JEREMIAH 49 - DAÜLANGPÜ LAIHING (BSI)

Ammon am kü Shahphenhen Nang

¹ Ammon am nangkü Shembüpai hapakei enyüke: “Israel kü yeshangthü neshiüpü je? Büpalei mükjüp yahhen am neshiüpü je? Shejü mehekei Molekh kahvang kü khümpüthüi Gad amei kahdok yahlangpa? Mehekei jom halei nyunya?

² Shejao ngei Ammon leipü Rabbah am khüei vebaong shemm kaonghen hepak ngoikünyüke shei Shembüpai enyüke. Hapayü bentüktü tuhhen, hatü hapa kü ngeihpü shonpü chingthü awi haptükhen. Hahepak kü Israel am changtükpüthü shao jomiyao hathü changtükhen shei Shembüpai enyüke.

³ Mahng theptuh, Oh Heshbon am; mehenangkü Ai chingnyü mahtükteke! Lentuh! Oh Rabbah nelathü! Dhoila ashak ümtü mahng theptuh; haleipü halei shei thamaei longteituh. Mehenangkü Molekh kahvang, hatü hapalei ngongpathü hatü lakchongbüthü mü wüpküpei daihen.

⁴ Mehekei nüngei wong kü changmeinya? Nüngei wong mahdainyüke Oh hingnelempü nela; Nüngi nüngei mop kü monglemshi, ‘üpai ngei hahhen peikahen?’ shei enyüke.

⁵ Nüng shinei nyupü chingyowthü homei ngei nüng kü nyempühanpü koei peikahen shei Jeiyong Shembüpai enyüke. Am peü changei deitükhen, hatü benhathü thaiyei leihen üpayao nenyuhen.”

⁶ Shejao shomshi ngei Ammon am kü moihimanhen shei Shembüpai enyüke.

Shembüpa i Edom am kü Shahphenhen

⁷ Shembüpai Edom an nangkü hapakei enyüke: “Teman kü kihikon neshiüpü je? Kenhingpüthü kü shahnying ehen mahdaipü je? Jomei kon kemdaipü je?

⁸ Dedanei nyupüthü, nyokei leiyei nyaidaituh hatü chülohpü yaongshalei jodaituh. Mehenangkü ngei büpa hanghihüpü nyih Esau küshanghah shuohhen.

⁹ Nyalingngupai vaümpüthü peijü dhei aoei netuhnyu je? Yanüng gühpa peiyei jomi napü dou mon yahtü netuhnyu je?

¹⁰ Shejao ngei Esaü-ü bümbai tuhphongpeih, ngei büpalei doujo shakei ngaiyei tuhphongpeih, hatü büpai ha nejohah-aoki nyüke. Büpalei hühihathü jütükteke, büpalei shem am hatü chingyowthü mahtükteke, hatü büpa sheyü neshiü.

¹¹ Nüngei hashihhathü tuhphongtuh, ngei hathü yemmü tuhhen; hatü ngei nüngei vaümnyüthü ngei kü hinglemhühen.”

¹² Shembüpai hapakei enyüke: Üami hapa yungshong yinghen neshang, hathüiyao ha yinghen, mehekei am nehanghi-i nyuhenang? Am nehanghi-i nenyupih; ami ha yinghen vongbong.

¹³ Bozrah-ü nyemao nyemshi leihen hatü nyembenüng dou, eelanyongnya, thaüvaüthemthe dou leitükhen ngei nyingi lahtepih shei Shembüpai enyüke, hatü hapa jilathü peü den kü bentüktü yakphonghen.

¹⁴ Ngei SHEMBÜPAleipü shahjang hük dantepih, hatü jatthü touei phongmokbü hük shomteke: “Am nyingi hapa ching hahhen thaituh! Thepjulei daihen layaongtuh!”

¹⁵ Shaang ngei amü jatthü khongkü peü mü maanpü; hangku khong peüi yaktükpü nanglak leihühen.

¹⁶ Ami yahhüpü dehilao homei, hatü ammei mongdangei changmeipai am luhahteke, amphong yaongvak kü nyupü, hatü shangching shaopülei nyupüthü. Ammi alang keiha shangei jephijaan lingjao, haleipao ngei am shüei vühen shei Shembüpai enyüke.

¹⁷ Edom amü nyembenüng dou hük leidaihen; hapa ponghahpü eetü hapa shing peih-ei daipüthü peüi nyemhen hatü hanhen.

¹⁸ Sodom hatü Gomorrah nyi mü chingyowthü paoh-ei yaktükpü keiha, üpayao halei nenyuhen shei Shembüpai enyüke.

