JEREMIAH 12 - DAÜLANGPÜ LAIHING (BSI)

Jeremiah-i Kahvang kü Phepü

¹ Oh Shembüpa, ngei paoh nüng khüei ngelei nang shah deikülangmeyü, nüng-üng jiüshi chongkahen. Shejao nüng touei shahhing nang shah pheshah. Mehekei mangthüang daeishehünya? Mehekei shahhing ne-epüthü aokpü danghünya?

² Nüngi jom sheiteke, hatü jom tünglang yiüteke: jom longei betjük jüknyüke; Jomei jubenei düngei nüng jung enyüke, shejao jomei mongdang longi taidaitü nyüke.

³ Shejao Oh Shembüpa, nüngi ngei nyingnyeih; Nüngi ngei kü veishih, hatü doktuh– ngelei mongdang nüng mü nyüpeih. Jühen mithü kei jom shüei ngaituh, hatü jühen nyih shingvaishi hayaoha khaatei tuhtuh.

⁴ Meshük lushi kahdoki mahng thephen? hatü kah kübü phenha kaudaihen? Mehenangkü haleipü shennyakthü mang vaipü nangkü, Yemhimak hatü outhü peü mahdaikemteke. Nyeinya vaishi nanglakthüi, “Jen kü mehe vamhen ha büpai ne-eepih” shei enyüke.

⁵ Shennyak kü khüei mokteiyei nüng nyiujema, mekei etü koyeithü mü dokteiyei mokaokhen? Koshoya kü nüng huluh shuoh-ei dojema, mekei etü nüng Jordan yingnyü kü daiaokhen?

⁶ Nüngei jeihinaü hatü shem ami nüng yuhahteke; Jomi nüng khüei ngeüwong anteke. Jomi nüng jung meishi eküjao nüngi hathü kü hingnelem.

Shembüpa i Nanglakthü kü Mongmangpü

⁷ Ngei ngelei shem yakphongpeih, ngei ngelei mükjüp tuhphongpeih: Ngei ngelei mongdangi bampüba vepathülei lak kü shuohtükpeih.

⁸ Ngelei mükjüpü phaü leipü mailang kei leidaiteke. Pinnyüi ngei khüei ngeü an, hanangkü ngei pinnyü kü jiühitnyeih.

⁹ Ngei jepü nanglakthüyü ou hük kü alangthü thaiyei shing peü philei shontü shümpükei nyüke. Phaüyemthü kü peikahen nyüktuh, hatü mo kü omhütuh!

¹⁰ Kung am vanglem lempüthü longi peiyei ngelei nyalingngupai kah mangtük; jomi ngelei kah nyeütük; Jomi ngelei bamhüpü kahdok bhih kahdok leitükpeih.

¹¹ Jomi hapayü lavüngtoipü jahpan leitük; hayü ngei touei lavüngtoiyei nyüke. Kahdok kemei üpaiyao nejungpü phaü leitükteke.

¹² Bhih kahdok shangching koshoya peü kü vepathü peihen; Mehenangkü Shembüpalei yanlu-i hükao neyangi kahdok jung hük kübü jung hük thahshi hahtükhen.

¹³ Jomi hah sheiteke, shejao hüh vetteke; jom nyingi nyiueinangteke, shejao meheyao nanglei nedang. Shembüpai mongshihpü nangkü jom hahvetpeyü veüshi nyuhen.

Israel amei Chingyowthü kü Shembüpa i Lahpü

¹⁴ Ngei ngelei nanglak Israel am kü shuohpü kahdok mangtükpü Israel amei chingyowthü kü Shembüpai ha enyüke: Ngei jomphong jomei kahdok leipü bhitükhen hatü jom toueipü Judah am yanglanghen,

¹⁵ hatü ngei jom yah-ei daipheikü ngei jom kü phahjihen, hatü ngei shao jomei mükjüp kahdokei jom peü müei leihen,

¹⁶ hatü jomi ngelei nanglakthülei lemthü meishi nyingjema, hatü ngelei men kü lah-ei, “Shembüpayü vanyangyem Kahvang” shei shelei jomi Baal kahvang kü lahhen ngelei nanglakthü kü nyuhpükei dükjema, jomao ngelei nanglakthü mü chingchingei nyuhen.

¹⁷ Shejao mepa jati ha nebanghen, ngei chemjalak kü bhitükhen hatü mangtükhen shei Shembüpai enyüke.