JEREMIAH 24 - DAÜLANGPÜ LAIHING (BSI)

Adhajük Mühdow Nyi

¹ Jehoiakimei cheha, Jehoiakin Judah amei ongpa, hatü büpalei lakchongbüthü, mistrithü hatü komathü Jerusalem leipü Babylonei Nebukadnezzar ongpai wüpküpei shetei lüdaipheikü Shembüpai ngei kü adhajük mühdow nyi phopshem chingshelei haüshi huphüteke.

² Mühdow hük keyü longi meipü adhajük, shongei shümpü betjük kei, hatü mühdow hükpa keyü longi nemeipü, hahhen nemei-i nyuteke,

³ hatü Shembüpai ngei kü, “Jeremiah, nüngi mehe eenyüke?” shei eteke. “Adhajük, meipü adhajükü longi meishi, hatü nemeipü adhajükü longi nemei-i, nehah-aokhen mü eenyüke” shei ngei eteke.

⁴ Hahepak kü Shembüpalei shah ngei touei peiteke:

⁵ Shembüpa, Israel Kahvangi hapa enyüke: Hathü meipü adhajük keiha, Judah am üam hapa shing kübü Babylon kahdok wüpküpei shomei nyüpa, hathü kü ngei meipü adhajük kü keiha bamshi noteihen.

⁶ Ngei ngelei müki hathü kü mei shingvaishi veihen, hatü ngei hathü hapa kahdokei müei leihen. Ngei jom lingei leihen, shejao jom neshaaktükpih; ngei jom sheiphonghen, shejao nebhitükpih.

⁷ “Ngeiyü Shembüpa khih” shei nyinghen mongdang ngei jom kü shuohhen. Jomü ngelei nanglak, hatü ngeiyü jomei Kahvang; mehenangkü jomei mongdang kempai ngei touei mong lepei leihen.

⁸ Shejao nemeipü adhajük keiha, mepa hahhen nemei, hapa keiha ngei Judah ongpa Zedekiah, büpalei lakchongbüthü hatü hapa kahdok nevaijü Ijip leipü yangei nyupüthü peü kü ngei nohen.

⁹ Ngei jomü kahdoknyü jatthü peü touei nyemhübenüng, mang dou leihühen, ngei metouei jom changei deishihhen, halei jomü peüi yaüpülungpü, mihnyi pü, eelanyongnya dou hatü thaüvaüthemthe leihühen.

¹⁰ Ngei jom hatü chebü chepa kü shuohpü kahdok leipü mangmah thahshi ngei jom khüei yan, münghishaü hatü cham shomhen.