JAKOB 5 - DAÜLANGPÜ LAIHING (BSI)

Shemmeithü kü Shahvüng

¹ Shaang bangtuh, am shemmeithü, am touei peiküpü mongmang nangkü theptuh hatü lentuh.

² Ammei mopthü shedaiteke, hatü ammei ashakviha dhaüpi hahtükteke.

³ Ammei hon hi ngin kü diü hetdaiteke, hatü hathü diü am khüei denpü nyuhen, hatü hapai awi kei ammei phai hahtükhen. Ammi dohpü nyihthü shing mop jaoei tuhteke.

⁴ Bangtuh! Ammei kahlei hahvet nang shapüthülei lat ammi kon lingei neshuoh-i tuhpai lennyüke, hatü hahvetpüthüi lenpü Jeiyong Shembüpalei dhaong ngoiteke.

⁵ Amphongü kahdoknyülei hüshemei mongong kü nyuteke; mohitap kü jühen tuhpü yem keiha am nyingi nitshüh-i leiteke.

⁶ Am khüei neyaongpü daülangpüthü ammi nyonghüei jüteke.

Shangpongpü Munenpü

⁷ Hanangkü jeihinaüthü, Shembüpa mangyiü thahshi nenteiaokei dantuh. Kahling ami kahdok leipü hahying vamjapü dannyeih hatü shongpü hatü nyipabü vang keipü omdannyeih.

⁸ Amao munentuh. Ammei mong wong kohtuh; mehenangkü Shembüpa peikahen yopailei nyüke.

⁹ Jeihinaüthü, am hüki hük khüei tenümnüm, shejüang am kü shah nephenhen. Veituh, Shahphenbü shadenei yaongshi nyüke!

¹⁰ Jeihinaüthü, shangpongpü kü munenpü lappü vaishiyü Shembüpalei men kü epü thibüthü yahtuh.

¹¹ Hingmei nenteiaokpü hupüthü kü hami moihimanpü shei nyüknyeih. Jobi munenpü ammi danphei hatü mekei Shembüpai phahji hatü shinshang, ammi Shembüpalei mükhong eeteke.

¹² Peü shak kü, ngelei jeihinaüthü, ammi vangsho nevaijü kahdok, nevaijü lebü mepayao noshi tevang, shejao hih shejü hih, nevai shejü nevai shei etuh, shejüang am nyonghüpü kü nevühen.

Hinglempü Phoppü

¹³ Amphong khongkü hanei shanghah-ei nyüpü je? Jomi phoptuh. Hanei ami mongongnyu je? Jomi menvih kesho loktuh.

¹⁴ Amphong khongkü hanei tüngei nyüpü je? Jomi attoi behethü nyükei jomi Shembüpalei men kü mainga nyio-ei tüngpüthü kü phoptuh.

¹⁵ Hinglemei phoppai tüngpü meihen, hatü Shembüpai jom phukei uohühen; büpai mang thah-ei nyujao büpa kü ha mang tükhen.

¹⁶ Hanangkü hüki hük shing phopteituh, shejüang am meihen. Daülangpüthüi phoppü kü ngan hatü wong kohshi nyüpeih.

¹⁷ Elijah-ü jen keipü shennyak hük nyuteke. Büpai vang nekeihen shingvaishi lanei phop, hatü kahdoknyü kü vang nekei-i bong jem mü bhaoei nyu.

¹⁸ Shao büpai phop, hatü vangsho-i vang shom, hatü kahdoki betjük jükhüteke.

¹⁹ Ngelei jeihinaüthü hatü nyahinaüthü, am hanei shahhing kübü yanei lüdaijema, hanei ami büpa müei leihen vongbong.

²⁰ Ha deih-ei dangtuh: Üami mang shennyak hük lemnyong kübü müei leihenshang, ha mang shennyakei laangha dihen kübü yanglanghen, hatü mang longi küpei tuhtüknyeih.