JEREMIAH 32 - DAÜLANGPÜ LAIHING (BSI)

Jeremiah-i Kah Hük Shakpü

¹ Hapayü Judah kü Zedekiah-i ong vaipü bong anpabü kü, hatü Nebukadnezzar ong vaipü bong anpüshetpabü kü Jeremiah touei peipü Shembüpalei shah.

² Hahepak keyü Babylon ongpalei veshanthüi Jerusalem shümei yahtü nyu, hatü Jeremiah thibüyü ongshem yompü veshanthülei shemei küpshi nyu.

³ Judah ongpa Zedekiah-i Jeremiah yepei khoklat kü hapakei epü nangkü küpteke, “Nüngi hapakei teteivanei epeih, ‘Shembüpai hapakei enyüke: Ngei hapa chingnyü Babylon ongpalei lak kü shuohtükhen hatü büpai ha hahtükhen.

⁴ Babylon ongpalei lak kübü Judah ongpa neyangaokpih, shejao hingmei Babylon ongpalei lak kü shuohtükhen, hatü büpa mü dhe dhe gongei eteihen hatü büpalei müki lekei büpa eehen.

⁵ Büpai Zedekiah Babylonei müei deihen, hatü ngei büpa mü mangetei thahshi büpa halei nyuhen shei Shembüpai enyüke. Nüngi Babylon am mü hokjao neneüpih.’ ”

⁶ “Shembüpalei shah ngei touei peiküpeih” shei Jeremiah-i e:

⁷ Ampa naü-eepa Shallumei cheha Hanameli nüng touei, “Anathoth leipü ngelei kah shaktuh; mehenangkü shem am vaipü nangkü nüngi hapa kah shakhen jiüpeih” shei eshi peikahen.

⁸ Hapheikü Shembüpai ephopü keiha veshanthülei shemei Hanamel peiyei ngei kü, “Benjamin kahdok Anathoth leipü ngelei kah shaktuh, mehenangkü nüngi laophü shing hapa shakei noteihen jiüpeih” shei ephüteke. Haphei küang hapayü Shembüpai epü khih shei ngei nying.

⁹ Hanangkü ngei Anathoth leipü Hanamelei kah shak hatü hapa kü ngin anpünyet ieyei shuoh.

¹⁰ Ngei hapa shakpü kü nyangteiyei füoshang shingei, denpü yah, hatü lop ieyei shuoh.

¹¹ Hapheikü ngei hapa dou shakpü lai yahdükhen linghen vanglem nyangpü lai phahük füoshang shingtüktü, hatü shao füoshang neshingpü lai phahük yah-ei,

¹² Neriahlei cheha, Mahseiahlei chehü Barukh kü Hanamel, dou shakpü kü denpü shuoh-ei füoshang shingpüthü hatü veshanthülei shemei uoshi nyupü Judea am uoshi nyushi ngei ha shuohteke.

¹³ Hathü nyushi ngei Barukh kü e,

¹⁴ “Jeiyong Shembüpa, Israel Kahvangi hapakei enyüke: Hathü dou shakpü lai füoshang shingpü hatü füoshang neshingpü kemei yah-ei hepak luangi nemangi nyuhen shingvaishi haümdük kü shihtü tuhtuh.

¹⁵ Mehenangkü Jeiyong Shembüpa, Israel Kahvangi hapakei enyüke: Hapa kahdok kü shao shemthü, kahthü hatü nyalingngupai kahthü shakhen.”

Jeremiah-i Phoppü

¹⁶ Neriahlei cheha Barukh kü ngei dou shakpü lai shuohpheikü ngei Shembüpa kü phop.

¹⁷ “Oh Jeiyong Shembüpa, nüngei ngan hatü laklu wong longpai kahdok hatü vangshothü lingpeih. Nüng shingvaishi wongpü meheyao neshiü.

¹⁸ Nüngi haja longi kü bamnyeih, shejao nyühipalei mang nangkü jomei hapeüthü kü nüngi hanghi shuohnyeih, Oh longpü hatü wong kohpü Kahvang, nüngei menü Jeiyong Shembüpa,

¹⁹ nüngi kon kohpü hatü nüngei dou peü yashanshi; nüngei müki hangkulei lemthü peü kü veishi nyüke, hatü peü kü laophülei lem hatü laophüi dükpü kübü betjük shangshi nüngi laklei shuohnyüke.

²⁰ Nüngi Ijiplei yashanyale hatü nyangeihepü huteke, hatü shinnyih thahshi Israel hatü hangkuli peü kü nüngei men nedoh-i nyupü nyinghüteke.

²¹ Nüngi Israel am Ijip leipü nyangeihepü, yashanyale, laklu wong longpai hatü nyempühanpü longpü hutü müei leipeih.

²² Nüngi chebü chepa kü amma hatü nyahjiü mon yenpü kahdok shuohpeih.

