JEREMIAH 51 - DAÜLANGPÜ LAIHING (BSI)

Nedoh-i Babylon kü Shahphenpü

¹ Shembüpai hapakei enyüke: “Veituh, ngei Babylon khüei, hatü Leb-qamai nanglakthü khüei yingtetlongshaihen vanglük hük vamhühen.

² Ngei Babylon kahdokei jom shaapei yaktükhen, hatü lavüngtoiyei leihühen shingvaishi kung am shomhen; pinnyü shanghahpü nyih lem peü phikü pinnyü khüei yaonghen.

³ Üpaiyao laophülei pülah kaphen tekühü, nevaijü jomei ve-ow te-owhü. Jomei nethethü yangei tetuh; jomei veshanthü peü kemei mahtüktuh.

⁴ Jomphong nemei-i ma yahtü Babylon chingyangshongei diyei shükshi nyuhen.

⁵ Israel am Daülangpü Hük touei jomei kahdokü mangi maei nyujao, Jomei Kahvang, Jeiyong Shembüpai Israel, hatü Judah am nebetükangpih.

⁶ Babylon leipü nyaidaituh! Am yanghen mokdaituh! Jomei mangi am temah. Hapayü Shembüpai bhüh yempü hepak; pinnyü kü shangpükei büpai jom kü nyokei shuohhen.

⁷ Shembüpalei lakei Babylonü hon pati kei nyupeih; Pinnyüi kahdoknyü kemei kü yiüi chokhüpeih. Jatthüi pinnyülei yiü yingteke; hanangkü jomphong shaangü ngadaiteke.

⁸ Babylon lomi dohen hatü khih mü nihdaihen. Pinnyü deih-ei mahng theptuh! Pinnyü tüngpü kü meli shihtuh; Üpai nying, pinnyü meihenao aokpeih.

⁹ Hami Babylon meitükhen kheteke, shejao pinnyü nemeiaokpeih. Pinnyü tuhphongtü jen peüi laophülei kahdok yemei leidaishah; Mehenangkü pinnyü kü shahphenpü vangshang ngoishi aongteke, hatü vangsho ngoiteke.

¹⁰ Shembüpai jen dah shakhüteke, Kei, Shembüpa, jenei Kahvangi Zionlei mehe dükpa, ha jeni eshah.

¹¹ Lahhanthü daüptuh! Inyüshung paituh! Shembüpai Babylon am mahtükhen shei deihpü nangkü Media ongthü vamhüteke. Shembüpai laophülei phopshem nangkü bhüh yemhen.

¹² Babylon penyüsha khüei khüamlung haongtuh! Veshanthü nyeinya wong kohhütuh! Veihen shennyakthü tuhtuh, show uohen temtuh! Shembüpai Babylon am khüei tempü laophülei küpjan dükhen.

¹³ Yungnyü yungha longi nyupü, hatü mop longi angpü kahmük; Am kü dohpütenpü hatü am mahhen hepak ngoiteke.

¹⁴ Jeiyong Shembüpa, büpa laophü nyingi hapakei lahteke: “Ngei shoukhanbaongthü keiha am hahtükhen veshanthü müei peiyei mahühen, hatü jomi am neütü leneiwonghen.”

Kahvang kü Menvih Kesho Hük

¹⁵ Büpai laophülei ngani kahdoknyü lingpeih; büpalei kihikoni kahdoknyü chongnyiam lingpeih, hatü büpalei danaokpü koni vangshothü paanei deishihpeih.

¹⁶ Mechem büpai vangmuk khunghen, vangsho leipü yungthü ngüngnyüpeih; Büpai kahdoknyü dohpü leipü phumthü vamhünyeih. Büpai vang mü klang shomnyeih, hatü büpai tuhshing leipü vanglük shomnyeih.

¹⁷ Shennyak peü sholi neshiüi, hatü kon neshiüi nyüke; Hon shükpüthüi laophüi linghahpü lajei kü-üng veünyüke. Büpalei lajeithüyü shahshem, hatü hathü kü yangnyu ngü neshiü.

¹⁸ Hathüyü yahlak neshiüpü eelanyongnya douthü khih. Mechem jom kü shahphenhen ngoihenshang jom mahkemhen.

¹⁹ Jakob Kahvangü hapakei nevai; büpayü lemphü douthü Lingbü, Israelü laophülei mükjüp jat vaishi jeteke; Jeiyong Shembüpa büpalei men.

Shembüpa lei Phunglang

²⁰ Nüngü ngelei vehok phunglang, nüng mü ngei jatthü ngümtükpeih, nüng mü ngei ongchingthü mahtükpeih,

²¹ nüng mü ngei koyei hatü halei uopüthü jütükpeih, nüng mü ngei koyei kharithü, hatü ha kü yüppüthü mahtükkempeih,

²² nüng mü ngei nyüha hatü baha jütükpeih, nüng mü viünyü viüpa hatü hashih naüha jütükpeih, nüng mü nethe hatü nelathü mahtükpeih,

²³ nüng mü mi hatü mi yombüthü jütükpeih, nüng mü kahling am hatü mohohbaongthü jütükpeih, nüng mü governorthü hatü lakchongbüthü jütükpeih.

