JEREMIAH 41 - DAÜLANGPÜ LAIHING (BSI)

Gedaliah Khüei Yaongpü

¹ Len nyetpabü kü Elishamalei cheha Nethaniah, Nethaniahlei cheha Ishmael, longli ongli sha kübü, ongpalei lakchongbü shopü khongkü hük Mizpahlei Ahikamei cheha Gedaliah touei shennyak an mütü pei. Jomphong Mizpahlei chemi hahyingei nyushing kü,

² Nethaniahlei cheha Ishmael hatü büpa mü nyupü shennyak ani Shaphanei cheha Ahikam, Ahikamei cheha Gedaliah kü baptü jütük.

³ Ishmaeli Gedaliah mü Mizpahlei nyupü Hebrew am peü hatü halei nyupü Babylon veshanthü jütük.

⁴ Gedaliah jütükpü nyihphei üpaiyao hapa jung mangnyingi,

⁵ shennyak büali thahshi jomei jumum kuptük, ashakviha shaaktük hatü jomei büm kü vettükkemtü Shekhem, Shiloh, hatü Samaria leipü hahying moila hatü ayingshü kotü Shembüpalei shemei moila shuohhen pei.

⁶ Hanangkü Nethaniahlei cheha Ishmael thepyaki Mizpah leipü hathü mü pongteihen heih. Büpa jomphong touei heih-ei, “Ahikamei cheha Gedaliah touei heihshah” shei e.

⁷ Mechem jomphong ching mongei shüpa, Nethaniahlei cheha Ishmael hatü büpa mü nyupüthüi hathü jütü kahshalei hüphong.

⁸ Shejao jomphong khong kü shennyak ani Ishmael kü, “Hamphong tejütük; mehenangkü hamei lakei wheat hah, barley, mainga hatü nyahjiü kahlei joshi nyüpeih” shei e. Hanangkü büpa hathü nejütüki yangei tuh.

⁹ Shaang Gedaliah hatü büpa mü nyupüthü jüei mahng hüphongpü kahshayü Asa ongpai Israel am Baasha ongpa mü hokshingkü shopü kahsha nyuteke. Nethaniahlei cheha Ishmaeli hapa kü mahngthü maei hüphong.

¹⁰ Ahikamei cheha Gedaliah kü veituh shei veshan mübü Nebuzaradan jeyei tuhphongpü Mizpah leipü nanglak peü hatü ongpalei yiükhathü peü Ishmaeli wüpküpei müei dai. Nethaniahlei cheha Ishmaeli hathü peü wüpküpei müei Ammon kahdok homei daihen layaong.

¹¹ Shejao mechem Kareahlei cheha Johanan hatü büpa mü nyupü veshan mübüthüi Nethaniahlei cheha Ishmaeli jüpü jung danpa,

¹² jomi jomei shennyakthü mütü Nethaniahlei cheha Ishmael mü hokhen dai. Jomi büpa phei changei daiyei Gibeon leipü yungkuk longpü shingei thahteke.

¹³ Mechem Ishmael mü nyupü shennyakthüi Kareahlei cheha Johanan hatü büpa mü nyupü veshanthü eepa, jomphong mongong.

¹⁴ Hanangkü Ishmaeli Mizpah leipü wüpküpei müei daipü shennyakthü nyokei Kareahlei cheha Johanan touei heih.

¹⁵ Shejao Nethaniahlei cheha Ishmael-ü büpa mü shennyak shet mütü nyaiyei Ammon kahdokei lüdai.

¹⁶ Ahikamei cheha Gedaliah jüphongtü Nethaniahlei cheha Ishmaeli Mizpah leipü wüpküpei müei lüdaipü shennyakthü peü Kareahlei cheha Johanan hatü büpa mü nyupü veshan mübüthüi aopü nanglakthü peü müei leilang. Veshanthü, nyühathü, hashihthü hatü ban tüktükpü shennyakthü peü Gibeon leipü müei leilang.

¹⁷ Jom Ijiplei dailem yemei Bethlehem yopailei Geruth-Kimhamlei yaongteke.

¹⁸ Mehenangkü jomi Babylon am kü nyem; mehenangkü hapa kahdok kü governor vaihen shingvaishi Babylon ongpai jeyei tuhpü Ahikamei cheha Gedaliah, Nethaniahlei cheha Ishmaeli jütükteke.