JEREMIAH 10 - DAÜLANGPÜ LAIHING (BSI)

Jeremiah hatü Vangpüshuwpü

¹ Am kü epü Shembüpalei shah bangtuh, Oh Israel phang.

² Shembüpai hapakei enyüke: “Lebü jatthülei lem kü tekam, nevaijü phumshangei vampü nyangeihepü douthü kü lebü jatthüi nyemjao ammi tenyem.

³ Mehenangkü hathü nanglakthülei vanglemü yahlak neshiü; jomi phaü leipü pü agnyüke, hatü mistrithü peikha noshi ha shangnyüke,

⁴ Jomi ha kü hon hi ngini ow lingnyüke; hatü ha neyüpyuhen nangkü kaoklak noshi kojal apnyüke.

⁵ Mükoh chongei ouhiyüh nyemhen nangkü lingpü lajei keiha jomei lajeithü nyüke; hathüi shah ehen neaoknyu. Hathü nekamaokpü nangkü koei dainyüke. Ammi hathü kü tenyem; hathüi mehe tenao nedükaokpih, nevaijü mehe meiyao nedükaokpih.”

⁶ Nüng kei üpayao neshiü, Oh Shembüpa, nüngü longpüba, hatü nüngei menü ngan kü wong kohpüba.

⁷ Üpai nüng kü dhüm neshuohhenang, Oh jatthü kü ongpa? Hapayü nüng kü shuohhen shangpü dhüm. Jatthü kü nahpülangpüthü peü khongkü, hatü ongchingthü peü khongkü nüng kei üpayao neshiü.

⁸ Jom peü sholi neshiüpü ngapathü; jom keyü yahlak neshiüpü pü lajeithüi nyuhpeih.

⁹ Kaoklaki shükpü nginü Tarshish leipü, hatü honü Uphaz leipü leipeih. Mepa mistri hatü hon shükbüi shükpa, ha kü thüngla hatü manghmepü ashak yah-ei ow shihpeih peü kemei lahhinpü mistrithüi lingpeih.

¹⁰ Shejao Shembüpayü hingshangpü Kahvang; büpayü vanyangyem Kahvang, nedohnetenpü Ongpa. Mechem büpa mongshihhen, kahdok jennyüpeih; jatthüi büpa mongshihpü nenenaoknyih.

¹¹ Nüngi hathü kü hapakei etuh: Kahvangthü mepai kahdok hatü vangshothü neling, lomi hapa kahdok hatü vangsho phang kübü mahdaihen.

¹² Shejao Kahvangi büpalei ngani kahdoknyü lingpeih; büpalei kihikoni kahdoknyü chongnyiam lingpeih, hatü büpalei danaokpü koni vangshothü paanei deishihpeih.

¹³ Mechem büpai vangmuk khunghen, vangsho leipü yung vaünyeih; büpai kahdok dohpü jung phileipü phum vamhünyeih. Büpai vang mü klang shomnyeih, hatü büpai tuhshing leipü vanglük ngainyüpeih.

¹⁴ Peü kemei sholi hatü kon neshiü; hon shükbüi büpai lingpü lajei eetü veünyüke. Büpalei lajeiyü lueilempü mon; hathüi ngü neheenyu.

¹⁵ Hathüyü yahlak neshiüpü lueilempü dou mon; mechem jom kü shahphenhen ngoihenshang jom peü mahhen.

¹⁶ Jakob Kahvangü hathü kei nevai; mehenangkü büpayü lemphü Lingbü; büpalei mükjüp jat Israel amao omei Shembüpa Kahvangü büpalei men.

Wüpküpei Daihen Nang

¹⁷ Mih-i shümlangtü nyupüthü, hapa kahdok tuhtü daihen ammei douhinang thaikemtuh.

¹⁸ Mehenangkü Shembüpai hapa enyüke: Hapa hepak kü ngei hapa kahdokei nyupüthü kü ngei dehilao vamhühen; Jomphongü mih peiyei neüei yahlanghen shingvaishi ngei jom kü shanghah shuohhen.

¹⁹ Nemei-i ma yahpü nangkü ngeiyü onyükei! Ngelei makaw nemei-ükhih! Shejao ngei ngei nyingi, “Hapayü ngelei hanghi, ngei ha nenhen khih” shei eteke.

²⁰ Ngelei ashakshem mangtük; hapalei vü kemei phentük. Ngelei hapeüthü ngei toueipü lüdaikem; hajük kü hathü neshiü. Ngei kü ashakshem vephahen üpayao aoei neshiü, nevaijü ngei loishing dhüm chanphahen üpayao neshiü.

²¹ Mi yombüthüyü sholi neshiü, hatü Shembüpa kü nephenyu. Hanangkü jom nedaneshe hatü jomei yemhimak kemei haidaipeih.

²² Bangtuh! Shahjang peikünyüke– Apshaphi kahdok leipü mophicheü longpü hük Judah kahdok lavüngtoiyei mahu nyuishing vaiyei tuhphonghen peikünyüke.

²³ Ngei nyingteke, Oh Shembüpa, shennyak hükei yangnyu kü laophü shembü nevai; üpaiyao laophülei yangnyu büpalei lakmongei neshiü.

²⁴ Oh Shembüpa, ngei neshiüi leidaimangkü nüng mongshih-ei nevai, shejao shahhingi ngei kü yeanpü yahshih.

²⁵ Nüng nenyingpü jatthü kü, nüngei men kü nenyükpü nanglakthü kü nüngei mongshih khüpeishuoh. Mehenangkü jomi Jakob lühtük; jomi büpa chemjalak kü lühtüktü büpalei kahdok mangtükpeih.