JEREMIAH 17 - DAÜLANGPÜ LAIHING (BSI)

Judah amei Mang hatü Hanghi

¹ Judah amei mangü nyiam lainyangshongi nyangei nyüke; jomei mongdang yaongshung hatü jomei moidü leipü vaung kü diamond daüppai kukei nyangei nyüke.

² Jomei hapeüthüi dangkao püdhüm hatü shangtao shaopü peü kü jomei moidü hatü Asherah kahvang lajeithü kü khümnyüke.

³ Ammei kahmük kempülei ammei mang nangkü ngelei kahshang, ammei mophimo, hatü dounyünangba mü ammei vaümchongthü peü vepathü kü shuohtükhen.

⁴ Am pungpü homei ngei am kü shuohtükpü mükjüp mahtükhen, hatü ngei ammi nenyingpü kahdokei vepathü chongphoei anghen; mehenangkü ngei mongshihpai aw bahhen, hatü hapa den kü bahshi nyuhen.

⁵ Shembüpai hapakei enyüke: “Üpai shennyak kü hinglemnya, üpai wong danghen phai kü mongnyangnya, hatü üpai SHEMBÜPAleipü yanei lüdainya, büpayü thaüvaüthemthepü.

⁶ Büpayü bhih kahdok leipü phenha kei, nyiushemmei peishingkü büpai hapa ne-eehen. Büpayü bhih kahdok shaampü shingei, hatü üpaiyao nenyupü hüm kahdokei nyuhen.

⁷ Üpa shennyaki Shembüpa kü hinglem, hatü monglemnya, büpa moihimanpü.

⁸ Büpayü yungkungei sheipü pü yung philei tünglang banei yiüpükei nyuhen. Nyahpü shaampü kao hapayü nenyemnyu; hapalei lak düngei thüngshingi nyüke. Ühivanpü bong kao hapayü mongshang neshiü, hatü hapai betjük nejüki mechemao nenyunyu.

⁹ Peü meyü mongdang-üng ühing kohshi, hatü nyeinya-üng nemei-i nyüke, hatü ha meihühen neaoknyu. Üpai ha yaoei aokhen?

¹⁰ Shennyak hük kü büpai dükpü aimü, hatü büpalei doui shangpükei laklei shuohhen shingvaishi, Ngei, Shembüpai mongdang yemnyüpeih, hatü sholi doknyüpeih.

¹¹ Shahhing ne-epü mop dangpeyü ouha hük laophüi nedipü ati sheipükei nyüke. Büpalei yangnyu tavanshem kü hathü mop mahdaihen, hatü shompülei büpayü ngapa khih shei nyinghen.

¹² Jenei phopshemü müknyinshekhangpü ong uoshing, chongpangpülei-üng yaongshi nyupü leangke.

¹³ Oh Shembüpa, Israel amei monglemshing, nüng yakphongpüthü peü veü ponghen. Nüng toueipü yanei lüdaipüthü kübhih kü men nyangpükei nyuhen, mehenangkü jomi Shembüpa, yangnyu yunglok tuhphongteke.”

Jeremiah-i Sheühpü Yüei Phoppü

¹⁴ Ngei meitükshih Oh Shembüpa, hatü ngei meidaihen; ngei yangshih, hatü ngei yangdaihen; mehenangkü ngei menvih shuohpeyü nüng mon hih.

¹⁵ Jomi düngei, “Shembüpalei shah melei nyüpa? Ha shaang dhaümhütuh” shei enyüke.

¹⁶ Nüngei mi yombü vaipü kübü ngei paüei nelüdai; ngei shanghahpü nyih nelümnyih shei nüngi nyangei nyüke. Ngelei juben kübü mehe vamei enya hayü nüng touei ngaihe-i nyüke.

¹⁷ Nüngü ngei kü nyemshaopü am teleidai; shanghahpü nyih nüngü ngei loishing.

¹⁸ Ngei kü shüveipüthü veü ponghütuh, shejao ngei tevaühüma; Jom nyemhütuh, shejao ngei nyempü kübü yangshih. Jom kü shanghah nyih koei peijatuh, jom shingnyi nyeishi mangtüktuh.

Sabbath Themhen Nang

¹⁹ Shembüpai ngei kü ha eteke: “Daituh, hatü nanglakthülei penyüsha melei Judah ongpai shünya hatü vamnya, halei heih-ei yaongtuh; hatü Jerusalem kü lebü penyüshathü peü kü yaongtuh.

²⁰ Jomphong kü, ‘Shembüpalei shah bangtuh, Oh Judah ongthü hatü Judah nanglakthü peü, hatü hapa penyüshathü homei kamteipü Jerusalemei nyupüthü peü.’

²¹ Shembüpai hapakei enyüke: ‘Sabbath nyih kü hanggo nekohen, nevaijü hapa Jerusalem penyüsha homei koei neshühen lituh.

²² Nüngi Sabbath nyih shem leipü hanggo koei nedaihen nevaijü dou nedükhen, shejao ngei ambü ampa kü epükei hapa Sabbath nyih daülangi tuhtuh.

²³ Shejao jomi ha nebang hatü mong neshuoh; jomphong ngaümchong haüshi hatü ngei nyuhpüvenpü kü jomi nebangpeih.

²⁴ Shejao ammi ngei epü banghen kenhingjema, hatü Sabbath nyih hapa chingnyü penyüsha homei hanggo koei neshüjema, shejao meheyao dou nedüki hapa Sabbath nyih daülangi tuhjema,

²⁵ Davidei ong uoshing kü uopü ongpai büpalei lakchongbüthü mütü hapa chingnyü penyüsha homei shühen shei Shembüpai enyüke. Ongthüi jomei lakchongbüthü mü koyei khari hatü koyeithü kü uotü, ha mü Judah shennyakthü hatü Jerusalemei nyupüthü halei shühen, hatü hapa chingnyü kü den kü chingchingei nyuhen.

²⁶ Judah chingnyüthü kübü nanglak hatü Jerusalem shinei nyupü chingthü kübü nanglak, Benjamin kahmük hatü pehephi kahshangla kübü, phaüshang kahmük hatü Negeb kübü Shembüpalei shemei shuohhen jakpü moila, hatü lebü moila, hahying moila, ayingshü hatü menvih shuohpü moilathü koei peikahen.

²⁷ Shejao ammi Sabbath nyih Jerusalem penyüsha homei hanggo kotü neshüpü homei Sabbath nyih daülangi tuhtuh shei ngei epü nebangjema, ngei Jerusalem penyüshathü kü mechemao nemethen aw vamhühen hatü hapai penyüshathü hahtükhen.’ ”