JEREMIAH 35 - DAÜLANGPÜ LAIHING (BSI)

Jeremiah hatü Rekhab am

¹ Josiahlei cheha Jehoiakimi Judah kü ong nyushi SHEMBÜPAleipü shah Jeremiah touei hapakei peiteke:

² Rekhab am phang touei heihtuh, hatü Shembüpalei shem dungnuk hükei heihkahen eyeishuoh hatü jom kü yiü yinghen shuohtuh.

³ Hanangkü ngei Jeremiahlei cheha, Habazziniahlei chehü Jaazaniah hatü büpalei jeihinaüthü hatü chehathü hatü Rekhab am shem kemei mühen heih.

⁴ Ngei jomphong Shembüpalei shemei Kahvang shennyak Igdaliahlei cheha Hananei chehathülei dungnukei müei dei. Hapayü lebü lakchongbüthülei dungnuk kü dhienei nyu, hatü phopshem shaden yombü Maaseiah, Shallumei chehalei dungnuk dok kü nyuteke.

⁵ Hahepak kü ngei chilimji kü yiü maei shihtü ha kü pati shei Rekhab am phang shennyakthü touei haitü, “Yiü maani yingtuh” shei e.

⁶ Shejao jomi e, “Ham yiü neyingnyih; mehenangkü hamei bühipa Rekhabei cheha Jonadabi hapa shahkung yahphopeih: ‘Am nevaijü ammei hühihathüi yiü teying,

⁷ shao ammi shem teve, sheili teshei, nevaijü nyalingngupai teshei; ammi hathü dou te-ang shejao düngei ashakshem kü nyutuh. Shejüang am shing nelingi longteipü kahdok kü hepak luangi nyuaokhen.’

⁸ Hamei bühipa Rekhabei cheha Jonadabi ephopü shahkung peü bangtepih; hami nevaijü hamei nyüha hapeüthüi yiü chemao neying,

⁹ nevaijü nyuhen shem neve, nevaijü nyalingngupai kah nevaijü kahthü neling nevaijü sheili nesheiangpih.

¹⁰ Ham ashakshem kü nyuei heihpeih, hatü hamei bühipa Jonadabi epü shahkung lemphü bangei heihnyüpeih.

¹¹ Shejao mechem Babylon ongpa Nebukadnezzari hapa kahdok neütükpa, hami, ‘Kei, jeni Babylon hatü Aram amei veshanthü kübü yanghen shingvaishi jen Jerusalemei daishah shei eteitü heih-ei ha Jerusalemei nyuei dainyüpeih’ ” shei eteke.

¹² Hapheikü Shembüpalei shah Jeremiah touei hapakei eyei pei:

¹³ “Jeiyong Shembüpa, Israel Kahvangi hapakei enyüke: Daituh hatü Judah hatü Jerusalem nanglakthü kü hapakei etuh: ‘Amphongi ngei nyuhpü hatü ngei epü nebanghen je?’ shei Shembüpai enyüke.

¹⁴ Rekhabei cheha Jonadabi büpalei hapeüthü kü yiü neyinghen ngeükhüam shuohteke hatü ha shahkung noteiyei dainyüke. Shinnyih thahshi jomi yiü neyingnyu; mehenangkü jomi chebü chepalei shahkung bangnyüke. Ngei am kü leiyei leiyei ephei hih shejao ammi ngei epü nebang.

¹⁵ Leiyei leiyei ngei chongphopü thibüthü am touei shompeih, hatü jomi am kü, ‘Am peü laophülei mang lemthü kübü mong leptuh hatü ammei dükhiling yeiyatuh, hatü lebü kahvangthü chongphoei ha pheikü temü. Shejüang am hatü ammei bühipa kü shuohpü kahdokei nyuaokhen’ shei eteke. Shejao ammi ngei epü kü mong neshuoh nevaijü ha nebang.”

¹⁶ Rekhabei cheha Jonadabei hühihathüi jomei bühipai eshuohpü shahkung peü noteiyei heihteke, shejao ha nanglakthüi ngei epü nebang.

¹⁷ Hanangkü Jeiyong Shembüpa Kahvang, Israel Kahvangi hapakei enyüke: Ngei Judah hatü Jerusalemei nyupüthü peü kü jom kü shuohhen shei epü shanghah shuohhen; mehenangkü ngei jom kü ephei shejao jomi nebang, ngei jom kü nyükjü jomi nejangnyu.

¹⁸ Shejao Rekhab am nangkü Jeremiah-i hapakei eteke: Jeiyong Shembüpa, Israel Kahvangi hapakei enyüke: Ammi ammei bühipa Jonadabi epü bangei büpai epü shahkung peü dükei büpai epü peü jiüshi dükpü nangkü,

¹⁹ Jeiyong Shembüpa, Israel Kahvangi hapakei enyüke: Rekhabei cheha Jonadabi ngei touei düngei chongphohen nangkü büpalei hühiha mechemao taoei nenyupih.