JEREMIAH 4 - DAÜLANGPÜ LAIHING (BSI)

Mong Lephen Nyükpü

¹ Am mong lepei leijema, Oh Israel, ngei touei am lepei leijema, Ammi ngei toueipü jiühitnalai dou yaktükjema, hatü neleplüki nyujema,

² hatü ammi, shahhing kü, hingshangpü, daülangpü kü, “Vanyangyem Shembüpa!” shei lahjema, büpai jatthü kü moihimanhen, hatü büpa kü jomi vih-eilühen, shei Shembüpai enyüke.

³ Mehenangkü Shembüpai Judah nanglakthü kü hatü Jerusalemei nyupüthü kü hapakei enyüke: “Han manghokpü kahdok kü han hokei daituh, hatü hüh chi kü sheili tehai.

⁴ Shembüpa touei am shuw japtüktuh, ammei mongdang kübü shuw japtüktuh, Oh Judah nanglak hatü Jerusalemei nyupüthü, hei nevaijema ammi dükpü mang nangkü, ngelei mongshih aw kei vamhen, hatü ha üpaiyao nemetaokhen.”

Judah am Hahtükhen shei Nyemshaopü

⁵ Judahlei leneishuoh, Jerusalemei baongeishuoh, Kahmük kempülei amit vüngtuh, wongmü lenei etuh, “Thaikemtuh, hatü penyü showtükpü chingnyü mongei shütuh” shei etuh.

⁶ Zion lemei dailem hueishuoh, nepheidai-i yanglem yemei nyaidaituh, mehenangkü ngei apshaphi leipü shanghah, hatü benpülangpü koei peikünyeih.

⁷ Yingnyü leipü mailang hük vamei daitih, jatthü mangteipü hük laoei daitih; büpa laophülei shing leipü, kahdok lavüngtoiyei tuhhen; shennyak nyuhen neshiüi chingnyüthü mahtükhen vamei lüdaitih.

⁸ Hanangkü dhoila ashak ümtü, “Shembüpa mangshi mongshihpü jen toueipü nelüdaiang” shei theptuh hatü youngtuh.

⁹ Hapa nyih kü ongpa hatü lakchongbüthü mongpeyao dohdaihen; ngongpathü nyemdaihen hatü thibüthü handaihen shei Shembüpai enyüke.

¹⁰ Hahepak kü ngei, “Ah, Shembüpa Kahvang, üng kü yani jeshi tuhtü, ‘Am shingvaishiyü meishasha hih’ shei eshi mekei etü nüngi hapa nanglak hatü Jerusalem lueilemtüknya” shei e.

¹¹ Hahepak kü hapa nanglak hatü Jerusalem am kü hapakei ehen: Bhih kahdok shangchingthü leipü nyahpüshampü vanglük ngelei nanglakthü lemei lükteke; hapayü hahbhang shaptükhen nangkü nevai;

¹² ha shingvaishi ahshi wong kohshi. Jom khüei shahphenpeyü ngei hih.

¹³ Veituh! Büpa phum kei peikünyüke, büpalei koyei khari alüngleple kei; büpalei koyeithü alang mao shülangpüba peikünyüke– onyükei, jenü mahdainyu khih!

¹⁴ Oh Jerusalem, am yanghen shingvaishi ammei mongdang leipü mang daütüktuh. Meshük lushi ammei mongei küpjan ten nyuiyei tuhhenang?

¹⁵ Dan leipü ngeü hüki enyüke, hatü Ephraim Kahshang leipü shanghah hük baongnyüke.

¹⁶ “Jom halei nyüke!” shei jatthü kü etuh; Shümei yahhen am tailu kahdok leipü peikünyüke shei Jerusalem kü baongeishuoh; jomü Judah chingnyüthü khüei lennyüke.

¹⁷ Jomü kah yompü am kei shinei thainyüke; mehenangkü pinnyüi ngei khüei yaongteke, shei Shembüpai enyüke.

¹⁸ Ammei nyuhichong hatü ammei dükhiling homei ha koei leihahpü khih. Hayü ammei shanghah; hapayü shahyaki! Hapai ammei mongdang kü hümnyüke.

Jeremiah-i Nanglakthü Nangkü Mongshangpü

¹⁹ Ngelei mongshang, ngelei mongshang! Mongdang bhaohen mü tüngnyüke! Oh, ngelei mong kü mongshang! Ngelei mongdang tuknyüke, hatü ngei nenmü nenyuaoknyu. Mehenangkü ngei amit vüngpü dannyüke, hatü thep nyükpü ngei dannyüke.

²⁰ Shanghah kü shanghah dheanei, kahmük kemei lavüngtoiyei leidaiteke. Ngangahük kü ngelei ashakshem; kanja mong aa kü ngei loishing bendaiteke.

²¹ Meshük lushi ngei vehok vampü eehen? hatü amit vüngpü ngeü danhen?

²² Ngelei nanglakthüyü ngapathü khih; jomi ngei nenyingnyu. Jomü sholi neshiüpü hashihthü; jom kü danaokpü neshiü. Jomü ten dükhen longi manpüthü, shejao mei dükhen nenyingnyu.

²³ Ngei kahdoknyü kü veiteke, hatü hapayü meheyao nekohpü shingkong, hatü kong mon shiüteke; vangshothü kü veiteke, shejao haleiyao vangngai neshiü.

²⁴ Ngei kahshangthü kü veiteke, hatü veituh, hathüyü jenleyei nyuteke, shangchingthü haleipü halei shei shinteiyei nyuteke.

²⁵ Ngei veishingkü halei shennyakthü nenyu, shangouhathü peü pidaitü nyuteke.

²⁶ Ngei veishingkü kahcheü kohpü kahdokü bhih kahdok leidaitü nyuteke; Shembüpa touei, büpa mongshihpü touei haleipü chingnyüthü kemei bentüktü nyuteke.

²⁷ Shembüpai hapa enyüke: “Ngei hapa chemjalak kü nemangjao, hapa kahdok kemei lavüngtoiyei leihen.”

²⁸ Hanangkü kahdoknyüi mahng thephen, vangsho shangpa mangh-ei leidaihen; mehenangkü ngei mehe etüktepa, ha kübü neyeiyahen; ngei mehe temtük, ha nyokei neleilanghen.

²⁹ Koyei veshan hatü phung nopüthülei ngeü kü jilathü kemei nyaidainyüke; jom phaüyingei shüdaikemnyüke, yaongnyü kü bakei aongnyüke; jilathü kemei tuhphongteke, üpayao halei nenyu.

³⁰ Oh ching nyaipü am, am mehe düknya? Mehekei ammi ow hakla hatü hon-ow ownya? Mehekei ammi mük kü long nyiotü, ammei mükkam longhünya? Angsha kü am nela lingteinyu khih. Ammei chühimaithüi am yakphongteke; jomi am jühen yemnyüke.

³¹ Nyüha hük aokvomi tüngjü vaüpükei, hatü hashongpa angshingkü theppükei, “Ngeiyü onyükei! vepa touei ngei mahdainyu khih!” shei lak haongshi, ngü duwshi Zion nela theppü dannyüke.