JAKOB 3 - DAÜLANGPÜ LAIHING (BSI)

Yei Shümaokpü

¹ Ngelei jeihinaü nyahinaüthü, amphong longshi shing nyuhbüthü neleihen vongbong; mehenangkü jen üami nyuhnya hathü kü nyeishi wong mü shahphenhen.

² Jen peüi longi pungnyüpeih. Üpai epü kü nepung, büpayü changpüshapü, hatü laophülei büm kemei shümei tuhaokpü nyüke.

³ Jenei ven danhühen shingvaishi jeni koyeilei ju kü nyiam mahüjema jeni jomei büm kemei müteiaoknyeih.

⁴ Hei nevaijü jahas kü veihümao: Jom ahshi longpü nangkü wong kohpü vanglüki jom mühühen nanyüke, shejao hapa yüpbüi mongpü lemei maanpü ailüngi münyüke.

⁵ Hapa keiha yeiyü maanpü phaihan hük, shejao hapai longi awdanyeih. Maanpü awlah-i mekei longpü jahpan hahtüknya deih-ei dangtuh.

⁶ Yeiyü aw khih. Hapayü jenei büm phaihan khongkü mangei kahdoknyü. Hapai büm kemei tentüknyeih, yangnyu lem kemei aw kü jaktüknyeih hatü laophü nyingi molo aw kü shukdainyeih.

⁷ Mehenangkü yemlem laolao, ouhiyüh, biühimak hatü yungching yemhimak peü yepei haümaoknyeih hatü hangkui yepei haümhampeih,

⁸ shejao üpaiyao shing nenüngpü ten, dihen leü maei nyupü yei yepei neaoknyih.

⁹ Hapai-üng jeni Shembüpa, hatü Pa men vihnyüke, hatü hapai-üng Kahvang leshi lingtükpüthü kü jeni thaüvaünyüke.

¹⁰ Ju hük kübü-üng menvih hatü thaüvaü vamnyüke. Ngelei jeihinaü nyahinaüthü, hapakeiyü nevaihen vaipü khih.

¹¹ Yunglok hük kübü daülangpü yung hatü shahyakpü yung chemi vamnyu je?

¹² Ngelei jeihinaü nyahinaüthü, adhapüi olive, nevaijü nyalingngupai-i adhajük jükaokhen je? Shahyak yungi daülangpü yung nevamaokpih.

Kihikon Lemnyi

¹³ Amphong khongkü nahpü hatü danaokpü üpa nyüpa? Ammei douthüyü kihikon kübü bühpü inpünyaipü homei düknyu khih shei ammei yangnyu meipai hutuh.

¹⁴ Shejao ammei mongdangei shahyakpü mükhüh mongyung hatü laophü shing mon deihjema, am techangmei, hatü shahhing tenyongtük.

¹⁵ Hapa keipü kihikonü shangphi leipü nepeinyih, shejao hayü kahdoknyülei, laangha neshiüpü hatü shepelei nyüke.

¹⁶ Melei mükhüh mongyung hatü laophü shing mon deihpü nyuhenshang, halei benpülangpü hatü lemphü ten nyüpeih.

¹⁷ Shejao shangphi leipü kihikonü shongpü kü daülangpü, hapheikü chingmei, bampü, inpünyaipü, deih-ei dangaokpü, phahji-i mapü, hatü betjük meipü, baong hanpü neshiüpü hatü akhümmong-üm neshiüpü nyüke.

¹⁸ Chingmei lingpüthü üami chingmei kü hainya daülangshemshepü vethen vamhünyeih.