JEREMIAH 11 - DAÜLANGPÜ LAIHING (BSI)

Jeremiah hatü Vangpüshuwpü

¹ Hapayü Jeremiah touei peipü Shembüpalei shah:

² “Hapa vangteishuwteipü leipü shah bangtuh, hatü hapa Judah nanglak hatü Jerusalemei nyupüthü kü etuh.

³ Nüngi hathü kü Shembüpa, Israel Kahvangi hapakei enyüke shei etuh: Ngei ambü ampa nyiamao nyaüpü Ijip kahdok leipü müei leishingkü shuohpü vangpüshuwpü kü üpai ken nehing,

⁴ büpa kü thaüvaü hettuh. Ngei am kü epü bangtuh, hatü lemphü düktuh, hatü amü ngelei nanglak vaihen, hatü ngeiyü ammei Kahvang vaihen.

⁵ Shejüang ngei ambü ampa kü amma hatü nyahjiü yenpü kahdok mepa ammi shinnyih yah-ei nyüpa, ha shuohhen shei vangpü jiühühen” shei ngei etepih. Ngei jangei, “Amen, Shembüpa!” shei e.

⁶ Shembüpai ngei kü, “Ha shahthü peü Judah jilathü hatü Jerusalem chingyangshong kü baongeishuoh. Vangpüshuwpü shahthü bangtuh hatü düktuh.

⁷ Ngei ambü ampa Ijip leipü müei daipü nyih mebü shinnyih thahshi, ‘Ngelei shah bangtuh’ shei leiyei leiyei shahvüng shuohpeih.

⁸ Shejao jomi ha nebang, nevaijü dhaong neshaang, shejao mong vaanei mangi mongpü lem kü peü kampeih. Hanangkü vangpüshuwpülei nyangei nyupü thaüvaü kemei jom touei peihüpeih, shejao jomi ha kao nebang” shei eteke.

⁹ Hahepak kü Shembüpai ngei kü e, “Judah nanglakthü khongkü hatü Jerusalemei nyupüthü khongkü phaüshah showei nyüke.

¹⁰ Ngelei shah nebang-ü shei chebü chepalei mang kü nyokei lüdaiteke. Jomphongü lebü kahvangthü chongphoei lüdaiteke. Israel hatü Judah am shem nyipheni ngei chebü chepathü mü lingpü vangpüshuwpü mangtükteke.

¹¹ Hanangkü Shembüpai hapakei enyüke: Ngei jom neyangaokhen mü shanghah hük shuohhen. Jomi ngei kü nyükjao ngei jom kü nebanghen.

¹² Judah jilathü hatü Jerusalem nanglakthü daiyei jomi ayingshü jakei khümpü kahvangthü kü nyükhen, shejao shanghah dhaümshing kü hathüi lanshei nesheühhen.

¹³ Ammei jilathü meshük nyu, hajükpa kahvangthü nyüke, Oh Judah, hatü Jerusalem chingyangshong meshük nyu, hajükpa am veühen linghahpü moidüthü, Baal kahvang kü moila shuohpü moidüthü nyüke.”

¹⁴ Jeremiah, nüngi hathü nanglak shing tephop, nevaijü jom shing tekhüm nevaijü teyü; mehenangkü jom ponghahpü hepak kü jomi ngei kü nyükjü ngei nebanghen.

¹⁵ Jomi hajük mang dükyaki ngelei shemei ngei bampü nanglakthü kü mehe jiüpü hean nyuhen? Lahpü hatü yemhimak moila shuohpai shanghah khaplükhen shei deihnyu je? Hapai mongmeihühen deihnyu je?

¹⁶ Chem Shembüpai am kü, “Thüngshingpü olive pü, meipü betjük jükpü” shei nyükhampeih, shejao longpü yinglükleisho ngüngpai büpai ha kü aw bahhühen, hatü hapalei kaothü hahtükhen.

¹⁷ Israel hatü Judah am shemi mang dükpü nangkü hatü Baal kahvang kü ayingshü jakpai mongshihhüpü nangkü am sheipü Shembüpa Kahvangi am khüei shanghah shuohhen temtükteke.

Jeremiah Khüei Phaüshah Showpü

¹⁸ Jomi ngei khüei phaüshah showpü Shembüpai ngei kü shakei vamei huphüteke, hatü hahepak kü jomi mehe dükei nyupa, ha ngei nyingpeih.

¹⁹ Shejao ngeiyü nenteiaokpü mi cheha jüshingei müei daipükei nyupeih. Jomphongi ngei khüei phaüshah showei, “Jeni hapa pü betjük mü agtükshah; büpalei men hajük kü deih-ei nedanghen shangmü jeni büpa yemmü nyupü kahdok leipü jütükshah” shei eteipü ngei nenyingi nyupeih.

²⁰ Shejao, Oh Jeiyong Shembüpa, nüngü shahhing shahphenbü, hatü mongdang sholi dokpüba, nüngi jom kü bhüh yempü kü ngei veishah; mehenangkü ngelei nang kemei nüng kü lanei shuohtüktih.

²¹ Anathoth am shennyakthü üami nüng jütükhen yanei, “Nüngi Shembüpalei men kü teteivanei te-e; hei nevaijema hamei lak kü mahhen” shei epüthü kü Shembüpai hapakei enyüke

²² Hanangkü Shembüpai hapakei enyüke: Ngei jom hanghihühen; nelathü yani mahhen, hapeüthü shaühile homei dihen;

²³ hatü jom hükao yemmü aoei netuhhen. Mehenangkü jom hanghihen bong kü ngei Anathoth shennyakthü kü shanghah shuohhen.