JEREMIAH 37 - DAÜLANGPÜ LAIHING (BSI)

Zedekiah-i Jeremiah kü Phepü

¹ Babylon ongpa Nebukadnezzari Josiahlei cheha Zedekiah Judah kü ong vaihen shingvaishi Jehoiakimei cheha Jehoiakin kü jeiyei jeteke.

² Jeremiah thibü homei epü Shembüpalei shah kü büpa nevaijü lakchongbüthü nevaijü nanglakthüi mong neshuoh.

³ Zedekiah ongpai Jeremiah touei hapa shahjang koei Shelemiahlei cheha Jehukal mü Maaseiahlei cheha Zephaniah ngongpa shom: “Hamphong shing chingmeilemlingei Shembüpa, jenei Kahvang kü phopshih.”

⁴ Shaang Jeremiahyü nanglakthü touei longteihen aokshi nyu; mehenangkü büpa khoklat kü mangshü-i nyu.

⁵ Ijip leipü Pharaohlei veshanthü viong homei peikünyükeja shei danei Babylon am Jerusalem shümei nyupü kübü jom nyokei leidai.

⁶ Hahepak kü Shembüpalei shah Jeremiah thibü touei pei:

⁷ Shembüpa, Israel Kahvangi hapakei enyüke: Ngei kü shah phehen nangkü anji shompü Judah ongpa kü ha etuh; nüng kü sheühhen nangkü viong peih-ei heihküpü Ijip amü shao jomei kahdok yemei leidaihen.

⁸ Babylon am nyokei leikahen hatü hapa chingnyü khüei jom hokhen hatü ha kü awi haptükhen.

⁹ Shembüpai hapakei enyüke: “Babylon am nyokei leidaiphahen” shei eshi nüngi laophü nyingi telutelemhah; mehenangkü jom nyokei neleidaiphapih.

¹⁰ Am khüei hokpü Babylon veshan kemei kü ammi neüshuohjao, hatü hapa ashakshemei aokhahmashapü mon aoei nyujao, jom yaongei hapa chingnyü awi haptükhen.

¹¹ Pharaohlei veshanthü ngoijapü danei Babylon am veshanthü Jerusalem leipü leidai.

¹² Jeremiah-i hapa chingnyü tuhphongtü Benjamin kahdok yemei büpalei nanglakthü leipü büpalei mophimo phaihan yahhen leiteke.

¹³ Shejao mechem büpa Benjamin Peshaden ngoipa, Hananiahlei cheha Shelemiah, Shelemiahlei cheha Irijah, veshan mübü peiyei Jeremiah yeptü, “Nüngü Babylon am tuhphongnyu khih” shei e.

¹⁴ “Hapakei nevaipih! Ngei Babylon am tuhphongnyu nevai” shei Jeremiah-i e. Shejao Irijah-i büpai epü kü nebangi büpai Jeremiah yepei lakchongbüthü touei müei dei.

¹⁵ Jomphongi Jeremiah kü mongshih-ei üpteke hatü laknyangbü Jonathanei shemei khoklat vaishi halei küpphongteke.

¹⁶ Jeremiahyü kahsha mongei küptü hepak luangi tuhphong.

¹⁷ Hapheikü Zedekiah ongpai büpa yahnüng deishih-ei ongshemei müei lei, hatü ongpai joei büpa kü, “SHEMBÜPAleipü peipü shah meheyao nyüla?” shei phe. Jeremiah-i “Nyüpeih!” shei e. Hahepak kü büpai, “Nüngü Babylon ongpa kü shuohtükhen” shei e.

¹⁸ Shao Jeremiah-i Zedekiah ongpa kü, “Nüngi ngei khoklat kü küphen mü ngei nüng kü nevaijü nüngei lakchongbüthü nevaijü nanglak kü mehe ten dükphopa?

¹⁹ Nüng kü, ‘Babylon ongpai nüng nevaijü hapa kahdok khüei nehokpih’ shei teteivanei epü thibüthü melei daipa?

²⁰ Shejao shaang ngelei shembü, ongpa, nüngi chingmeilemlingei ngei khümei epü kü banglangshih. Ngei nüng kü khümei ha enyeih: Ngei laknyangbü Jonathanei shemei dihen mü büpalei shemei nyokei teleishih.

²¹ Hanangkü Zedekiah ongpai ngeükhüam shuoh, hatü jomphongi Jeremiah ongshem yombü veshanthülei shemei küpei tuh; hatü jomphongi büpa kü aan oukpü shem leipü aan nyihjeih ühteke. Hapa keiha Jeremiah ongshem yombü veshanthülei shemei küpei tuh.”