JEREMIAH 22 - DAÜLANGPÜ LAIHING (BSI)

Mong Lephen Thongpü

¹ Shembüpai hapakei enyüke: Judah ongpalei shemei yiütuh hatü halei hapa shah eyeishuoh:

² “Oh David ong uoshing kü uopü Judah ongpanüng, hatü nüngei lakchongbüthü hatü hapa shadenthü homei shüteipü nanglakthü, Shembüpalei shah bangtuh.

³ Shembüpai hapakei enyüke: Mehe shahhing hatü jiüpü nyüpa, ha düktuh. Shüveipüthülei lak leipü gühlangshuohpü shennyak yangtuh. Yenpa, hashihha nevaijü vaümnyü kü nejiüpü tedük nevaijü jom kü teshüvei, hatü hapa shing kü mang neshiüpü iy teyenhü.

⁴ Mehenangkü ammi hapa shahkung dükhen kenhingjema, David ong uoshing kü uopü ongthüi hapa ongshem shaden homei koyei khari hatü koyeithü kü uotü jomei lakchongbüthü hatü nanglakthü omshi peikahen.

⁵ Shejao nüngi hathü shahkungthü nebangjema, hapa ongshemü lavüngtoiyei leitükhen shei ngei lahnyeih” shei Shembüpai enyüke.

⁶ Judah ongpalei ongshem nangkü Shembüpai hapakei enyüke: “Ngei touei amü Gilead keiha nyujao, Lebanon shangching leshi nyulangmao, ngei amü hingmei mü bhih kahdok leitükhen, shennyak nenyupü ching kei leitükhen.

⁷ Ngei am khüei laophü laophülei lahhilaong notü jüpü am shomphahen, hatü jomi ammei cedar pü meipüthü agei aw kü jaktükhen.”

⁸ Jat longi kübü hapa chingnyü peih-ei daipü shennyakthüi hüki hük mü, “Hapa chingnyü kü mehekei Kahvangi henüng keipü dou dükshuohpa yo?” shei phehen,

⁹ hatü hapa kü jangpeyü, “Mehenangkü jomi Shembüpa, jomei Kahvang mü vangpüshuwpü mangtüktü lebü kahvangthü kü khümei chongphopü nangkü ha vampüja” shei ehen.

Jehoahaz kü Jeremiahlei Shahjang

¹⁰ Nüngi didaipü ong nevaijü büpa lomohpü kü tethep; Halei meyü wüpküpei lüdaipüthü shing shahyaki theptuh; mehenangkü büpa mechemao laophülei kahdokei nyokeineleikahen, nevaijü hapa ne-eehen.

¹¹ Josiahlei cheha Shallum, üpai cheha kü jeiyei Judah kü ong vaipa, shejao hapa shing leipü lüdai, büpa hajük kü hatouei nyokei neleiküpih,

¹² shejao metou shingei büpa müei deiyei küplang, hapa shingei büpa dihen; büpa hajük kü hapa kahdok ne-eehen.

¹³ Üpai laophülei shem shahhing ne-e-i venya, hatü shahshemi shem jaan mü jaan mü venya, laophülei shennyak kü lat neshuoh-i angkü shem vehünya, onyükei.

¹⁴ “Ngei ngei nyingi jaandokei shing longi kohpü dungnukthü kohshi shem vehen” shei büpai enyüke. Hanangkü büpai ha kü ümha shadenthü longi kohshi, cedar pü yah-ei shihtü ha kü hakla long nyionyüke.

¹⁵ Cedar pü yah-ei shem vepai nüng meipü ong leshi leihünyu je? Ampai hahtü yingtü mehe shahhing hatü mehe jiüpa ha nedükangpü je? Hanangkü büpa mü lemphüli meishi nyuhampeih.

¹⁶ Büpai taopa hatü nehahneyingpüthü kü jiüpü shahhing dükpeih, hanangkü büpa mü lemphüli meishi nyuhampeih. Ngei nyingtuh shei epeyü ha nevaipü je shei Shembüpai enyüke.

¹⁷ Shejao nüngei mükhimongü shahhing e-epü mop danghen, mang neshiüpü iy yenhen, mih kü shüveitü aettei daihen deihshi nyüke.

¹⁸ Hanangkü Josiahlei cheha Jehoiakim, Judah amei ongpa nangkü Shembüpai hapakei enyüke: “Üpaiyao büpalei mahngshe kü, ‘Onyükei, jeihinaü!’ ‘Onyükei, nyahinaü!’ shei nethephen. Üpaiyao ‘Onyükei, ngelei shembü!’ ‘Onyükei, ngelei ongpa!’ shei neyounghen.”

¹⁹ Gadu mahng vüpü keiha büpalei mahng vühen; büpayü Jerusalem penyüsha haolei shüei daiyei yaktükhen.

Jerusalem Nangkü Jeremiah-i Kopü Shahjang

²⁰ Jerusalem nanglakthü, Lebanonlei aongei leneishuoh, hatü Abarimlei ngeüwong anpü Bashanei danhütuh; mehenangkü nüngei küphüthü mih-i neütükteke.

²¹ Nüng angeideiyei nyushi ngei etepih, “Ngei ha kü nebangpih” shei nüngi epeih. Hashih mebü-üng ngelei shah nebangpeyü nüngei vanglem vaihampeih.

²² Vanglüki nüngei mi yompüthü peü mao-ei lüdaihen, hatü nüngei küphüthü peü wüpküpei lüdaihen. Hahepak kü nüngei mang nangkü nüng veühen hatümongmanghen.

²³ Oh Lebanonlei nyupüthü, cedar püyingei jep lingtü nyupüthü, Mechem tüngpüyapü peihenshang, am meshük thephen? nyüha hük hapeü bühshingkü tüngpükei tüngkahen.

Jehoiakin kü Kahvangi Shahphenpü

²⁴ Shembüpai Judah amei ongpa Jehoiakimei cheha Jehoiakin kü eteke, “Hingmei ngeiyü vanyangyem Kahvang, nüngü ngelei lakdahphi kü sheppü anguti kei nyulangmao, ngei nüng bhühtükhen.

²⁵ Nüng jühen yempü, nüngi nyempü Nebukadnezzar hatü Babylon am kü nüng shuohtükhen.

²⁶ Ngei anyü anjiphen wüpküpei deitükhen. Anji üpaiyao nebühpü lebü kahmükei deiyei halei anjiphen dihen.

²⁷ Nüng hapa kahdokei nyokei leihüei deihjao nyokei neleiaokhen.”

²⁸ Hapa Jehoiakinü yaktükpü dükten je? üpaiyao nenapü douten je? Mehekei büpa hatü büpalei hapeüthü jomi nenyingpü kahdokei deishihhen? shei ngei eteke.

²⁹ Oh kahdok, kahdok, kahdok, Shembüpalei shah bangtuh!

³⁰ Shembüpai hapakei enyüke: “Ha shennyakü hapeü neshiüpükei nyangei tuhtuh. Shennyak hük laophülei nyih kü uoshing jeihen neshiüpü; Mehenangkü büpalei hapeüthü üpaiyao David ong uoshing kü uohen nevamhen, hatü Judah kü shao vanglem nelemhen.”