Biblia Todo Logo
Bìoball air-loidhne

- Sanasan -

JEREMIAH 28 - DAÜLANGPÜ LAIHING (BSI)


Hananiah-i Jeremiah Khüei Yaongpü

1 Zedekiah-i Judah kü ong vaipü bong ali mü lenyang ngapabü pangpü hapa bong-üng Gibeon leipü Azzurlei cheha Hananiah thibüi ngongpathü hatü nanglakthü peü nyushi Shembüpalei shemei ngei kü eteke:

2 “Jeiyong Shembüpa, Israel Kahvangi enyüke: ‘Ngei Babylon ongpalei pang mangtüktih.

3 Bong nyi mong kü Babylon ongpa Nebukadnezzarlei shem leipü yungshongthü ngei hapa shingei yah-ei leihen.

4 Shao ngei Babylon wüpküpei daipü Jehoiakimei cheha, Judah ongpa Jehoiakin hatü nanglakthü peü hapa shingei müei leihen; mehenangkü ngei Babylon ongpalei pang mangtükhen’ shei Shembüpai enyüke.”

5 Hahepak kü Shembüpalei shemei yaongpü ngongpathü hatü nanglakthü nyushi Jeremiah thibüi Hananiah thibü kü jangei eteke.

6 Jeremiah thibüi, “Amen! Shembüpai hapakei nyemdükma! Nüngi teteivanei epü shahthü kei Shembüpalei shem leipü deilangpü yungshongthü hatü Babylon wüpküpei nyupüthü müei nyemleiküma!

7 Shejao ngei mehe am hatü nanglakthüi danshi ekahen, ha kü bangtuh:

8 Ji shekü nyupü thibüthüi ongchingthü, kahmük longi khüei vehok vamhen, shanghah hatü chamhilem peihen teteivanei nyuhampeih.

9 Shejao thibü üpai chingmeivangmei jung tetei enya, büpa kü hingshangpü thibü sheiyü büpai tetpü peü jiüküjü mon ehen” shei eteke.

10 Hahepak kü Hananiah thibüi Jeremiahlei bhagchong leipü pang bhüh-ei yah-ei mangtük,

11 hatü büpai, “Shembüpai hapakei enyüke” shei nanglakthü peü kü eteke: “Ngei shaang dükpü keiha bong nyi mongkü Babylon ongpa Nebukadnezzarlei pang jatthü peüei bhagchong leipü bhühtükhen” shei e. Ha kü Jeremiah hatoueipü dailem yemei lüdai.

12 Hananiah thibüi Jeremiah thibülei bhagchong leipü pang bhühlangtü kanja angphei kü Shembüpalei shah Jeremiah touei pei:

13 Daituh, hatü Shembüpai Hananiah kü hapakei enyüke shei etuh: Nüngi pü yah-ei lingpü pang mangtükteke shejao hapa nangjei nyiami lingpü pang danghen hih.

14 Jeiyong Shembüpa, Israel Kahvangi hapakei enyüke: Babylon ongpa Nebukadnezzar chongphohen shingvaishi ngei jatthülei bhagchong kü nyiami lingpü pang paihühen, hatü jomi büpa chongphohühen. Phaüyemthüi dangkao büpa chongphohühen.

15 Hapheikü Jeremiah thibüi Hananiah thibü kü, “Bangtuh, Hananiah! Shembüpai nüng neshomshomi shahshem kü hinglemhen mü nüngi hapa jat yawhlangteke.”

16 Hanangkü Shembüpai hapakei enyüke: “Ngei hapa kahdok kübü nüng nüngtükhen. Shenüng-üng nüng dihen; mehenangkü nüngi Shembüpa khüei chongventeke.”

17 Hapa bong len nyetpabü kü Hananiah thibü di.

Phom Naga Bible - DAÜLANGPÜ LAIHING

Copyright © 2005 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan