JEREMIAH 36 - DAÜLANGPÜ LAIHING (BSI)

Barukhi Phopshemei Laidü Iepü

¹ Josiahlei cheha Jehoiakimi Judah kü ong vaipü bong alipabü kü SHEMBÜPAleipü hapa shah Jeremiah touei pei:

² “Laidü hük yahtuh hatü ngei Israel, Judah hatü lebü jatthü nangkü Josiah-i vanglem lempü hepak kübü eyei heihdaipü shinnyih thahshi etükpü shahthü peü ha kü nyangtuh.

³ Üpai nyingpa, mechem Judah ami ngei jom kü shuohhen shei tempü shanghah jung danhenshang, jom peüi jomei mang lemthü kübü mong lephen aokpeih; hapakei vaijema ngei jomei mang hatü jomi shaitükpü mang peü tükhen.”

⁴ Hahepak kü Jeremiah-i Neriahlei cheha Barukh kü nyük, hatü mechem Shembüpai eshuohpü shahthü peü büpai shah mü eshuohpa, Barukh-i hathü shah laidü kü nyang.

⁵ Hapheikü Jeremiah-i Barukh kü, “Ngei kü phopshemei tedai shei khüamnyüke;

⁶ hanangkü nüng dangkao shüaeiyunglepü nyih kü daituh, hatü ngei ju mü epü kü nüngi nyangpü Shembüpalei shah nanglakthüi danshi iejatuh, hatü shao jomei jila leipü aongpü Judah am peü danshi iejatuh.

⁷ Üpai nyingpa, Shembüpalei mongshih longpü hapa nanglak khüei shuohhen shei baongpü nangkü jomi Shembüpa touei mang lah-ei jom mang lem kübü mong lepei leikahen aokpeih” shei e.

⁸ Neriahlei cheha Barukh kü Jeremiah thibüi eshuohpü lemphüli dük; phopshemei büpai hapa laidü kübü Shembüpalei shahthü ie.

⁹ Josiahlei cheha Jehoiakimi Judah kü ong vaipü bong nga mü lenyang shüpabü kü Jerusalem nanglak hatü Judah jilathü kübü peipüthü peü shingvaishi Shembüpa touei shüaeiyungleyei phophen ngeükhüam shuoh.

¹⁰ Nanglak peüi danshi Barukh-i Shembüpalei shem Shaden Ja touei jaandokei nyupü Shaphanei cheha laknyangbü Gemariahlei dungnukei yaongtü Jeremiah-i epü shah Shembüpalei shemei ha ieteke.

Ongshemei Laidü Iepü

¹¹ Mechem Shaphanei cheha Gemariah, Gemariahlei cheha Mikaiah-i Shembüpalei shahthü hapa laidü leipü iepü danpa,

¹² büpai ongshemei laknyangbülei dungnukei yiü; halei lakchongbüthü peü uoshi nyuteke: Laknyangbü Elishama, Shemaiahlei cheha Delaiah, Akhborlei cheha Elnathan, Shaphanei cheha Gemariah, Hananiahlei cheha Zedekiah jom peü nyuteke.

¹³ Barukh-i nanglakthü peü danshi laidü leipü iepü shahthü büpai danpü kemei Mikaiah-i jomphong kü ejateke.

¹⁴ Hahepak kü lakchongbüthü peüi Barukh kü ha ehen shingvaishi Kushilei cheha Shelemiah, Shelemiahlei cheha, Nethaniah, Nethaniahlei cheha Jehudi shomei, “Nüngi nanglak peüi danshi iepü laidü yah-ei heihkei” shei e. Hanangkü Neriahlei cheha Barukh-i hapa laidü notü jomphong touei pei.

¹⁵ Jomphongi büpa kü, “Uotü ham kao ha iekütuh” shei e. Hanangkü Barukh-i jomphong touei ha ie.

