JEREMIAH 50 - DAÜLANGPÜ LAIHING (BSI)

Babylon kü Shahphenhen

¹ Jeremiah thibü homei Babylon hatü haleipü nanglakthü nangkü epü shah:

² Jatthü kü etuh hatü baongtuh, khüamlung haongtuh hatü baongtuh, Ami nejo-i, “Babylon doteke! Bel kahvang veü dangteke, Marduk kahvang mong laaiyei nyüke, pinnyülei lajeithü veüpai hatü nyempai maei nyüke.”

³ Apshaphi leipü jat hüki pinnyü hahhen, hatü pinnyülei kahdok lavüngtoiyei tuhhen. Üpayao halei nenyuhen; shennyak hatü yemhimak chemi nyaidaihen.

⁴ Hathü nyih kü hatü hapa hepak kü Israel hatü Judah nanglakthü chemi thepyaki Shembüpa, jomei Kahvang yemhen.

⁵ Jomi Zionlei leipü lem phehen, hatü jomei dhe halemei meehen. Jom leiyei jom nyingi Shembüpa kü mechemao nebehen nedohnetenpü vangpüshuwpai shahen.

⁶ Ngelei nanglakthüyü mah-ei nyupü mithü; jomei mi yombüthüi jom lemnyong kü mülangpeih, hatü vakhivien kü longteihüei angpeih. Jomphongi mikhaok betüktü kahshangei longteiyei nyupeih.

⁷ Üami jom heü, hathüi jom lühtükpeih; jomei vepathüi, “Hami pungpü nevai; mehenangkü jomü Shembüpa, hingshangpü jomei phenni, jomei bühipai monglempü Shembüpa khüei mang thahpeih” shei eteke.

⁸ Babylon leipü nyaidaituh; Babylon amei kahdok tuhphongtuh, hatü nüngü yumthü müpü yumbaong kei daituh.

⁹ Mehenangkü ngei apsha kahdok phi leipü longpü jatthü mongjemhütü Babylon khüei vamhühen hatü müei peikahen hatü jom hahtükhen. Jomei lahhanü mechemao kong mü neleipü hampalei lahhan kei nyuhen.

¹⁰ Hapa keiha Babylon amei douthü shetei lüdaihen; üami ha douthü yahnya, hüshemei deihhen shei Shembüpai enyüke.

Babylon Dopü

¹¹ Amphongi ngelei mükjüp aetei yahpü nangkü hah tenpü mohoh keiha mongongjao, hatü koyei kei ngeüwong anei vaüjao,

¹² ammei nyü chemjalak kü veü ponghen, hatü am bühpü hümlungnyü mongshanghen. Babylonü jatthü khongkü peü mü maanpü jat leihen, hapayü kahvan, bhih kahdok leidaihen.

¹³ Shembüpai mongshihpü nangkü üamao halei nenyuhen, shejao lavüngtoiyei leidaihen; Babylon peih-ei daipüthü peüi hanhen, hatü pinnyü ma yahpü eetü thamahen.

¹⁴ Lahhilaong nopüthü peüi Babylon khüei hokhen show lingtuh. Lahhan hükao ne-ao-i pinnyü kü kaptuh; mehenangkü pinnyüi Shembüpa khüei mang thahteke.

¹⁵ Shing peü lemei thep nyüktuh! Pinnyü vepathü touei shakei vamhen, jomei shangdü hatü bham dodaihen. Hapayü Shembüpai bhüh yempü vaipü nangkü pinnyü kü bhüh yemtuh; pinnyüi mih kü dükshuohpü keiha pinnyü kao dükeishuoh.

¹⁶ Babylon kü sheili sheipüthü hatü hahvetpü amei hahvet longkhoih dohtükhütuh. Veshanthülei yanlu kü nyempai peüi laophülei kahdokei nyokei leikemhen.

Israel am Nyokei Leihen Nang

¹⁷ Israel amü mailangi changshuohpü nangkü yandaipü mithü kei nyüke. Shongei büpayü Assyria ongpai lühtükpeih; shompülei büpalei vangü Nebukadnezzar ongpai shaitükpeih.

¹⁸ Hanangkü Jeiyong Shembüpa, Israel Kahvangi hapakei enyüke: “Ngei Babylon ongpa hatü büpalei kahmük Assyria ongpa hanghihüpü keiha hanghihühen.

¹⁹ Shejao Israel am jomei kahdokei nyokei leihühen, hatü büpai Karmel hatü Bashan kü vampü hahying hahshi nyuhen, hatü Ephraim hatü Gilead shangtaothülei hüshemei hahhen.

²⁰ Hathü nyih hatü hapa hepak kü Israel hatü Judah amei mang yemhen shejao hükao nedanghen; mehenangkü ngei yangpüthü kü ngei mang tükshuohhen.”

Kahvangi Babylon am Shahphenhen

²¹ “Merathaim hatü Pekod kahdokei nyupüthü hahtuh. Changei daiyei hathü chemjalak kü jütükkemtuh shei Shembüpai enyüke. Ngei epü lemphüli düktuh.

²² Vehok hokpü ngeü hatü benpülangpü ngeü longpü dannyüke.

²³ Kahdoknyü mangtükpü koaklak mekei shaangü ha mangdaipa! Jatthü khong kao mekei Babylonü lavüngtoiyei leidaipa!

²⁴ Ngei nüng shing tai hük haenei tuhpeih, Oh Babylon, hatü nüngi ha mangnying shekü ha kü manteke. Nüngi Shembüpa khüei yaongpü nangkü, nüngü hapa kü manteke.

²⁵ Shembüpai lahhilaong tuhshing apteke, hatü büpa mongshihpai vehok phunglang ngaiteke; mehenangkü Jeiyong Shembüpa Kahvangi Babylon kahdok kü dou hük dükhen nyüke.

²⁶ Shing peü lemeipü pinnyü hahhen peituh; pinnyülei puong aptuh, hatü haleipü lemphü shetei lüdaituh; Hapa kahmük chemjalak kü mahtüktuh; meheyao aoei tetuhphong.

²⁷ Jomei mohohbaongthü peü jütüktuh; peü jüshingei yah-ei daituh. Onyükei! jom hanghihen nyih hatü hepak ngoiteke!”

²⁸ Babylon kahdok leipü yangei leipü benha hatü lakeiloiyei nyupüthü Zionlei leiyei Shembüpa, jenei Kahvangi bhüh yempü, laophülei phopshem nangkü bhüh yempü kü bangtuh.

²⁹ Lahhilaong nopüthü peü kü Babylon hahhen nyüktuh. Hükao neyangtüki shinei baümtap vetuh. Pinnyülei dou kü shao nyokei yah-eishuoh; pinnyüi mih kü dükshuohpükei pinnyü kao dükeishuoh. Mehenangkü pinnyüi Shembüpa, Israel amei Daülangpü Hük khüei yaongteke.

³⁰ Hanangkü pinnyülei nethethü chingyangshongei dihen, hatü veshanthü peü ha nyih mahkemhen shei Shembüpai enyüke.

³¹ “Ngei nüng khüei nyüpeih, Oh changmeipü Babylon! Nüng hanghihen nyih hatü hepak ngoiteke” shei Shembüpai enyüke.

³² Changmeipüthü huluh shuohtü dohen, hatü üpaiyao pinnyü nephoukhen; Ngei jomei chingnyüthü kü awi haphen, hatü hapa shinei nyupü lemphü hahtükhen.

³³ Jeiyong Shembüpai hapakei enyüke: Israel nanglak hatü Judah amao longi shüveihahteke; jom yeppüthüi wongmü shatü jom nedeishih-i angteke.

³⁴ Jom Yemleipüba wong kohshi nyüke; Jeiyong Shembüpayü büpalei men. Büpai hingmei jom kü khüambakei ehen, shejüang büpai kahmük kü nyiushemmei koei peiaokhen, shejao Babylon am shing nelingi tuhhen.

³⁵ Babylon am khüei yanlu hük, Babylonei nyupüthü khüei pinnyülei lakchongbüthü hatü kon kohpüthü khüei yanlu peikünyüke shei Shembüpai enyüke.

³⁶ Shahshem thibüthü khüei yanlu hük peikünyüke! Jomphongü ngapa leidaihen. Veshanthü khüei yanlu hük peikünyüke! Jom nyempai mahen.

³⁷ Pinnyülei koyeithü, koyei kharithü, hatü pinnyü mü nyupü kung leipü veshanthü khüei yanlu hük peikünyüke! Jom peü nyüha kei leidaihen; jomei mophimo khüei yanlu hük peikünyüke! Hathü kemei sheteishangei lüdaihen.

³⁸ Pinnyülei yungthü khüei ühivan hük peikünyüke! hathü peü vandaihen. Mehenangkü hayü lajei-i mapü kahdok; nyempai lajeithü ngadaikemhen.

³⁹ Halei shahhishuw hatü ostrikh ou nyuhen. Hüdenhalenshi halei shennyak chingchingei nenyuhen.

⁴⁰ Kahvangi Sodom hatü Gomorrah hatü jomei chingyowthü changtükpükei, üamao halei chingchingei nenyuhen shei Shembüpai enyüke.

⁴¹ Veituh, apshaphi kahmük leipü veshan peikünyüke; Longpü jat hatü ongthü longi kahdok dohpü lemeipü vamei peikünyüke.

⁴² Jomphongü pülah hatü phung notü, jomü phahji neshiü longi mangshi nyüke. Jom koyei kü uopeyü yungching yungmok ngeü keiha nyüke; Jomü am hahhen shingvaishi thepju kü peikünyüke, Oh Babylon nela.

⁴³ Babylon ongpai hapa shahjang danei büpalei lak juwdaiteke. Hapeü bühshingkü nyü hük tüngpükei büpa tüngnyüke.

⁴⁴ Jordan yingnyü leipü mailang hük vamei phenha nipü shing yemei daipü keiha, ngei Babylon am ngangahük kü haleipü changtükhen; ngei hapa shak kü üam jehenshang hathü tuhphonghen. Ngei lepü üpa nyüpa, hatü üpai ngei kü chengaokhen? Ngei khüei yaongaokhen mi yombü üpa nyüpa?

⁴⁵ Hanangkü Shembüpai Babylon kahdok khüei lingpü küpjan kü bangtuh. Mi chehathü shüei lüdaihen hatü peüi ha kü nyemhen.

⁴⁶ Babylon hahpü ngeü kü kahdoknyü kheühen, hatü pinnyüi vaüpü eepü jatthüi danhen.