpai enyüke.

¹³ Nyalingngupai vaümpükei ngei jom thaiyei leilanghüei deihpeih, shejao nyalingngupai kü betjük neshiü, nevaijü adhapü kü adhajük neshiü; lak dangkao kaudaitü nyu; hanangkü ngei mehe jom kü shuoh, hayü jom leipü yahlangpeih.

¹⁴ Jen mehekei nenmü uoshi nyuhen? chemi thaishah hatü penyü showtükpü chingei aongei halei didaishah; Mehenangkü Shembüpa, jenei Kahvangi jen kü mahhen hanteke, hatü leü nemeipü kohpü yung yinghen shuohteke, mehenangkü jeni Shembüpa khüei mang thahteke.

¹⁵ Hami chingmeivangmei yempeih, shejao mehe meiyao nedang; Meitükhen hepak yempeih, shejao ha nangjei nyempü peiküpeih.

¹⁶ Danlei koyeithü hekpü ngeü dannyüke; koyei chebaongthü ngoiküpü danei kahdok kemei jennyüke. Jom peiyei kahdok hatü halei nyupü peü, chingnyü hatü halei nyupüthü lühtüknyüke.

¹⁷ Veituh, ngei am touei biü veyei deiphünyeih; biü nganbüthüiyao ha nenganaokhen, hatü ha am kü kaokhen shei Shembüpai enyüke.

Jeremiah-i Nanglakthü Nangkü Theppü

¹⁸ Mongong mahdai, ngei kü mongmang peiteke, ngelei mongkü tüngnyüke.

¹⁹ Bahiyang kempülei ngelei nanglakthü hapakei vaüpü eepü bangtuh: “Zionlei Shembüpa nenyupü je? Pinnyülei Ongpa neshiüpü je?” Shembüpa, jomei ongpai jangei, “Mehekei ammi lajei kü khümei, kung amei kahvangthü kü khümei ngei mongshihhüpa?” shei enyüke.

²⁰ “Hahvet hepak peihdai, shao hepak dohdai, shejao jen yemnelei” shei nanglakthüi lennyüke.

²¹ Ngelei nanglakthü ngümtükpü nangkü ngeiyao ngümtükteke. Ngei thep, hatü mongshangi ngei shonglangteke.

²² Gileadei meli neshiüpü je? halei meli nobü neshiüpü je? Mehekei ngelei nanglakthüi büm yangei neleinya?