¹⁹ Jordan yingnyü leipü mailang hük vamei phenha nipü shing yemei daipü keiha, ngei Edom am ngangahük kü haleipü changtükhen; ngei hapa shak kü ngei üam jehenshang hathü tuhhen. Ngei lepü üpa nyüpa hatü üpai ngei kü chengaokhen? Ngei khüei yaongaokhen mi yombü üpa nyüpa?

²⁰ Hanangkü Shembüpai Edom am khüei tempü küpjan, hatü Temanlei nyupüthü khüei lingpü kon kü bangtuh. Mi chehathü shüei lüdaihen hatü peüi ha kü nyemhen.

²¹ Jom dopü ngeü kü kahdoknyü kheühen; jom vaüpü ngeü Hakla Yungching thahshi danhen.

²² Veituh! Vepathü alang keiha yang paantü Bozrah kü laongei shükhen. Hapa nyih kü Bozrah amei veshanthülei mongü nyüha hük hapeü bühshingkü maanpükei maandaihen.

Shembüpa i Damaska am Shahphenhen

²³ Damaska nangkü: “Hamath hatü Arpad nyi mongshangnyüke; mehenangkü jomi shahjang ten danei nyüke. Jom mong mahdaitü nyüke, shing nelingpü yung keiha mongshangnyüke.

²⁴ Damaska wong neshiüi leidaiteke, pinnyü nyaidainüng shei yaakdaiteke, hatü mongshangi pinnyü yeplangteke; hapeü bühhen nyüha hük tüngpükei nyüke.

²⁵ Mehekei men-e chingnyü, hatü ngelei mongongpü jilathü yakphongpa?

²⁶ Hingmei, haleipü nethethü chingshongei dikemhen; Jomei veshanthü peü ha nyih nendaihen shei Shembüpai enyüke.

²⁷ Ngei Damaska penyü kü aw hapshuohhen, hatü hapai Ben-Hadad penyüsha hahtükhen.”

Kedar Jat hatü Hazer Chingnyü kü Shahphenpü

²⁸ Babylon ongpa Nebukadnezzari hahtükpü Kedar jat hatü Hazor chingnyü nang Shembüpai hapakei enyüke: Layaongtuh, hatü Kedar hahtuh, hatü heong shennyakthü jütüktuh.

²⁹ Jomei ashakshem hatü jomei mithü yahlanghen; Jomi haenpü ashak mü douthü, hatü utthü peü shetlanghen. Shennyakthüi jom kü, “Peü lemei nyemhihan nyüke!” shei lenhen.

³⁰ “Lomi nyaidaituh! Hazorlei nyupüthü, yaongsha chüpülei jodaituh” shei Shembüpai enyüke. “Babylon ongpa Nebukadnezzari am khüei phaüshah showteke; büpai am khüei küpjan lingteke.”

³¹ “Layaongtuh, hatü nyempü neshiüi nyiushem kü nyupü chingnyü hahtüktuh; Jomei ching kü penyüsha nevaijü bangpü meheyao neshiüi nanglak mon nyüke shei Shembüpai enyüke.

³² Jomei ut hatü mohohthü chaei paanglanghen. Sho chaei kuptükpüthü peü kahdoknyü peü lemei haitükhen, hatü shing peü lemeipü ngei jom kü shanghah koei peihen shei Shembüpai enyüke.

³³ Hazor-ü shuwthülei baümshing leidaihen, lavüngtoipü shing leitükhen; halei üpayao nenyuhen nevaijü halei chingchingeinenyuhen.”

Shembüpa i Elam am Shahphenhen

³⁴ Judah kü Zedekiah ongpai vanglem lemei chongpangpü hepak kü Elam am nangkü Jeremiah thibü touei peipü Shembüpalei shah:

³⁵ Shembüpai hapakei enyüke: “Veituh, ngei jomi mongnyangpü wong pülah bhagtükhen.

³⁶ Ngei Elam am khüei vangsho jung ali kübü vanglük lem ali kü peihühen; ngei hathü kahdok jung peülei haitükhen hatü jom daiyei nelakneloipü jat hükao netuhhen.

³⁷ Ngei Elam am jomei vepathü, hatü jom jühen yempüthü kü nyemhühen; ngei jom kü ngei nemei-i mongshihpai shanghah koei peihen shei Shembüpai enyüke. Jom mangkem thahshi ngei yanlu notü jom kü changhen.

³⁸ Ngei, ngelei ong uoshing Elamei linghen, hatü jomei ong hatü lakchongbüthü mahtükkemhen shei Shembüpai enyüke.

³⁹ Shejao shomshi ngei Elam am kü moihimanhen shei Shembüpai enyüke.”