¹⁶ Mechem jomphongi hathü shah danpa, jomphong hüki hük lemei nyemyaki veiteitü Barukh kü, “Jeni hingmei hathü shah ongpa kü ejahen vaipü khih” shei etei.

¹⁷ Hapheikü jomphongi Barukh kü, “Nüngi hathü shah mekei nyangpa, eshih. Hayü Jeremiah-i jui epha-i nyangpü hiang?” shei phe.

¹⁸ Barukh-i, “Hih, hathü shah kemei büpai jui epha-i ngei hapa laidü kü shiai yah-ei nyangpeih” shei e.

¹⁹ Hahepak kü lakchongbüthüi Barukh kü, “Jeremiah anji daiyei jodaituh. Anji melei nyu, üpaiyao tenyinghü” shei e.

Ongpai Laidü Jaktükpü

²⁰ Jomphongi hapa laidü laknyangbü Elishamalei dungnukei tuhphongtü ongpalei shahphen shingei heih-ei büpa kü lemphü ejateke.

²¹ Hapa laidü yahhen ongpai Jehudi shom hatü Jehudi-i laknyangbü Elishamalei dungnuk leipü hapa laidü leiyei ongpa hatü büpa touei yaongpü lakchongbüthü touei ha ieteke.

²² Hapayü lenyang shüpabü nyu hatü wohongpü hepak vaipü nangkü wohongpü hepak kü nyuteipü shemei dük kü aw jaktü uoshi nyu.

²³ Mechem Jehudi-i laipha jem ali iepa, ongpai longkhoih yah-ei vetvettü hapa laidü kemei aw kü jaktük

²⁴ Ongpa hatü büpalei lakchongbüthüi hathü shah dantü nyemei nedeih, nevaijü jomei ashak neshaaktük.

²⁵ Elnathan, Delaiah hatü Gemariah hathüi ongpa kü ha laidü aw kü tejaktük shei khümei ejao büpai hathüi epü nebang.

²⁶ Ha nangjei, ongpai Jerahmeel ongpalei hapeü hük, Azrielei cheha Seraiah hatü Abdeelei cheha Shelemiah hathü kü Barukh nyangbü hatü Jeremiah thibü nyi yeptuh shei shahkung shuoh. Shejao Shembüpai jiji jotük.

²⁷ Jeremiah-i jui epü shah Barukh-i nyangpü laidü ongpai aw kü jaktükphei kü Shembüpalei shah Jeremiah touei pei:

²⁸ Lebü laidü hük yahtuh hatü Judah ongpa Jehoiakimi aw kü jaktükpü shongpü laidü kü nyupü shahthü peü halei nyangtuh.

²⁹ Shao ongpa Jehoiakim kü Shembüpai hapakei enyüke shei etuh: Nüngi hapa laidü jaktüktü, “Mehekei nüngi Babylon ong peiyei hapa kahdok mangtüktü haleipü nyüha baha hatü yemhimak kemei jütükhen shei nyangpa?” shei eteke.

³⁰ Hanangkü Judah ongpa Jehoiakim nangkü Shembüpai hapakei enyüke: Büpa kü jeiyei David ong uoshing kü uohen hahimoi hükao nenyuhen, hatü büpalei mahngü nyihnüng vanghenyü sham kü hatü yanüng vangsho nyien kü haihühen mü noei deiyei yakphonghen.

³¹ Ngei büpa, chehathü hatü büpalei lakchongbüthü jomei mang nangkü hanghihühen; ngei Jerusalemei nyupüthü hatü Judah nanglak kü ngei shuohhen shei epü shanghah peü koei peihen, mehenangkü jomi ngei epü nebangpeih.

³² Hanangkü Jeremiah-i lebü laidü hük yah-ei Neriahlei cheha Barukh laknyangbü kü shuoh, hatü Jeremiah-i ju mü eshuohshingkü Barukh-i Judah ongpa Jehoiakimi aw kü jaktükpü laidü leipü shahthü peü nyang. Shao hapa mü leteipü shahthü longi üei nyang.