JEREMIAH 21 - DAÜLANGPÜ LAIHING (BSI)

Jerusalem Dohen Tetpü

¹ Mechem Hezekiah ongpai Malkiahlei cheha Pashhur hatü Maaseiahlei cheha Zephaniah ngongpa nyi Jeremiah touei shompa, hahepak kü Jeremiah touei peipü Shembüpalei shah:

² “Chingmeilemlingei hamei men kü Shembüpa kü phekütuh; mehenangkü Babylon ongpa Nebukadnezzari ham khüei vehok pangkünyüke. Üpai nying, Shembüpai peihdaipü hepak kü dükpükei, shaangao yashanyale dou dükjü büpa ham toueipü leidaiphahen aokpeih” shei e.

³ Shejao Jeremiah-i jijinyi kü e,

⁴ “Zedekiah kü Shembüpai hapakei enyüke shei etuh: Bham haolei am kü shümei nyupü Babylon ong hatü büpalei nanglakthü khüei ammi noshi nyupü vehok phunglang kemei am khüei ngei leitükhen, hatü ngei hathü chingnyü mongei thaihühen.

⁵ Ngei ngelei lak haongei, wong kohpü lak noei mongshih longpai am khüei hokhen.

⁶ Ngei hapa chingei nyupü shennyak hatü yemhimakthü jühen, hatü jomphongü nyembenüng chamhilemi dihühen.

⁷ Hapheikü ngei Judah ong Zedekiah, büpalei lakchongbüthü hatü hapa chingnyü cham, yan hatü münghishaü kübü yangpüthü peü Babylon ongpa Nebukadnezzar hatü jom jühen yempü vepathü kü shuohtükhen. Büpai jom yani mahhühen; büpai jom kü phahji nevaijü yahyang shinshang meheyao nehuhen.”

⁸ Nyeinya vaishi Shembüpai hapakei enyüke shei nanglakthü kü etuh: “Veituh, ngei am touei yangnyu lem hatü dihen lem temnyüpeih.

⁹ Hapa chingnyülei nyupüthü peü yan, münghishaü nevaijü chami dihühen. Shejao am kü ching shümpü Babylon am touei üpai daiyei shakei vamhenshang, büpa hatü chenyüha nyi yangei nyuhen.

¹⁰ Ngei hapa chingnyü kü mei nevai ten dükhen temtüktü nyüpeih shei Shembüpai enyüke. Hapayü Babylon ongpalei lak kü shuohhen, hatü büpai hapa awi mahtükhen.”

¹¹ Anyei vaishi Judah am ongsha ongshem kü, “Shembüpalei shah bangtuh” shei etuh;

¹² Oh David am shem, Shembüpai hapakei enyüke: “Nepnüng dhom ieyei shahhing dou düktuh; Shüveipüthülei lak leipü gühlangshuohpü shennyakthü yangtuh. Hei nevaijema ammi dükpü mang nangkü ngei mongshih vamhen, hatü üpaiyao nemetaokhen mü aw kei bahhen.

¹³ Veituh, am Jerusalem amü kahji dok kü yaongvak aongpükei, kahjithü shak kü shaoshi uoshi nyüke. Shejao ngei am khüei nyüpeih shei Shembüpai enyüke.” Ammi, “Ham khüei üpa peiküaokhen? nevaijü ham nyushingei üpa shüaokhen?” shei enyüke.

¹⁴ Ammi dükhahpü betjük aimü ngei am kü hanghi shuohhen shei Shembüpai enyüke. Ngei ammei phaüthü kü awi haphen, hatü ha kü shonpü lemphü hahtükkemhen.