JEREMIAH 1 - DAÜLANGPÜ LAIHING (BSI)

Jeremiah

¹ Benjamin kahdok kü Anathothlei nyupü ngongpathü khong kübü Hilkiahlei cheha Jeremiah-i epü shah:

² Amonei cheha Josiah-i Judah kü vanglem lempü bong anpüjempabü kü Shembüpalei shah büpa touei pei,

³ hatü shao Josiahlei cheha Jehoiakimi Judah kü vanglem lempü hepak kübü Josiahlei cheha Zedekiah ongpai Judah kü vanglem lempü bong anpühükpabü dohpü lemei len ngapabü kü Jerusalem nanglakthü wüpküpei daipü thahshi Shembüpalei shah büpa touei peiyei eteke.

Jeremiah kü Nyükpü

⁴ Shaang Shembüpalei shah ngei touei peiyei eteke:

⁵ “Naü uoshingei ngei nüng lingshekü ngei nüng nyingei nyuhampeih. Nüng bühshekü ngei nüngü hayaoha khaatei tuhpeih; Ngei nüngü jatthü touei thibü hük vaihen jepeih.”

⁶ “Ah, Shembüpa Kahvang! Hingmei ngei shah mekei ehen nenyingnyih; mehenangkü ngeiyü longi hashih hih” shei ngei eteke.

⁷ Shejao Shembüpai ngei kü, “Ngeiyü hashih hih shei te-e; mehenangkü ngei nüng üam touei shomhen, hathü peü touei daihen, hatü ngei mehe nüng kü etuh shei e, ha nüngi ehen.

⁸ Nüngi hathü kü tenyem; mehenangkü ngei nüng mü nyüpeih, hatü nüng yanghen” shei eteke.

⁹ Hapheikü Shembüpalei lak ngei touei peiyei ngelei ju kü hongtü e, “Shaang ngelei shah nüngei ju kü shihtepih.

¹⁰ Veihümao, shinnyih ngei nüngü jatthü hatü ongchingthü bhitükhen, hatü vütükhen, mangtükhen hatü yaktükhen, linghen hatü sheihen shingvaishi jenyüpeih.”

Manghkhang Nyi

¹¹ Shembüpalei shah ngei touei peiyei “Jeremiah, nüngi mehe eenyüke?” shei eteke, hatü ngei jangei, “Ngei almond pükao hük eenyüke” shei e.

¹² Hahepak kü Shembüpai ngei kü, “Nüngi jiüshi eeteke; mehenangkü ngei ngelei shah jiüshi dhaümkahen veinyüpeih” shei e.

¹³ Shembüpalei shah shao ngei touei nyipabü peiyei, “Nüngi mehe eenyüke?” shei e, hatü ngei jangei, “Ngei laukpü dük hük apsha philei meeshi eenyüke” shei e.

¹⁴ Hahepak kü büpai ngei kü e: “Apshaphi leipü shanghah hük hapa kahmük kü nyupüthü peü touei vamhen.

¹⁵ Shaang ngei apshaphi leipü ongching jatthü peü kü nyüknyüpeih shei Shembüpai enyüke, hatü jom peü peiyei Jerusalem penyüshalei jomei ong uoshing linghen, hatü Judah kü shinpü bhamthü hatü chingnyüthü peü khüei yaonghen.

¹⁶ Jomei mang homei ngei yakphongpü nangkü ngei jom khüei shahphenhen; jomi lebü kahvangthü kü moila shuoh-ei jomei laki linghahpü lajeithü kü khümteke.

¹⁷ Shejao nüng payü shünglok loktuh, hatü yaongei ngei nüng kü epü lemphüli jom kü eyeishuoh. Nüngi jom kü tenyem, hei nevaijema jom touei ngei nüng longi nyemhühen.

¹⁸ Shejao shinnyih ngei nüngü kahmük peü khüei, Judah ongthü, ngongpathü hatü kahmük kü nyupü nanglak khüei yaonghen penyü showtükpü chingnyü, nyiam shemnyü hatü melangnyiami lingpü bham kei leihütih.

¹⁹ Jomi nüng khüei hokhen shejao jomi nüng neneü-aokhen; mehenangkü nüng yanghen ngei nüng mü nyüpeih” shei Shembüpai eteke.