Babylon Mahhen Nang

²⁴ “Ammei müki eeshi ngei Babylon hatü halei nyupüthü kü jomi Zion kü nemeipü dükpü nangkü ngei ha shemhen” shei Shembüpai enyüke.

²⁵ “Ngei nüng khüei nyüpeih, Oh kahdoknyü kemei mangteipü kahshang” shei Shembüpai enyüke. “Ngei nüng khüei ngelei lak haonghen, ammei kahshangthü kahji mü hükkei düei shantükhen, hatü am awmi leitükhen.

²⁶ Am leipü mepa yaongao shongkaong yaong vaishi neyahhen, nevaijü chongnyiam vaihen yaong hükao neyahhen, mehenangkü amü lavüngtoiyei den kü tuhphonghen, shei Shembüpai enyüke.

²⁷ Kahdok kü khüamlung haongtuh! jatthü kü amit vüngeishuoh! Pinnyü khüei hokhen jatthü temhütuh; Pinnyü khüei Ararat, Minni hatü Ashkenaz ongchingthü nyüktuh. Pinnyü khüei veshan mübü hük jetuh; Shoukhanbaongthü kei koyeithü shomtuh.

²⁸ Pinnyü khüei hokhen jatthü, Media ong, jomei governorthü, hatü lakchongbüthü mü jomi vanglem lempü kahmükthü temhütuh.

²⁹ Üpayao halei nenyuhen shingvaishi Babylon kahdok lavüngtoiyei tuhhen shei Shembüpai tempü küpjan eeyei kahdok kheünyüke hatü jennyüke.

³⁰ Babylon am veshanthü nehoki dohdaiteke; jomü veyomdülei nyüke. Jomei wong kemdai; jom nyüha kei leidaiteke. Pinnyülei bükhishem awi haptük; jomei penyü shalat bhagdaiteke.

³¹ Shahjang kobü hük phei kü hük, phongmokbü hük phei kü hük shei Babylon ongpa kü nüngei chingnyü peü lemei shümlangteke shei ehen dainyüke,

³² yung taenshing vepathüi yomlangteke, hatü penyüshathü awi haptükteke, hatü veshanthü nyemdaikem.

³³ Jeiyong Shembüpa, Israel Kahvangi hapakei enyüke: Babylon nelayü hah tenpü hepak kü hah tenshingei shouptükpü hah kei nyüke; Kansho hük angpheikü pinnyü vetlanghen peikahen.

³⁴ Babylon ongpa Nebukadnezzari ham lühtükpeih, büpai ham ngümtükpeih; büpai ham dük kong kei leitükpeih; Biüi keiha büpai ham lühtükpeih, hatü hamei hetmeiyungma-i büpa shümoh meipeih, hatü büpai ham bhaiyei ngaitükpeih.

³⁵ Ngelei phai mangtükpü nangkü Babylon kü bhüh yemtuh shei Zion ami enyüke. Hamei iy Babylonei nyupüthü kü hettuh shei Jerusalemei nyupüthüi enyüke.”

Shembüpa i Israel am kü Sheühhen

³⁶ Hanangkü Shembüpai hapakei enyüke: “Veituh, ngei nüng khüambakei yaonghen, hatü nüngei bhüh yemhen; Ngei jomei yungchingthü jeptükhen, hatü jomei yunglok ütükhen.

³⁷ Babylonü benpülangpü nyüp yakshing leitükhen, shahhishuwlei jep leitükhen, Üpaiyao nenyupü nyembenüng, hatü eelanyongnya shing leitükhen.

³⁸ Babylon am kemei mailang, hatü mailang chehathü kei ngüngnyüke.

³⁹ Mechem jom paokahen, ngei jom kü mo hük temhen, hatü yiüi chokhühen, hatü jom nyiyeiwaei vaüei eehen, hatü nepao-aokhen mü den shing shidaihen shei Shembüpai enyüke.

⁴⁰ Ngei jomphongü mi chehathü, yum hatü mi chebaonghathü kei jüshingei müei daihen.”

Babylon amei Lashüh

⁴¹ Kahdoknyü peüi vihpülüpü Sheshakh mekei etü shümlangpa! Jatthü touei Babylonü mekei jiühitbenüng leidaipa!

⁴² Babylon shak kü yungching longei aonghen, hapa ngüngpü yungmoki pinnyü lümlanghen.

⁴³ Pinnyülei kahdokü üpaiyao nenyupü, üpayao yendai ouham nelongteipü lavüngtoipü kahvan bhih kahdok leitükhen.

