JEREMIAH 30 - DAÜLANGPÜ LAIHING (BSI)

Shembüpa i Nanglakthü kü Lahpü

¹ Hapayü SHEMBÜPAleipü Jeremiah touei peipü shah:

² “Shembüpa, Israel Kahvangi hapakei enyüke: ‘Ngei nüng kü epü shahthü peü lai hük kü nyangtuh.

³ Ngei ngelei Israel hatü Judah nanglak wüpküp leipü müei leihen nyihthü ngoikünyüke, shei Shembüpai enyüke, hatü ngei chebü chepa kü shuohpü kahdokei chingchingei nyuhühen’ shei Shembüpai enyüke.”

⁴ Hathüyü Israel hatü Judah nangkü Shembüpai epü shahthü:

⁵ Shembüpai hapakei enyüke: “Hami chingmeivangmei nevai, nyempühanpü ngeü dannyüke.

⁶ Shaang haongshi deihhümao: Baha hüki hapeü büh-aokhen je? Shejema mehekei wong kohpü bahathü peü nyüha hük hapeü anghen tüngjü vom kü laki paümpükei nyunya, hatü mahngmük mahngshe kei haidaitü nyunya?

⁷ Hapa nyih meshük nyembenüng nyuhenang! Mepa nyih-ao hapa mü shetteihen neaokpih. Hapayü Jakob shing shanghah hepak nyuhen, shejao ha kübü büpa yangdaihen.”

⁸ Hapa nyih ngei büpalei bhagchong kübü pang ngühlanghen, hatü büpalei lungsha laitükhen, hatü hajük kü jom kung amei aa nevaihen shei Jeiyong Shembüpai enyüke.

⁹ Shejao jomi Shembüpa, jomei Kahvang hatü ngei jom shing vamhüpü David ongpa jomi chongphohen.

¹⁰ “Hanangkü nüng tenyem, Oh ngelei chongphobü Jakob; nüng tehan, Oh Israel shei Shembüpai enyüke. Mehenangkü ngei tailu leipü am yanghen, hatü jom wüpküpei nyupü kahdok leipü ammei hühihathü yanglanghen. Shao Jakobü chingmeivangmei nyiushemmei nyuhen, hatü üpaiyao jom nenyemhühen.

¹¹ Ngei nüng mü nyüpeih, hatü nüng yanghen shei Shembüpai enyüke. Ngei am yanei deishihpü jatthü peü mahtükjao, Ngei am chemjalak kü nemahtükpih. Ngei am kü hanghi neshuoh-i netuhpih, shejao hayü shahhingi dükhen; Am kü hanghi neshuoh-i neleishihpih.”

¹² Shembüpai hapakei enyüke: “Ammei makaw nemeiaokhen; nemeihen mü ammi ma yahteke.

¹³ Am nang ephahen üpayao neshiü, ammei ma kü meli neshiü, ha nemeiaokhen.

¹⁴ Ammei mongkhen küphü peüi am betükteke; jomi am nang deihshi neshiü. Vepa hüki keiha ngei am kü üppeih, hatü nemeipü ami keiha am kü hanghi shuohpeih; mehenangkü am pungpü ahshi longshi, hatü ammei mang longi ahshi nyüke.

¹⁵ Ammi ma yahpü nangkü mehekei eelanya? Nüng kü tüngpü nemeiaokpih. Mehenangkü ami pungpü hatü ammei mang ahshi longpü nangkü ngei ha dükpeih.

¹⁶ Shejao üami am lühtükpa jomao lühtükhen, hatü ammei vepathü jom peü wüpküpei daihen. Üami am leipü aeteishepa jom kao aeteishehen, hatü üami am kü shüvei, jom kao shüveihen.

¹⁷ Shejao ngei am kü yangnyu meipü yahphahen, hatü ammei makaw ngei meitükhen shei Shembüpai enyüke; mehenangkü jomi am kü aanyak shei nyükteke, Üpaiyao Zion kü ne-ienelem!”

¹⁸ Shembüpai hapakei enyüke: “Ngei ngelei nanglakthü jomei kahdokei leishihhen, hatü jom nyushing peü kü phahjihen; Bentükpü shing kü chingnyü shao lingei leihen, hatü ongshem hapalei shing kü vehühen.

¹⁹ Jom leipü menvihpü kesho vamhen, hatü mongongpü ngeü vamhen. Ngei jomei nanglak bhei-ie nyeinya dahühen, hatü jom maanei neleihen; Ngei jom kü dhüm koei peihen, hatü jom nevüshihhen.

²⁰ Jomei hapeüthüyü shelei nyupükei nyuhen, hatü jomei thaihiyu chongkhenei linghen; hatü jom kü shüveipüthü kü ngei hanghi shuohhen.

²¹ Jomei mübü jom khong kübü nyuhen, jomei vanglem lembü jom kübü vamhen. Ngei büpa yopailei heihhen, hatü büpa ngei ngoiyei heihhen, ngei nenyükpü kü ngei touei üpa heihaokhen? shei Shembüpai enyüke.

²² Amphong ngelei nanglak vaihen, hatü ngei ammei Kahvang vaihen.

²³ Veituh, Shembüpalei yinglükleisho mongshihpai bhaoei vamhen, hatü mangpü alüngleple nemeipü amei shangjing kü sheühen.

²⁴ Büpai deihpü mangdük thahshi, hatü ha mangjiü thahshi Shembüpalei mongshih nyokei neleidaihen. Shompülei ammi ha nyinghen.”