JEREMIAH 31 - DAÜLANGPÜ LAIHING (BSI)

Wüpküp Leipü Leihen Nang

¹ “Hahepak kü ngeiyü Israel phangthü peüei Kahvang vaihen, hatü jomphongü ngelei nanglak vaihen shei Shembüpai enyüke.”

² Shembüpai hapakei enyüke: “Nanglak üam yani nemah-i yangpa, hathüi jahpanei phahji danghen; Ngei Israel am kü nyiushemmei shuohhen peihen.”

³ Peihdaipü hepak kü Shembüpa ham touei vamei eteke: “Nedohnetenpü bampai ngei nüng kü bampeih; Hanangkü nedoh-i ngei bampü nüng kü hupeih.

⁴ Shao ngei nüng lingei leihen, hatü am ja lingei leihen. Oh pai mü ngühpü nela Israel, Shao ammi tambourin vüngei mongongpai phaukteihen.

⁵ Shao ammi Samaria kahshang kü nyalingngupai sheihen; Kahling ami hathü sheiyei hapalei betjük kü mongonghen.

⁶ Ephraim phaüshang kahmük leipü veyompüthüi nyükhen nyih hük vamkahen.” “Kei, jeni Zionlei jenei Shembüpa Kahvang touei aongshah.”

⁷ Shembüpai hapakei enyüke: “Jakob nangkü mongongpai kesho loktuh; jatthü khongkü peü mü shongpüba kü menvih kesho loktuh, hatü, ‘Oh Shembüpa, aoei nyupü nüngei Israel nanglak yangtuh’ shei etuh.”

⁸ Veituh, ngei apshaphi kahdok leipü jom müei leikahen, hatü kahdok dohpü leipü jom thailanghen. Jom khongkü mükphüngpa, hatü la khodaipü nyuhen, hapeü anghen nyüthü hatü anghen tüngpü nyühathü nyuhen; khongnyü longpü hük leikahen.

⁹ Jom thepyaki nyokei leikahen, ngei jom leishingkü phopyaki leikahen. Ngei jomü yungyen lemei mühen; Jom huluh neshuohhen mü jintükpü lem kü müei leihen; Mehenangkü ngeiyü Israel amei pa, hatü Ephraim amü ngelei hashongpa.

¹⁰ Shembüpalei shah bangtuh, Oh jatthü; hapayü tailu yungkung kahdok thahshi baongtuh; “Üpai Israel am haitük, büpai jom thailanghen, hatü mi yombüi keiha büpai laophülei mi yomhen.

¹¹ Mehenangkü Shembüpai Jakob shakei bümei leihühen, hatü jom mü wong kohpü amei lak kübü angei leihen.

¹² Jom peiyei Zion Kahshang shaopülei mongongpai lenhen; Shembüpai hah, yiüja, mainga, mi hatü mohoh chehathü changshi shuohpü nangkü jom mongonghen. Jomphongü yung meishi üpü pemong kei nyuhen, hatü jom hajük kü mongnemanghen.

¹³ Nela nethe hatü behe peüi mongongpai phaukteihen. Ngei jom theppü mongong leihühen; Ngei jom kü mongmang nangjei nyiushemmei mongong shuohhen.

¹⁴ Ngei ngongpathü hahying meipai mahühen, hatü ngelei nanglakthü ngelei moihimani maei nyuhen shei Shembüpai enyüke.”

¹⁵ Shembüpai hapakei enyüke: “Ramahlei theppüyoungpü ngeü hük dannyüke. Racheli laophülei hapeüthü nangkü thepnyüke; Pinnyülei hapeüthü neshiüpü nangkü nedohpih shei thepnyüke.”

¹⁶ Shembüpai hapakei enyüke: “Nüngi theppü ngeü dohtuh, hatü mükphi thittüktuh; mehenangkü nüngei dou nangkü laklei nyüpeih” shei Shembüpai enyüke. “Jomphong vepa kahdok leipü nyokei leikahen.

¹⁷ Hanangkü ngoikahen nangkü monglem nyüpeih” shei Shembüpai enyüke. “Nüngei hapeüthü jomei kahdok yemei leikahen.

¹⁸ Ephraim ami khümei epü ngei dantepih: Ngeiyü han hokhen mangnyuhpü mohoh cheha kei nyushingkü nüngi ngei kü nyuh, hatü ha ngei nyingei yahpeih. Ngei müei leituh, ngei nyokei leiküshah, mehenangkü nüngü ngelei Shembüpa Kahvang.

¹⁹ Ngei lemnyong kü daipheikü ngei mong leppeih; ngei nyingei peipheikü ngei ngelei jaaba kü daüppeih. Nethe hepak kü mang thahpü nangkü ngei veüeidhe nengai-i nyupeih.”

²⁰ “Ephraimü ngei bampü ha, ngei monghahpü hapeü nevaipü je? Ngei büpa khüei ejao shaang thahshi ngei büpa deihnyeih. Hanangkü büpa kü ngei mong kü nemei-i deihnyeih. Ngei hingmei büpa küphahji huhen” shei Shembüpai enyüke.

²¹ Lemnyü kü maiyaong hatü phu haongtuh. Am mepa lem kü daipa, hapa lemnyü meishi deihtuh. Nyokei leikei, Oh Israel nanglak; ammei chingnyüthülei nyokei leikei.

²² Meshükpa nüng paüeiyonei longteihen, Oh hingnelempü yiükha? Shembüpai kahdoknyü kü dou ja hük dükkahen; Nyüha hüki-ang baha yanghen.

Kahvangei Nanglakthü Daeishehen Nang

²³ Jeiyong Shembüpa, Israel Kahvangi hapakei enyüke: “Mechem ngei jom wüpküp leipü müei leihen, Judah kahdok hatü haleipü jilathü leipü nanglakthüi shao hathü shah noteihen: ‘Shembüpai am moihimantuh, Oh daülangpü am nyushing, Oh daülangpü kahshang.’ ”

²⁴ Kahling am hatü laophülei mithü mütü longteipü shennyakthüao Judah hatü haleipü jilathü kü chemi nyuhen.

²⁵ Ngei nyiupünangpüthü nyiumeihühen, hatü aeipai wong nekohpüthü hüshemhühen.

²⁶ Hanangkü nanglakthüi ngei shipeih, hatü mükhet ngoiyei paopeih shei ehen.

²⁷ Ngei Israel hatü Judah phang kü hangku hatü yemhimak li chemi haihen hepak ngoikünyüke shei Shembüpai enyüke.

²⁸ Ngei jom bhitükhen, vütükhen, yaktükhen, mangtükhen hatü shanghah koei peihen lishi dükpü keiha jom linghen hatü sheihenao lishi dükhen.

²⁹ Hathü nyih kü, “Nyühipai thiok hahpü kü hapeüthü bha daümnyeih” shei epü kandok shah nenoteihen, neeteihen.

³⁰ Shejao peüi laophülei mang nangkü dihen; thiok hahpü peüi laophü laophülei bha-üng daümhen.

Vangpüshuwpü Ja Hük

³¹ Ngei Israel hatü Judah am phang mü vangpüshuwpü ja hük linghen nyih ngoikünyüke shei Shembüpai enyüke.

³² Ngei Ijip leipü jomei lak kü düktü müei leipü hepak kü chebü chepa mü lingpü vangpüshuwpü keiha hapayü nechongkahen. Ngei jomei baha kei nyujao jomi ngelei vangpüshuwpü mangtükpeih shei Shembüpai enyüke.

³³ “Hapa hepak pheikü ngei jom mü linghen vangpüshuwpeyü hapa hih” shei Shembüpai enyüke. “Ngei ngelei shahkung jomei sholi kü hatü jomei mongdang kü nyangei tuhhen. Ngei jomei Kahvang vaihen, hatü jomü ngelei nanglak vaihen.

³⁴ Hajük kü shennyak hüki laophülei chingyowpa kü, nevaijü shennyak hüki laophülei jeihinaü kü, ‘Shembüpa nyingtuh’ shei nenyuhteihen; mehenangkü maanpü kübü longpü thahshi jom peüi ngei nyinghen. Mehenangkü ngei jomei mang tükhen, hatü hajük kü jomei mang deih-ei nedangpih” shei Shembüpai enyüke.

³⁵ Üpai nyihnüng vangngai shingvaishi vanghe, hatü yanüng vangngai shuohhen nangkü lennyü hatü lithathü kü shahkung shuohnya, yungching yungmok ngeü vamhen mü üpai yungching pheühünya, ha Shembüpai hapakei enyüke: Jeiyong Shembüpayü büpalei men:

³⁶ Ngei toueipü hapa shahkung mahtükjema, Israel hühihathü jat hük shei nyupeyao mahdaihen shei Shembüpai enyüke.

³⁷ Shembüpai hapakei enyüke: “Vangshothü shetei aokjü mon, hatü kahdoknyü shakhimong yemei dangaokjü mon, jomi hathü dükpü nangkü ngei Israel hühihathü yakphonghen” shei Shembüpai enyüke.

³⁸ Ngei shingvaishi hapa chingnyü Hananel Shangdü kübü Shouk Peshaden thahshi linghen.

³⁹ Shetpü vü hük hatoueipü Gareb shangtao, hatü nyokei leiyei Goah thahshi laülüki kanghen.

⁴⁰ Mahng vüpü hatü nyüphinya yakpü kahji kemei, hatü heongphi Kidron Kahji thahshi kübü kahthü, ha kübü heihdaipü Koyei Peshaden shoukbaong thahshi Shembüpa kü daülangi leihen. Hapa chingnyü sheyü nebhitükhen nevaijü nemangtükhen.