JEREMIAH 25 - DAÜLANGPÜ LAIHING (BSI)

Babylon Wüpküp Nang Epü

¹ Hapayü Babylon kü Nebukadnezzari ong vaipü shongpü bong, hatü Josiahlei cheha Jehoiakimi Judah kü ong vaipü bong alipabü kü Judah nanglakthü nangkü Jeremiah touei peipü Shembüpalei shah.

² Hapakei Jeremiah thibüi Judah nanglak hatü Jerusalemei nyupüthü peü kü eteke:

³ Judah am Amonei cheha Josiah-i ong vaipü bong anpüjempabü kü pangei shinnyih ngoishi bong hapüjem mongkü Shembüpalei shah ngei touei peiteke, hatü nedoh-i ngei am kü etepih, shejao ammi ha nebangpeih.

⁴ Shembüpai nedoh-i büpalei thibüthü shomteke, shejao ammi nebang.

⁵ Jomi am kü, “Shaang am peüi ammei nemeipü lemthü hatü ammei douten kübü mong leptuh. Shejüang Shembüpai am hatü ammei bühipa kü denshing shuohpü kahdokei nyuhen.

⁶ Ammi lebü kahvangthü chongtepho hatü hathü kü tekhüm, hatü ammei lakdoui ngei mong teshihhü. Shejüang ngei am kü hanghi neshuohpih” shei eteke.

⁷ “Shejao amü laophü nyingi ma yahhen mü ammi ngei epü nebangi ammei lakdou-i ngei mongshihhüpeih” shei Shembüpai enyüke.

⁸ Hanangkü Jeiyong Shembüpai hapakei enyüke: Ammi ngelei shah nebangpü nangkü,

⁹ ngei apshaphi leipü jatthü Babylon ongpa Nebukadnezzar, ngelei chongphobü, hapa kahdok hatü halei nyupüthü hatü ha kü shinei nyupü jatthü khüei müei peihen; ngei chemjalak kü hathü mahtükhen hatü jomü nyemhübenüng dou, eelanyongnya hatü nedohnetenpü veüpong leihühen.

¹⁰ Ngei jom toueipü mongongmonglepü ngeü, yiükjing mo mongongpü ngeü, hah ngümpü ngeü, hatü awdük vangngai changtükhen.

¹¹ Hapa kahdok kemei lavüngtoiyei leihen hatü ha jatthüi bong pejempüan thahshi Babylon ongpa chongphohen.

¹² Shejao mechem bong pejempüan lomhenshang, ngei Babylon ong hatü büpalei kahmük kü hanghi shuohhen, hatü den kü hapa kahdok lavüngtoiyei leitükhen shei Shembüpai enyüke.

¹³ Ngei hapa kahdok khüei epü douthü, lailei nyangei nyupü peü hatü Jeremiah-i jatthü peü khüei epü hapa kahdok khüei yah-ei peihen.

¹⁴ Mehenangkü jatthü longi hatü longpü ongthüi jom aa leihühen; ngei jomei dou hatü lakdouthü aimü nyokei shuohhen.

Jatthü kü Kahvangei Shahphenpü

¹⁵ Shembüpa, Israel Kahvangi ngei kü ha eteke: “Ngelei lak leipü ngei mongshihpü hapa yiüshong yahtuh, hatü ngei nüng üam jatthü touei shom, hathü kü ha yingeishuoh.

¹⁶ Jomi ha yingtü yonteihen hatü ngei jom touei yan shomhen vaipü nangkü ngaei longteihen.”

¹⁷ Hanangkü ngei Shembüpalei lak leipü yiüshong yah, hatü büpai ngei shompü jatthü kü ha yingteke.