⁴⁴ Ngei Babylon leipü Bel kahvang kü hanghi shuohhen, hatü pinnyüi mehe lühtükpa ha bhaitükhühen. Jatthüi hajük kü pinnyü kü nekhümhen, Babylon amei bham laamdaiteke.

⁴⁵ Haleipü vamdaikei, ngelei nanglakthü! Laophülei büm yanghen nangkü mokdaituh. Shembüpalei mangpü mongshih kübü mokdaituh.

⁴⁶ Kahmük kü shahjang lemmü lemmü danshingkü tenyem; Shenüng shahjang hük ngüvang hük shei kahmük kü dehilao shahjang, hatü ong hüki ong hük khüei hokhen shahjang danhen.

⁴⁷ Ngei Babylon lajeithü kü shüveihen hepak hük hingmei peikahen; Jomei kahmük kemei mongmanghen, hatü jomei mahmahng jom touei nyuhen.

⁴⁸ Hahepak kü vangsho, kahdok hatü halei nyupüthü peü Babylon am mahpü kü mongongpai lenhen; mehenangkü apshaphi leipü pinnyü hahhen am peikahen shei Shembüpai enyüke.

⁴⁹ Babylon ami kahdoknyü kemei jüpü keiha Israel amao jütükpü nangkü shaang Babylon am dohen.

Babylonei Nyupü Israel am kü Kahvangei Shahjang

⁵⁰ Am meshüki yan kübü yangei nyüpa, Pheiyei nenyu-i lüdaikemtuh! Tailu kahdok leiyao Shembüpa ngei deih-ei dangtuh, hatü Jerusalem ammei mongei deihtuh.

⁵¹ “Ham veü pongteke, ham kü yaüteke, hatü veüpongi hamei dhe kü jümteke; mehenangkü kung ami Shembüpalei shem kü daülangpü shingthülei shüteke.”

⁵² Shejao ngei pinnyülei lajeithü, hatü kahdok kempü kü hanghi shuohhen, hatü ma yahtü thephen hepak ngoikünyüke shei Shembüpai enyüke.

⁵³ Babylon ami vangsho thahshi aongjao, hatü halei penyüsha lingjao ngei pinnyü khüei ha bentükhen shennyak shomhen shei Shembüpai enyüke.

⁵⁴ Babylon leipü vaüpü eepü ngeü peikünyüke, Babylon amei kahdok leipü benpülangpü ngeü longpü peikünyüke.

⁵⁵ Shembüpai Babylon mahtükhen; büpai jomei ngeümoh ngeüshe nentükhen. Yungnyü büng longpü keiha vepathü peiyei hahtükhen; Jom vaüpü eepü ngeüi yimjang vamhen.

⁵⁶ Babylon khüei vepathü peikahen; Pinnyülei veshanthü yepei lüdaihen, hatü jomei lahhan bhagdaihen. Mehenangkü Shembüpayü mang kü shüveipü Kahvang; büpai lomei ha kü shemhen.

⁵⁷ Ngei jomei lakchongbüthü, hatü kon kohpü shennyakthü, jomei governor, mübüthü hatü veshanthü yiüi chokhühen; Jom den kü shidaihen hatü nepao-aokhen shei Ongpa, üpalei men, Jeiyong Shembüpa nyüpa, büpai enyüke.

⁵⁸ Jeiyong Shembüpai hapakei enyüke: “Babylon amei chetlüpü bham kahdokei laamdaihen, hatü jomei shaopü penyüsha awi haptükhen; Kong kü nanglakthü nyiunyüke, Jatthüi dükpü peü aw kü ühtükhen.”

Jeremiahlei Shahjang Babylonei Shompü

⁵⁹ Judah kü Zedekiah ongpai vanglem lempü bong alipabü kü büpa mü Babylonei chemi heihpü Mahseiahlei cheha Neriah, Neriahlei cheha Seraiah lakchongbü kü Jeremiah-i shuohpü shahjang.

⁶⁰ Jeremiah-i Babylon am kü peihen vongshüh kemei laidü hük kü nyangteke, Babylon nangkü ha peü nyangei nyüke.

⁶¹ Büpai Seraiah kü, “Mechem nüngi Babylon ngoihenshang, nüngi hapa shahthü wongmü ietuh,

⁶² hatü, ‘Oh Shembüpa, shennyak nevaijü yemhimak mepayao halei nenyuhen; hapayü den kü lavüngtoiyei tuhphonghen’ shei nüngi epeih” shei etuh.

⁶³ Mechem nüngi hapa laidü ieyei kemhenshang, ha kü yaong hük shatü Euphrates yungyenei shüktüktuh,

⁶⁴ hatü etuh, “Ngei pinnyü kü vongshüh koei peiyei Babylonü ne-yei nepao-aokhen mü hapakei hingdaihen hatü pinnyülei nanglakthü kemei dohen” shei eteke. Jeremiahlei shahthü hatouei dohnyüpeih.