JEREMIAH 43 - DAÜLANGPÜ LAIHING (BSI)

Jeremiah Ijipei Müei Daipü

¹ Mechem Shembüpai nanglakthü kü etuh shei büpa shompü Shembüpa, jomei Kahvangei shahthü lemphü Jeremiah-i eyei kempa,

² Hoshaiahlei cheha Azariah, Kareahlei cheha Johanan hatü ie kü neshihpü shennyakthü peüi Jeremiah kü, “Nüng shahshem enyüke! ‘Am Ijiplei nyunüng teyiü’ shei ehen Shembüpa, jenei Kahvangi nüng neshomangpih.

³ Shejao Neriahlei cheha Barukh-i ham Babylon am kü nyemshuohtük, hatü ham nyemjütük nevaijü wüpküpei müei nyemdeilang shei shuongeiyatnyu khih” shei e.

⁴ Hanangkü Kareahlei cheha Johanan hatü veshan lakchongbüthü peü hatü nanglak peüi Judah kahdokei nyuhen epü kü Shembüpalei shah nebangi lei.

⁵ Ha nangjeiyei Kareahlei cheha Johanan hatü veshan lakchongbüthüi jatthü peülei yanei nyupü nanglakthü Judah kahdokei nyunüng nyokei leipü aopü nanglakthü peü müei lüdai.

⁶ Jomphongi baha, nyüha, hatü hashihthü hatü veshan mübü Nebuzaradani Shaphanei cheha Ahikam, Ahikamei cheha Gedaliah mü tuhphongpü ongpalei yiükhathü; shao Jeremiah thibü hatü Neriahlei cheha Barukh-ao müei lüdai.

⁷ Hanangkü jomi Shembüpalei shah nebangi Ijiplei yiü hatü Tahpanhes ngoiteke.

⁸ Tahpanheslei nyushi Shembüpalei shah Jeremiah touei pei:

⁹ “Jehoda am veishi nyushi nüngi yaong longpü maani yah-ei Tahpanhes leipü Pharaohlei ongshem shadenei kahdok shaokpü shingei hathü dungeishuoh” shei e.

¹⁰ Hapheikü jomphong kü, “Jeiyong Shembüpa, Israel Kahvangi hapakei enyüke” shei etuh: Ngei ngelei chongphobü Babylon ongpa Nebukadnezzar shomhen hatü hatouei ngei dungei tuhpü yaong shangkü büpai ong uoshing linghen, hatü büpai ongshem vehen.

¹¹ Büpai peiyei Ijip hahhen, dihen demtükpüthü dihen, wüpküpei daihen demtükpüthü wüpküpei daihen, mahhen demtükpüthü mahhen.

¹² Büpai Ijip amei kahvangthülei khümshem kü awi haptüktü jomei kahvangthü wüpküpei deilanghen. Mi yombü hüki ashak ngeihhahpü keiha büpai Ijip am yah-ei ngeihtü haleipü meishi layaongei daihen.

¹³ Ijip kahdok kü Heliopolislei nyupü yaong shemnyü büpai mangtükhen, hatü Ijip amei kahvang khümshemthü büpai awi haptükhen.