¹⁸ Jerusalem hatü Judah jilathü, haleipü ong hatü lakchongbüthü, jom shinnyih nyupükei lavüngtoiyei leihühen, peüi yaüpülungpü, mihnyi pü, eelanyongnya dou hatü thaüvaüthemthe leihühen;

¹⁹ Ijip ong Pharaoh, büpa mü sheühteipüthü, lakchongbüthü, hatü büpalei nanglakthü peü,

²⁰ hatü haleipü kung shennyakthü peü; Uz amei ongthü peü; Philistia amei ongthü peü, (Ashkelon, Gaza, Ekron, hatü Ashdodlei tuhpü shennyakthü peü);

²¹ Edom, Moab hatü Ammon;

²² Tyre, hatü Sidon kübü ongthü; yungdang homei yungkung chingthü kübü ongthü;

²³ Dedan, Tema, Buz hatü shangshe sho kuptükpüthü;

²⁴ Arabia am ongthü peü, hatü bhih kahdokei nyupü kung shennyakthülei ongthü peü;

²⁵ Zimri, Elam hatü Media amei ongthü peü;

²⁶ hatü apshaphi ongching kübü ongthü peü, tailuei hatü yopailei nyupü hük pheikü hük, kahdok shak kü nyupü ongchingthü peüi hapa yinghen. Jom peü pheikü Sheshakh ongpai hapa yinghen.

²⁷ Jeiyong Shembüpa, Israel Kahvangi hapakei enyüke shei nüngi hathü kü etuh: Mehenangkü ngei am touei yan shompü nangkü yingtuh, choktuh hatü bhaituh, dotuh hatü paoei teyaong.

²⁸ Shejao jomi nüngei lak leipü yiüshong yah-ei neying-ü shei eküjema, nüngi hathü kü Jeiyong Shembüpai hapakei enyüke shei etuh: Ammi ha yinghen vongbong!

²⁹ Veituh, ngelei men kü nyükpü hapa chingnyü kü shanghah koei peikünyeih, hatü am nehanghi-i nyuaokhen je? Am hangnehi-i nenyupih; mehenangkü ngei kahdoknyülei nyupüthü peü touei yan kü nyüknyüpeih shei Jeiyong Shembüpai enyüke.

³⁰ Hanangkü jom khüei hathü shah teteivanei etuh: Shembüpai vangsho leipü ngünghen; Büpai büpalei daülangpü nyushing leipü vangmuk kei ngeü vamhen, hatü büpalei kahdok khüei büpai ngünghen. Nyalingngupai ngümpüthüi keiha büpai hapa kahdokei nyupüthü peü khüei lenhen.

³¹ Hapa vüngjang jangei kahdok dohpü ngoishi daihen; mehenangkü Shembüpai jatthü khüei yaonghen; büpai hangkuli peü kü shahphenhen, hatü nemeipüthü yani mahhühen shei Shembüpai enyüke.

³² Jeiyong Shembüpai hapakei enyüke: “Veituh, jat hük kübü hük shei shanghah yaüei daikünyüke.”

³³ Hapa nyih Shembüpai jüpüthü kahdok dohpü junghük kübü junghük thahshi nyuhen. Jom kü üpaiyao mahng nethephen, nevaijü üpaiyao jungeilangei mahng nevühen; jomü kahdok leipü nyüphinya kei nyuhen.

³⁴ Theptuh hatü youngtuh am mi yombüthü; bhihla kü duteituh, am mi khong müpüthü. Mehenangkü am jühen hepak ngoiteke; am dohen hatü dükbhaok haipükei haidaihen.

³⁵ Mi yombüthü melei nenyai-i nyuhen, mikhong müpüthü yanglem neshiühen.

³⁶ Mi yombüthü lenpü bangtuh, mikhong müpüthü theppü bangtuh, mehenangkü Shembüpai jomei thüngkon mangtükteke.

³⁷ Shembüpai mongshihpü nangkü veinyuhüpü shingthü lavüngtoiyei leitükhen.

³⁸ Mailangi laophülei yaongsha tuhphongpü keiha, Shembüpai laophülei nanglak tuhphonghen, hatü jomei kahdok lavüngtoiyei leitükhen, hatü hapayü vepathülei yan, hatü Shembüpalei mongshih homei ha vamhen.