JEREMIAH 34 - DAÜLANGPÜ LAIHING (BSI)

Zedekiah Touei Shahjang Hük

¹ Mechem Babylon ongpa Nebukadnezzar hatü büpalei veshanthü hatü büpalei ongching phang kübü nanglakthüi Jerusalem hatü hapa kü shonpü jilathü khüei hokei nyupa, Shembüpa leipü hapa shah Jeremiah touei peiteke:

² Shembüpa, Israel Kahvangi hapakei enyüke: “Shembüpai hapakei enyüke shei Judah ongpa Zedekiah touei peiyei etuh: Ngei hapa chingnyü Babylon ongpalei lak kü shuohtükhen, hatü büpai ha awi haptükhen.

³ Nüng büpalei lakmong kübü neyangaokpih, shejao hingmei hahtükhen hatü büpalei lak kü shuohtükhen; nüngi Babylon ongpa nüngei müki lekei eehen, hatü büpa mü dhe dhe gongei eteihen; nüng Babylonei daishasha.

⁴ Shejao Oh Judah am Zedekiah ongpa, Shembüpalei shah bangtuh! Nüng nangkü Shembüpai hapakei enyüke: Nüng yani nemahhen;

⁵ meishi-üng nyuei dimei mü dihen. Mekei ambü ampa, nüng she kübü ongthü kü dhüm shuoh-ei ayingshü jakpa, hapa keiha nüng dishing kao dhüm shuoh-ei ayingshü jakei, ‘Onyükei, hamei ongpa’ shei mahng thephen. Mehenangkü ngei ha etüktih shei Shembüpai enyüke.”

⁶ Hahepak kü Jeremiah thibüi hathü shah Jerusalemei Judah ongpa Zedekiah kü e.

⁷ Hahepak kü Babylon ongpalei veshanthü Jerusalem khüei hatü lebü Judah jilathü mü Lakhish hatü Azekah nyiyao omshi hah-ei nyuteke; Judah kü penyü showtükpü chingnyüthü mon aoei nyuteke.

Aathü kü Lueilemei Dükpü

⁸ Aathü peü kü bümei hean shuohhen shei Zedekiah ongpai Jerusalem nanglakthü mü vangpüshuwpü lingpheikü Shembüpalei shah Jeremiah touei peiteke.

⁹ Hebrew am aathü, nyüha baha peü bümei leihühen; jempü Hebrew am aa vaishi netuhhen vaipü khih shei eteke.

¹⁰ Hanangkü lakchongbüthü hatü nanglak peüi nyüha baha aathü peü hükao aa kei netuh-i bümei hean shuohhen shei vangeishuwteke. Jomi mongteitü bümei hean shuoh.

¹¹ Shejao hapheikü jomi mong yeiya, hatü jomi bümei hean shuohtükpü aathü shao yah-ei leiyei aa leihü.

¹² Hahepak kü Shembüpalei shah Jeremiah touei peiteke:

¹³ Shembüpa, Israel Kahvangi hapakei enyüke: Aa vaiyei nyupü Ijip kahdok leipü ngei ambü ampa müei leishing kü ngei jom mü vangpüshuwpü lingpeih. Ngei jom kü,

¹⁴ “Jempü Hebrew am laophü nyingi am kü aa vaihen yuphaei nyujema vangbong nyet lompü ieyei kü hapa aa bümei hean shuoh-ei vetüktuh. Büpai bong vok chongphophei keyü bümei leiyei deishihtuh.” Shejao ambü ampai ngei epü nebang nevaijü mong neshuoh.

¹⁵ Yopai-iang am mong lepei ngei touei mehe jiü, ha dükteke; am peüi laophülei jempü shennyak kü bümei hean shuohteke, hatü ngei kü khümpü phopshemei ngei touei vangeishuwteke.

¹⁶ Shejao shaang ammi ha kübü nyokei leiyei ngelei men sheihtükteke, hatü nyüha, baha aathü jomi mongpülei daihen ammi bümei hean shuohtükpüthü shao nyeanei aa leihüpeih.

¹⁷ Hanangkü Shembüpai hapakei enyüke: Ammi ngelei shah nebang; amphongi jempü Israel am kü bümei hean neshuohpü nangkü shaang ngei am kü bümei hean shuohnyeihhapa bümei heanü yan, cham hatü münghishaü homei mahhen shuohnyeih shei Shembüpai enyüke. Ngei amphongü kahdoknyü jatthü peü touei jiühitbenüng leihühen.

¹⁸ Üami ngelei vangpüshuwpü mangtük, hatü jomi ngei touei lingpü vangpüshuwpü nedük, ngei hathü keyü jomi mohoh cheha nyi anshi kaktü ha aa kü jom kamei deipükei linghen.

¹⁹ Judah hatü Jerusalem kü mübüthü, ban tüktükpüthü, ngongpathü, hatü kahdok kü nyupü nanglakthü üami ha aa kü peih-ei kamnya,

²⁰ hathüyü jom jühen yempü vepathü kü shuohtükhen. Jomei mahmahng peü asha alang hatü yemhimakthülei phai vaihen.

²¹ Judah am Zedekiah ongpa hatü büpalei lakchongbüthü peü jom jühen yempü vepathü kü shuohtükhen. Am jühen kübü doh-ei nyupü Babylon ongpalei veshanthü kü shuohtükhen.

²² Ngei ngeükhüam shuohhen, hatü ngei hathü hapa chingnyülei müei leihen shei Shembüpai enyüke. Jomi ha khüei hokhen, kaamei yahhen hatü awi haptükhen. Üpaiyao nenyuaokhen mü ngei Judah jilathü lavüngtoiyei tuhphonghen.