JEREMIAH 7 - DAÜLANGPÜ LAIHING (BSI)

Jeremiah-i Phopshemei Chongvenpü

¹ Hapayü SHEMBÜPAleipü Jeremiah touei peipü shah:

² Shembüpalei phopshem shadenei yaongtü hapa shahjang baongtuh: “Am Judah nanglakthü üami hapa shem shaden homei peinya, Shembüpalei shah bangtuh.

³ Jeiyong Shembüpa, Israel Kahvangi hapakei enyüke: Ammei lemthü hatü ammei dükhiling jeiletuh, hatü ngei am mü hapa shingei nyuhen.

⁴ ‘Hapayü Shembüpalei shem, Shembüpalei shem, Shembüpalei shem’ shei lueilempü shahthü kü hingtelem.”

⁵ Ammi hingmei, ammei lemthü hatü ammei dükhiling jeilejema, hatü hüki hük mü shahhing kü noteijema,

⁶ ammi benhapa kü, hashihha kü, vaümnyü kü neshüvei, nevaijü hapa shing kü mang neshiüpü iy neyenhü, hatü am ma yahhen mü lebü kahvangthü kü khümei nedaijema,

⁷ ngei den shingvaishi ambü ampa kü shuohpü kahdokei ngei am mü nyuhen.

⁸ Yahlak neshiüpü lueilempü shahthü kü hinglemei am hatouei nyüke.

⁹ Ammi gühtü, shennyak jütü, mükbungjuyungtü, shahshemi lahtü, Baal kahvang kü hatü ammi nenyingpü lebü kahvangthü kü moila shuohtü,

¹⁰ ngei kü khümpü shemei peiyei ngei touei yaongtü, “Ham daülangi nyüpeih” shei hathü jiühitnalai douthü dükyaki ehen je?

¹¹ Am shingvaishi ngei kü khümpü shemü gühpathülei chephijaan neleihen je? Ngei ha kü veishi nyüpeih shei ammi nyingei nyüke shei Shembüpai enyüke.

¹² Shongpü ngei kü khümhen lingpü shing Shilohlei heih-ei veituh, hatü Israel nanglaki mang thahpü nangkü ngei mehe dükshuohpa ha kü veituh.

¹³ Shaang, ammi hathü dou peü dükpü nangkü, shei Shembüpai enyüke, hatü ngei nedoh-i am kü eteke, shejao ammi ha nebang; mechem ngei am kü nyük, ammi nejangpeih;

¹⁴ hanangkü ammi mongnyangpü, ngei kü khümpü shem kü ngei Shiloh kü dükshuohpü keiha ngei ambü ampa kü shuohpü hapa shing kü dükhen.

¹⁵ Ngei ammei jeihinaüthü hatü Ephraim am hühihathü changtükpü keiha ngei toueipü am changtükhen.

Nanglakthü Ven Nedanpü

¹⁶ Nüngi hathü nanglak shingvaishi tephop, telen, nevaijü ngei kü teyü; mehenangkü ngei nüng kü nejangpih.

¹⁷ Jomi Judah jilathü hatü Jerusalem chingyangshong kü mehe düknya, nüngi ha eenyüla?

¹⁸ Hashihthüi pü konyüke, pathüi aw jaknyüke, nyüthüi aan ngümei vangsho onglanyü kü aan lingnyüke, hatü lebü kahvangthü kü yiü moila langei moilapü homei ngei mongshihhünyüke.

¹⁹ Shejao jom ma yahhüpeyü ngei je? Nevai, jom nyingi ma yahnyüke, hatü jom nyingi veü dangnyüke.

²⁰ Hanangkü Shembüpai hapakei enyüke: Ngei mongshih hatü lohpü hapa shing, hangkuthü, yemhimakthü, pühivungthü hatü betjükvungjük kü khüpeilanghen; hapa kü aw bahhen hatü ha nemethen.

²¹ Jeiyong Shembüpa, Israel Kahvangi hapakei enyüke: Ammei moilathü kü jakpü moilathü üeishuoh, hatü haleipü phai hahtuh.

²² Mehenangkü ngei ambü ampa Ijip leipü mülangpü nyih kübü ngei jomphong kü jakpü moila hatü moilathü nang jom kü ne-e nevaijü ngeükhüam neshuoh.

²³ Shejao jom kü, “Ngelei shah bangtuh, hatü ngei ammei Kahvang vaihen, hatü amü ngelei nanglak vaihen; am meishi nyuhen shingvaishi ngei epü lem kü kamtuh” shei hapa ngeükhüam shuohpeih.

²⁴ Shejao jomi ha nebang, hatü jomei dhaong neshaang, shejao jomei mang mong vaanei jomi deihhahpü lem kü kam, hatü sheshalei nevai, ngaümphei lemei veipeih.

²⁵ Ambü ampa am Ijip leipü vamei daipü nyih mebü shinnyih thahshi nyihjeih ngei ngelei chongphopü thibüthü jom touei shompeih;

²⁶ shejao jomi ngei epü nebang, nevaijü mong neshuoh; shejao jomei ngaümvang vaanei nyupeih. Jomei chebü chepa mao jom-üng nyeinya nemei-i dükpeih.

²⁷ Hanangkü nüngi hathü shah kemei jom kü eyeishuoh, shejao jomi ha kü nebangkahen. Nüngi jom kü nyükjao jomi nejangphahen.

²⁸ Nüngi jom kü ha etuh: Hapayü Shembüpa, jomei Kahvangei ven nedanpü, hatü ungei-aeipü neyahpü jathili; shahhing mahdai; hapayü jomei juben kübü mahdaiteke.

Hinnom Kahji Leipü Mang Dou

²⁹ Ammei sho japei yaktüktuh; shangtaothülei mahng theptuh; mehenangkü Shembüpai büpa mongshihhüpü nanglakthü yaktükhen.

³⁰ Judah nanglak ngei touei mang dou dükteke shei Shembüpai enyüke; ngei kü khümpü shem sheih-ei jomi jiühitnalaipü lajei tuhteke,

³¹ hatü jomi ngei ne-epü, ngelei mongeiyao nelepü dou jomei hapeüthü Hinnom Kahjilei Topheth kahvang kü aw kü jakei moila shuohhen vaümchongthü nedoh-i lingnyüke.

³² Hanangkü hapa kü Topheth nevaijü Hinnom Kahji shei nenyükhen, shejao, “Jüteipü Kahji” shei nyükhen nyihhihe hingmei ngoikünyüke shei Shembüpai enyüke. Mehenangkü shing neshiüi manglei thahshi jomei mahng halei vükemhen.

³³ Hapa nanglakthülei mahngü ouhiyüh, yemhimakthülei het vaihen, hatü ha kü üamiyao nevowhen.

³⁴ Ngei jomei mongongmonglepü ngeü, Judah chingnyü hatü Jerusalem chingyangshongei yiükyah lashompü ngeühinga kemei dohtükhen; mehenangkü hapa kahdokü lavüngtoiyei leitükhen.