JEREMIAH 18 - DAÜLANGPÜ LAIHING (BSI)

Dük Shükbü hatü Haümdük

¹ Hapayü Jeremiah touei peipü Shembüpalei shah:

² “Dük shükbülei shemei yiütuh, hatü halei ngei nüng kü ngelei shahjang yahphahen” shei e.

³ Hanangkü ngei dük shükbülei shemei yiü, hatü halei ngei büpai dük shükpü pang shinei eeteke.

⁴ Shejao ashem yah-ei büpalei lakei shükteipü dük bhaodai; hanangkü dük shükbüi hapa yah-ei büpa kü meipü aimü lebü kei shükteke.

⁵ Hahepak kü Shembüpalei shah ngei touei pei:

⁶ “Oh Israel phang, hapa dük shükbüi dükpükei ngei nüng kü nedükaokhen je?” shei Shembüpai enyüke. Dük shükbülei lakei ashem nyupü keiha, ammao ngelei lakei nyüpeih, Oh Israel am phang.

⁷ Hepak jiüjiü hük kü ngei jat hük nevaijü ongching hük bhitükhen, vütükhen, mangtükhen shei ejü,

⁸ ngei shahvüng shuohpü jati mang kübü mong lepjema, ngei temei nyupü shanghah neshuohhen,

⁹ hatü lebü hepak hük kü ngei jat hük nevaijü ongching hük linghen hatü sheihen shei ejü,

¹⁰ hapa jati ngei touei mang dükei ngei epü nebangjema, ngei mei dükhen shei deihpü yeiyatükhen.

¹¹ Hanangkü shaang Judah nanglakthü kü hatü Jerusalemei nyupüthü kü Shembüpai ha enyüke shei etuh: Veituh! Ngei am shing shanghah hük temnyüpeih hatü am khüei küpjan hük lingnyüpeih. Hanangkü ammei mang lemthü kübü am peüi mong leptuh, hatü ammei lem hatü dükhiling ja lingei leituh.

¹² Shejao jomi nüng kü jangei, “Hayü nadang neshiü. Hami hamei küpjanthü kü kamhen; ham peüi hamei mang mongdang vaanpü lem kü mühen” shei ephahen.

Nanglakthüi Shembüpa Yaktükpü

¹³ Hanangkü Shembüpai hapakei enyüke: “Jatthü kü phetuh: Hapakei vampü üamiyao danlashang phetuh. Israel ami nyembenüng dou hük dükteke.

¹⁴ Yaongvak shong kübü Lebanon shüdao nyaüei mahnyu je? Haleipü vüngmakpü yung neyeni mechemshangao üdaiphei je?

¹⁵ Shejao ngelei nanglakthüi ngei betük; hatü lajeithü kü ayingshü jakei khümnyüke. Jom daihen lem kü huluh shuohnyüke, jomei lemchang kü nekamnyu, jomi lemnyüshong kü nevai keülem kü kamnyüke.

¹⁶ Jomi jomei kahdokü nyembenüng leitüknyüke, den kü jiühitbenüng dou leitüknyüke. Ha peih-ei daipüthü peüi nyemnyüke, hatü ngaüm dhinyüke.

¹⁷ Heongphi leipü vanglük keiha ngei jomei vepathü toueipü jom nyaihühen. Jom lomohpü nyih ngei ngelei dhe nevai-i dok lepshuohhen.”

Jeremiah Khüei Phaüshah Showpü

¹⁸ Hahepak kü jomi, “Kei, jeni Jeremiah khüei phaüshah showshah; mehenangkü ngongpai nyuhpüvenpü, nevaijü nyingpüthüi epü shah, nevaijü thibüthü leipü shah nemahnyu. Kei, jenei shah-i büpa yepshah hatü büpai epü kü mong neshuoh-i tükshah” shei eteke.

¹⁹ Ngei kü bangshih, Oh Shembüpa; Ngelei vepathüi mehe enya ha kü banglangshih!

²⁰ Mei kü ten shemnyu je? Shejao jomi ngei shing kahsha shoteke. Ngei nüng touei yaongtü jom toueipü nüngei mongshih yahlanghen shingvaishi jomei men kü ngei epeih shei deihtuh.

²¹ Hanangkü jomei hapeüthü münghishaü kü yah-eishuoh; vepalei yan kü lanei yah-eishuoh. Jomei nyühathü hapeü neshiüi nyülan hatü vaümnyü leihütuh. Jomei bahathü jütükkemtuh, jomei nethethü vehok kü yani mahkemhütuh.

²² Mechem nüngi jom khüei ngangahük kü vepathü müei peihenshang, jomei shemthü kübü mahngeü danhütuh. Mehenangkü jomi ngei yephen kahsha shoteke, hatü ngelei la kü tai haenteke.

²³ Shejao nüng, Oh Shembüpa, Ngei jühen jomi lingpü kon nyingei nyüke, nüng toueipü jomei mang tethittük. Nüng toueipü jom noei yaktüktuh; nüng mongshih hepak küang jom kü dou dükeishuoh.