JEREMIAH 46 - DAÜLANGPÜ LAIHING (BSI)

Ijip Khüei Shahphenpü

¹ Hapayü jatthü nangkü Jeremiah thibü touei peipü Shembüpalei shah:

² Ijip nangkü: Judah kü Josiahlei cheha Jehoiakimi vanglem lempü bong alipabü kü Euphrates yungyen yopailei Karkhemish touei Babylon ongpa Nebukadnezzari neütükpü Ijip ongpa Pharaoh Nekolei veshanthü khüei shuohpü shahjang nyüke:

³ Ammei inyüshung temtuh hatü thepjulei daituh!

⁴ Koyeithü kü vü shentuh, hatü hapa dok shangei aongtuh! Nüngei shing kü yaongtuh nyiam athen thentuh! Nüngei phung yütüktuh, vehok phunglang ow owtuh!

⁵ “Ngei mehe eenya?” shei Shembüpai phenyüke. Jomphong nyempai nyokei leidainyüke; Jomei veshanthü mih-i neühahtü nyüke. Jomphongi yaakei nevei-i mokdainyüke, hatü shing peü lemei nyempü mon nyüke shei Shembüpai enyüke.

⁶ Shülangi mokpü amao nenyaiaokhen; hampathüao neyangaokhen; Euphrates yungyen apsha philei jom huluh shuohtü doteke.

⁷ Nile yung longei aongpü keiha, yungnyüthü büng longpü keiha longpü üpaang?

⁸ Nile yungyen keiha Ijip am longei aongnyüke, yungyenthü keiha jom longei aongnyüke. Ngei longei kahdoknyü jümlangshah; hatü ngei chingnyüthü, hatü haleipü nanglakthü mahtükhen.

⁹ Sheshalei daituh, Oh koyeithü, ngapükei moktuh, Oh koyei kharithü! Moktuh, Oh vehokbüthü, Ethiopia hatü Put am inyüshung nopüthü, hatü pülah nopü Lud shennyakthü.

¹⁰ Hapayü Shembüpa, Jeiyong Kahvangei nyih, hapayü bhüh yempü nyih, hapayü büpai vepathü kü bhüh yempü nyih hük. Büpalei yanlui mangmoh thahshi hahhen, hatü iy-i yungle mangmei thahshi ha yinghen. Mehenangkü Shembüpa, Jeiyong Kahvangi apshaphi kahdok kü Euphrates yungyenei moila hük shuohhen.

¹¹ Gileadei aongtuh, hatü halei melivungla yemtuh, Oh pai mü ngühpü nela Ijip. Angsha kü nüngi meli longi noteiteke; nüng meihen lem neshiü.

¹² Jatthüi nüng veüpü jung danteke, hatü kahdokü nüng theppü ngeüi mahteke; mehenangkü vehokbüthüi vehokbüthü kü huluh shuohteke, hatü jijinyiphen doteke.

Nebukadnezzar Peihen Epü

¹³ Ijip kahdok hahhen nangkü Babylon am Nebukadnezzar peihen nangkü Shembüpalei shah Jeremiah thibü kü eteke:

¹⁴ Hapayü Ijip am kü etuh, hapayü Migdolei baongeishuoh. Hapayü Memphis hatü Tahpanhes leiyao baongeishuoh. Show lingei temtuh, mehenangkü am shinei nyupüthü peü yanlui lühtükkemhen.

¹⁵ Mehekei ammei Apis kahvang dohenang? jom yaongei neaokpih; mehenangkü Shembüpai hathü hungei vütükhen.

¹⁶ Jomphong huluh shuohtü doteke, hatü jom hüki hük kü, “Paotuh, jen kü shüveipü am toueipü nyokei jenei nanglak, hatü nyübüh kahdokei leishah” shei eteke.

¹⁷ Daühingam epai laophülei laphen lüktükpü Ijip ongpa Pharaoh kü, “Ngamduw” shei mentuh.

¹⁸ Ngeiyü vanyangyem Kahvang, Jeiyong Shembüpa, ongpa. Kahshangthü peü mü Tabor Kahshang shaopü keiha, yungching shangkü Karmel kahshang shaopü keiha, am hahhen hük peikahen.

¹⁹ Am Ijiplei nyupüthü, wüpküpei daihen temtuh; mehenangkü Memphis-ü nyuhen shennyak neshiüi lavüngtoiyei leidaihen.

²⁰ Ijipü mohoh cheha kei nyüke, shejao apshaphi leipü leü nemeipü happi jom khüei peikünyüke.

²¹ Jomi leihahpü kung am veshanthüyü mohoh cheha nitshüpü kei nyüke. Jomao dok lepei chemi nyaidaiteke, jom vepa düngei neyaongaok; mehenangkü jom shanghahhen nyih hük, hatü jom hanghihen hepak hük peikünyüke.

²² Vepathü theppü kü heihjajü Ijip amü biü kei lüei lüdaihen, pü agpü am keiha jomü pinnyü khüei ay notü peikahen.

²³ Jomi jomei yinghilong kowtükhen shei Shembüpai enyüke. Jomü ieyei neaoki shoukhanbaongthü mao nyeishi nyüke.

²⁴ Ijip nela veühühen, hatü apshaphi leipü shennyakthü kü shuohtükhen.

²⁵ Jeiyong Shembüpa, Israel Kahvangi hapakei enyüke: “Ngei Thebes amei Amon kahvang, Pharaoh, Ijip hatü jomei kahvangthü, ongthü hatü Pharaoh kü mongnyangpüthü kü hanghi koei peihen.

²⁶ Jom jühen yempü Babylon ongpa Nebukadnezzar hatü büpalei lakchongbüthü kü shuohtükhen. Shejao pheilei payü peihdaipü hepak kü kei Ijip kü shennyak chingchingei nyuhühen” shei Shembüpai enyüke.

²⁷ Nüng tenyem, Oh Jakob, ngelei chongphobü; Nüng mong telai, Oh Israel. Hingmei ngei am tailu kahdok leipü, hatü wüpküp kahdok leipü am hatü ammei hühihathü yanglanghen. Shao Jakob ne-yei chingmeivangmei hatü nyiushemmei kü nyuhen, üpaiyao büpa nenyemhühen.

²⁸ Nüng tenyem, Oh Jakob, ngelei chongphobü; mehenangkü ngei nüng mü nyüpeih shei Shembüpai enyüke. Am yaneipanei nyupü jatthü peü mahtükjao, ngei am chemjalak kü nemahtükpih. Ngei am kü dhaong kü shükhen, shejao shahhingi dükhen. Ngei am chemjalak kü nehanghi-i payü nepeihhüpih.