JAKOB 4 - DAÜLANGPÜ LAIHING (BSI)

Kahdoknyü kü Mongjem Pongpü

¹ Amphong khongkü depülaopü hatü neshetnephen meleipü vamhünya? Hathüyü yahhahhüpai ammei mongei deyeilaoei nyupü kübü vamnyu nevaipü je?

² Ammi lemhük nanyüke shejao ha nedangnyu; hanangkü ammi jünyüke. Ammi lemhük yahhüei deihnyüke hatü ha nedangjü ammi denyüke hatü neshetnephenpü vamhünyüke. Ammi ha neyüpü nangkü ammi nedangnyih.

³ Ammi yünyüke shejao nedangnyu; mehenangkü ammi dangpü yah-ei mongongmongle kü tükhen deihshi pungei yünyüke.

⁴ Mükbongjuyungpüthü! Kahdoknyü mü mongjem pongpeyü Kahvang mü vepa shei ammi nenyingnyu je? Hanangkü üami kahdoknyülei küphü vaihünya Kahvangei vepa leidainyeih.

⁵ Nevaijü jen kü nyuhüpü laanghayü Kahvangi büpa shing mon nyuhühen mükhühnyeih shei Laihingi epeyü meheyao nevai shei ammi deihnyu je?

⁶ Shejao büpai phahji nyeinya shuohnyeih; hanangkü Laihingi enyüke: “Kahvangi changmeipüthü khünyeih, shejao nenteiaokpüthü kü phahji shuohnyeih.”

⁷ Hanangkü am nyingi Kahvang kü lanei shuohtuh. Shepe khangei yaongtuh, hatü büpa am toueipü nyaidaiphahen.

⁸ Kahvang yopailei peikei hatü büpa am yopailei peikahen. Ammei lak daütüktuh, am mang shennyakthü, hatü ammei mongdang daütüktuh, am mong nyi kohpüthü.

⁹ Mongshangtuh, mahng theptuh hatü vaütuh. Am nyipüwapeyü mahng theppü, hatü am mongongpü mongmang leihütuh.

¹⁰ Shembüpa touei am nyingi maanpü leituh, hatü büpai am longei anshihhen.

Mih kü Shahphenpü Khüei Shahvüng

¹¹ Jeihinaü nyahinaüthü, am hüki hük khüei ten te-etei. Üami lebü khüei ten ehen, nevaijü shahphenhen, shahkung khüei ten enyüke hatü hapa shahphennyüke. Shejao ammi shahkungi shahphenjema, amphongü shahkung bangpüthü nevai, shejao shahphenbüthü leinyüke.

¹² Yanghen aokpü hatü mahtükhen aokpü shahkung shuohbü hatü shahphenbü hük nyüke. Shejema laophülei chingyowpalei shahphenhen am üpaang?

Ngenyih Nang Deih-ei Awdapü

¹³ Shaang bangtuh, “Shinnyih nevaijü ngenyih hapa jilalei daihen hatü bong hük halei bhei leih-ei lop latei nyuhen” shei epüthü.

¹⁴ Shejao ngenyih mehe koei peikahen nyingei neshiü. Yangnyu-ü meheang? Mehenangkü amphongü kansho hük mon eetü mahdaipü ngü khih.

¹⁵ Haleimeyü amphongi, “Shembüpai mongjema, jen nyuei hapa nevaijü antepa dükhen” shei ehen vaipeih.

¹⁶ Hapakei am changmeiyei awdanyüke; hapakei awdapü peü mang nyüke.

¹⁷ Hanangkü üpai jiüpü dükhen nyingtü ha nedükhen, mang thahnyüke.