JEREMIAH 6 - DAÜLANGPÜ LAIHING (BSI)

Jerusalem kü Vepathü Shonlangpü

¹ Oh Benjamin nanglakthü! Jerusalem leipü yanglem yemei nyaidaituh! Tekoalei amit vüngtuh, Beth-Hakkeremlei nyangeihepü aw hük shuohtuh! Mehenangkü apshaphi leipü shanghah hük vamkünyüke, nyemshi mangtükhen hük peikünyüke.

² Ngei nela meipü Zion, bamhüshi phenni nyupü shing mangtükhen.

³ Ongthüi laophülei veshanthü mütü pinnyü khüei peikahen. Jomi pinnyü shinei ashakshem vehen; jomi laophüi mongpü shing kü vehen.

⁴ “Pinnyü khüei hokhen temtuh; Aongshah, hatü haümhah mü jom hahshah! Pheidainyu khih, hepak lüdainyüke; yanüng nyakyang lushi chongkahen.

⁵ Aongshah, jeni nyak kü hahshah, hatü pinnyülei ongshemthü bentükshah!”

⁶ Jeiyong Shembüpai hapakei enyüke: Jomei püthü agtükkemtuh; Jerusalem penyü benhen thai chantuh. Hapa chingnyü hanghi danghen jiüpeih, meheyao neshiü shejao halei shüveidoidei mon nyüke.

⁷ Yungkuk hüki yung meishi tuhpükei, pinnyüi pinnyülei mang jungei tuhnyüke; Depülaopü, benpülangpü mon pinnyü toueiyü dannyüke; tüngpüaipü hatü ma yahteipü mon pinnyü touei dannyüke.

⁸ Shahvüng shuohpü bangtuh, Oh Jerusalem! Hei nevaijema ngei nüng toueipü nyokei lüdaihen, hatü üpayao nenyui hapa chingnyü lavüngtoiyei tuhphonghen.

⁹ Jeiyong Shembüpai hapakei enyüke: Nyalingngupai chaei vaümlangpü keiha, Israel am peü chaei maotükhen; Nyalingngupai vaümpü shennyaki betjük vaümpü keiha, shao kaothü leipü vaümlangtuh.

¹⁰ Jomi danhen ngei üpa kü ehen, hatü shahvüng shuohhen? Veituh, jomei dhaong dhühlang, jomi nedanaoknyu. Jom kü Shembüpalei shah-ü nyipüwapü dou keiha leidai; jomi ha kü mongong neshiü.

¹¹ Shejao ngeiyü Shembüpalei mongshih-i maei nyüpeih; ngei ha kopai nyiudaitü nyüpeih. Chingyangshongei hashihthü kü, hatü nethethü thaipüyupü kü ha khüpeishuoh; Nyühipa nyiphen yah-ei lüdaihen, viünyü viüpa kemei deilanghen.

¹² Jomei shemthü, kah hatü nyühathü peü mih-ei vaidaihen; Mehenangkü hapa kahdokei nyupüthü khüei ngelei lak haonghen shei Shembüpai enyüke.

¹³ Mehenangkü maanpü kübü longpü thahshi shahhing ne-epü mop danghen yemnyüke; thibü kübü ngongpathü thahshi peüi shahshemi mon düknyüke.

¹⁴ Jomi ngelei nanglakthülei makaw kü wongshi neshiüpükei deihshi shaphongnyüke; Meishi neshiüshiüi “meishi nyüke” shei enyüke.

¹⁵ Jomi veüshi düknyüke, hatü jiühitnalai mang thahnyüke; shejao jom neveünyu, jom dhe haiyei leihen nenyingnyu. Ngei hanghi shuohshingkü dopüthü mü jomao dohen; ngei jom noei yaktükhen shei Shembüpai enyüke.

¹⁶ Shembüpai hapakei enyüke: Lembaongei yaongtuh, hatü veituh, hatü meyangpü lemchang yemtuh, melemei lem meipü nyüpa, ha kü kamtuh, hatü nüngei laangha shing nyiushemmei danghahtuh. Shejao jomi, “Hami ha kü nekampih!” shei enyüke.

¹⁷ Ngei nüng shing yombü vamhüpeih, hatü, “Amit ngeü bangtuh” shei epeih, shejao ammi, “Hami ha nebangpih!” shei epeih.

¹⁸ Hanangkü bangtuh, Oh jatthü, hatü jom kü mehe vamkahen ha nyingtuh, Oh denbüthü.

¹⁹ Bangtuh, Oh kahdoknyü; Veituh, ngei hapa nanglak kü shanghah koei peihen, hayü jomi linghahpü kü vampü betjük; mehenangkü jomi ngelei shah kü nehaka, hatü ngei nyuhpüvenpü kü nenyakneken, jomi ha yaktükteke.

²⁰ Sheba leipü leipü ayingshü ngei shingvaishi mehe nadang, nevaijü tailu kahdok leipüyaangü mehe vaihen? Nüngei jakpü moila yahbenüng nevai, nevaijü nüngei moilathüyü ngei mongongbenüng nevai.

²¹ Hanangkü Shembüpai hapakei enyüke: Veituh, ngei hapa nanglakthü khüei huluh yaong haüphongnyeih; jomi ha kü huluh shuohtü dohen; nyühipa, hashih naüha hatü chingyow, hatü küphüthü chemi mahhen.

²² Shembüpai hapakei enyüke: Veituh, apshaphi kahdok leipü shennyakthü peikünyüke; tailu kahdok leipü longpü jat hük layaongkünyüke.

²³ Jomi pülah hatü phung nonyüke, jomü mangshi hatü phahji neshiü, jomei ngeü-ü yungching ngeü keiha, jomi koyeithü kü uonyüke; hampa vehok kü daipükei ow temtü am khüei peikünyüke, Oh Zion nela!

²⁴ Hami jomei shahjang dantepih, hamei lak mahngdaiteke; mongshangi ham yeplangteke; nyüha hük hapeü angnüng tüngpükei ham shonglangteke.

²⁵ Am kahlei tesha, nevaijü lemei tekamtei; mehenangkü vepa yan notü nyüke. Nyemhihan peü lemei nyüke.

²⁶ Oh ngelei nanglak, dhoila ashak ümtuh, depla kü lüteituh; halomha hük kü shahyaki thepeiyoungtuh; mehenangkü am jühen ngangahük kü peikahen; nyempühanpü peü lemei shinei nyüke.

²⁷ Ngei nüngü ngelei nanglakthü khongkü jomei lem dokhen shingvaishi nyiam dokei veibü hatü hienbü leihüpeih.

²⁸ Jom peü mong vaanpü, khüei yaongpü, hatü mih vüshihpüthü; jomü melangnyiam hatü nyiam keiha vaanshi jom peüi nemei-i düknyüke.

²⁹ Awbhaong longi wong kohshi jaknyüke, shejao nemeipü nyiam nenyaü, nyiam heenbüi angkü nyiam heennyüke; hapa keiha jomei mang neyaktük.

³⁰ Jom kü, “Yaktükpü ngin” shei nyükhen; mehenangkü Shembüpai jom yaktükteke.