²³ Jom peiyei hapa kahdok kaamei yahpeih shejao jomi nüngei ven nebang hatü nüngei shahkung kü nemü; jom kü nüngi düktuh shei epü nedük. Hanangkü nüngi jom kü hathü shanghah koei peipeih.”

²⁴ Veituh, Babylon ami hapa chingnyü shümhen dü daknyüke. Yan, münghishaü hatü chamhilemi hapa hahhen nyupü Babylon am kü shuohtükhen. Nüngi mehe etepa, ha vampü shaang nüngi eenyüke.

²⁵ Shejao Oh Shembüpa Kahvang, hapa chingnyü Babylon am kü shuohtükhen mü nyujao nüngi ngei kü, “Denbüthü eeshi kah shaktuh” shei ngei kü eteke.

²⁶ Hahepak kü Shembüpalei shah Jeremiah touei pei.

²⁷ “Ngeiyü Shembüpa, hangkuli kemeilei Kahvang. Ngei neaokbenüng mehe shangkü nyüpü je?

²⁸ Hanangkü Shembüpai hapakei enyüke: Hapa chingnyü hahhen nyupü Babylon am hatü Babylon ongpa Nebukadnezzar kü hapa chingnyü shuohtükhen.

²⁹ Hapa chingnyü khüei hokpü Babylon am peiyei awi haphen, hatü ngei mongshihhüei Baal kahvang kü shem adokei ayingshü jakei khümpü hatü lebü kahvangthü kü yiü moila shuohteipü shemthü awi haptükhen.”

³⁰ Israel hatü Judah nanglakthü lebü meheyao nedüki jom nethe hepak mebü mang mon thahpeih; Israel nanglakthüi lebü meheyao nevai shejao jomei lakdoui ngei mongshihhüpeih shei Shembüpai enyüke.

³¹ Hapa chingnyüi ngei lingei tuhpü nyih kübü shinnyih thahshi ngei mongshih vamhüpeih; hanangkü ngei toueipü hapa nüngtükhen,

³² mehenangkü Israel hatü Judah nanglakthü mü jomei ongthü, lakchongbüthü, ngongpathü, thibüthü, Judah shennyakthü hatü Jerusalemei nyupüthülei mangi ngei mongshihhüpeih.

³³ Jomi ngei kü jomei dhe nemee, dok leppeih; ngei düngei jom kü nyuhjao jomi ha nebang nevaijü ngei ungei-aeipü phangkü neshüpeih.

³⁴ Ngei kü khümhen vepü phopshem jomi jiühitnalaipü lajeithü tuh-ei jomi ha sheihtükpeih.

³⁵ Jomi Molekh kahvang kü jomei hapeüthü jüei moila shuohhen nangkü Hinnom Kahjilei Baal kahvangei moidü lingpeih. Ngei jom kü ha dükhen ne-e, hatü ngelei nanglak Judah am mang thahhühen mü jomi henüng dou dükkahen shei ngelei mong kü leyei nepeiküangpih.

Monglemhen Lahpü

³⁶ “Nüngi hapa chingnyü nangkü yan, münghishaü, hatü cham homei Babylon ongpa kü shuohtükhen shei eteke, shejao ngei, Shembüpa, Israel Kahvangi ha enyüpeih:

³⁷ Ngei mongshihpai ngei jom changei deishihpü kahmükthü leipü jom thaiyei leilanghen; hapa shingei ngei jom müei leiyei nyiushemmei kü jom chingchingei nyuhühen.

³⁸ Jomü ngelei nanglak, ngei jomei Kahvang vaihen.

³⁹ Ngei jom meihen shingvaishi jomi ngei kü nyemhen nangkü mongdang hük dou hük shuohhen.

⁴⁰ Ngei jom kü doumei dükpü nedohhen, jom ngei toueipü nelüdaihen nangkü ngei jom mongdhüng vamhühen.

⁴¹ Ngei jom kü doumei dükpü kü mongonghen hatü ngelei mongdang hatü laangha kempai hapa kahdok kü jom hingmei sheiphonghen.”

⁴² Shembüpai hapakei enyüke: “Ngei hapa nanglakthü kü hathü shanghah longpü koei peipü keiha, ngei jom kü lahpü moihimanthü shuohhen.

⁴³ Ammi shelei, ‘Hapayü shennyak nevaijü yemhimak neshiüpü Babylon am kü shuohtükpü lavüngtoipü kahdok’ shei ehampü shao hapa kahdok kü kahthü shakhen.

⁴⁴ Benjamin kahdok kü, Jerusalem shinpü chingthü, Judah jilathü, heshüphi kahshangla hatü Negeb kü kahthü shakei hapa kü füoshang shingei denpü shuohhen, mehenangkü ngei laphen lingei leihen” shei Shembüpai enyüke.