JEREMIAH 40 - DAÜLANGPÜ LAIHING (BSI)

Jeremiah Gedaliah mü Nyupü

¹ Veshan mübü Nebuzaradani Ramahlei büpa veyei deishih pheikü Shembüpalei shah Jeremiah touei pei. Büpai Jeremiahyü Jerusalem hatü Judah leipü wüpküpei peipüthü mü nyiamvüi shatü uoshi eeteke.

² Mechem veshan mübüi Jeremiah eepa, büpai büpa kü, “Shembüpa, ammei Kahvangi hapa shanghah-ü hapa shing kü shuohhen temtükpü khih,

³ hatü shaang büpai ha düknyu khih; büpai dükhen shei epükei shaang büpai ha dükteke. Hathü kemeiyü am nanglakthüi Shembüpa khüei mang thah, hatü büpalei ven nedanpü homei vampeih.

⁴ Shejao shinnyih ngei nüngei lak kübü nyiamvü laiphünyeih. Nüngi naei deihjema ngei mü Babylonei heihshah hatü ngei nüng kü junghen; shejao nüngi nemongjema teheihkei. Veituh, kahmük kemei nüng shing apei nyüke; nüng melei daihünya daituh” shei e.

⁵ Shejao Jeremiah daishekü, Nebuzaradani, “Shaphanei cheha Ahikam, Ahikamei cheha Gedaliah üpa jilathü kü Governor vaihen jepa, büpa touei leiyei nanglakthü mü nyutuh, nevaijü nüngi napü shingei daituh” shei e. Hapheikü veshan mübüi büpa kü hahying hatü thintho shuohtü leishih.

⁶ Hanangkü Mizpahlei nyupü Ahikamei cheha Gedaliah touei Jeremiah leiyei hapa kahdokei tuhphongpü nanglakthü mü nyuteke.

Judah amei Governor Gedaliah

⁷ Mechem Judah am lakchongbüthü hatü shakei nevami nyupü veshanthüi kahdok kü governor vaihen, hatü taopü nangkü Babylon wüpküpei nedei-i tuhpü nyüha, baha hatü hashih naüha peü shak kü veihen nangkü Babylon ongpai Ahikamei cheha Gedaliah jepüja shei danpa,

⁸ Jomi Mizpahlei Gedaliah touei pei Nethaniahlei cheha Ishmael, Kareahlei cheha Johanan, Tanhumethlei cheha Seraiah, Netophath am Ephailei hapeüthü, Maakath leipü Jezaniah hatü jomei veshanthü pei.

⁹ Shaphanei cheha Ahikam, Ahikamei cheha Gedaliah-i jomphong hatü jomei veshanthü kü lah-ei e, “Babylon am chongphohen ammi tenyem. Hapa kahdokei nyutuh; Babylon ongpa chongphotuh; shejema am meishi nyuhen.

¹⁰ Babylon am touei am leimao shei ngeiyü Mizpahlei nyunyeih; shejao amphongü yiü, betjük hatü olive mainga peü thaiyei tuhhahtuh, hatü ammi khüampü jilathü kü nyuei daituh.”

¹¹ Mechem Moab, Ammon, Edom hatü lebü kahmükthü peü kübü Hebrew ami Babylon ongpai Judah kahdokei shennyak aoei tuhpüja, hatü jom kü governor vaihen Ahikamei cheha Gedaliah jepüja shei danpa,

¹² jom peü Judah kahdok Mizpahlei Gedaliah mü pongteinüng laophü laophü yanei nyupü shing leipü lei, hatü jomi yiü hatü betjük changshi dangteke.

¹³ Kareahlei cheha Johanan hatü büpalei veshanthü peü Mizpahlei Gedaliah touei peiyei,

¹⁴ büpa kü, “Nethaniahlei cheha Ishmael-ü nüng jühen shingvaishi Ammon amei ongpa Baalis-i shompü nenyingpü je?” shei e. Shejao Ahikamei cheha Gedaliah-i ha kü hingnelem.

¹⁵ Hapheikü Kareahlei cheha Johanani Mizpahlei Gedaliah touei joei peiyei, “Ngei daiyei Nethaniahlei cheha Ishmael jütükshah, üpaiyao ha nenyingpih. Mehekei büpai nüng jühenang hatü nüng shonei nyupü Hebrew am yanhen hatü Judahlei aoei nyupüthü mahhenang?” shei e.

¹⁶ Shejao Ahikamei cheha Gedaliah-i Kareahlei cheha Johanan kü, “Henüng dou tedük! Nüngi mehe Ishmael nang enya, hayü jiüpü nevaipih” shei e.