JAKOB 1 - DAÜLANGPÜ LAIHING (BSI)

Selam Shah

¹ Jakob, Kahvang hatü Shembüpa Jisu Khristalei chongphobüi kahdoknyü kemeilei haidaipü jat anpünyi touei selam.

Hinglempü hatü Kihikon

² Ngelei jeihinaü hatü nyahinaüthü, mechem ammi menüng keipü dokpü heühenshang hayü meheyao nevai, shejao mongong shei deih-ei dangtuh;

³ mehenangkü am hinglempü kü dokpai nenteiaokpü vamnyeih shei ammi nying;

⁴ hatü am munenpai hapalei dou changhütuh, shejüang am behe leiyei, changeishaei mepa kao netaohen.

⁵ Am hanei kihikon kü taojema peü kü bhashahshi hatü nekaungi shuohpü Kahvang kü yütuh, hatü ha am kü yahphahen.

⁶ Shejao hingshangpai nejü-üi yütuh; mehenangkü üpai jü-ünya büpayü vanglüki duei hungteipü yungching yungmok kei nyüke;

⁷ Henüng shennyaki SHEMBÜPAleipü meheyao danghen shei tedeih;

⁸ büpayü mong nyi kohpü, büpai dükpü peü kü shing nenüngpü shennyak.

Shemmei hatü Taopa

⁹ Taopü jeihinaüi büpalei laphen dokpalei anpü nangkü mongmeituh.

¹⁰ hatü shemmei vaipü jeihinaü hüki büpa phangpa laphenei shapü nangkü mongmeituh; mehenangkü mophimo-ü phaü leipü chübong keiha laaidaihen.

¹¹ Mehenangkü nyahpü shaampü kohshi vanghenyü aongnyeih hatü pühivung kautüknyeih; haleipü chüthü vüdainyeih, hatü hapa nethe meipü mahdainyeih. Hapa aihük mü shemmeithüao nyüpeih; nang nekongi yangnyu nyushingkü jom mahdaihen.

Dokpü hatü Mong Bompü

¹² Dokpü peishingkü üpai hinglemei nyu, büpa moihiman. Hapa keipü dokpü kü aokpü shennyak kü Shembüpai büpa kü bampüthü kü shuohhen lahpü yangnyu athen shuohhen.

¹³ Mechem dokpü peihenshang üpaiyao, “Ngei kü Kahvangi doknyu khih” shei te-e; mehenangkü Kahvangi ten yah-ei nedoknyih, hatü büpai üpa kao nedoknyih.

¹⁴ Shejao shennyak hük mechem laophü yahhahhüpai yawh-eiyangei lüdaihenshang dokpü peinyüpeih.

¹⁵ Hapheikü laophüi yahhahhüpai büm nekongi leipheikü hapai mang bühnyeih; hatü hapa mang mechem lomei longhen, dipü bühnyeih.

¹⁶ Bampü jeihinaüthü, am telutelemhah.

¹⁷ Meipü hatü den ngoipü thintho peü shangphi leipü nejeilepü, nevaijü jeileipai vangnyak nevamhüpü vangsho vangngaithülei Pa leipü peinyeih.

¹⁸ Jenphong büpai lingpü peü mü shongpü betjük leihen shingvaishi büpalei mükhong jiühüei büpai jen shahhing shah-i bühpeih.

Shah Bangei Dou Leiyei Dükpü

¹⁹ Ngei bampü jeihinaüthü, ha nyingtuh: Peüi danhen shülangtuh, youngmü etuh, mongshih youngmü vamtuh;

²⁰ mehenangkü am mongshihpai Kahvang daülangshemshepü nevamhünyih.

²¹ Hanangkü nedaünelangpü hatü ten dükpü peü yaktüktuh hatü inyainyempai nüngei laangha yanghen ngan kohpü mongdangei sheipü shah yahtuh.

²² Shejao amphongü dan mon dantü laophü nyingi luhahpü am nevai, shejao shah-i dou leiyei dükpü am leituh.

²³ Mehenangkü hanei ami shah danpü am vaitü dou dükpü am neleijema, jomphongü laophü nyingi aina kü veipü am lenyüke;

²⁴ mehenangkü jomi aina kü veitü daiyei jom mekei nyupa lomi bedainyüke.

²⁵ Shejao üami bümei leihüpü changpüshapü shahkung kü lekei veihen, hatü mehe dan ha nebetüki nedoh-i dükei daijema, jomi dükpü kü jom kü moihimanhen.

²⁶ Hanei ami laophü nyingi vaipü am shei deihjema, hatü laophülei yei neshümaokjema, büpa vaipeyü angsha, hatü laophü nying luhahnyüke.

²⁷ Kahvang jenei Pa-i yahhüpü daülangpü hatü pungpü neshiüpü vaipü vanglemü hapa hih: hashihhathü hatü vaümnyüthü shanghahpü kü veihen hatü kahdoknyüi sheihtükhen kübü laophü yangei nyupü ha hih.