ISAIAH 9 - DAÜLANGPÜ LAIHING (BSI)

Jen kü Yeshang Hük Bühteke

¹ Shejao hanghi kü nyupüthü shingvaishi shangmang nechongkahen. Peihdaipü hepak kü büpai Zebulun hatü Naphtali kahdok bhih-ei maanei shanshihteke, shejao ngoikahen hepak kü hapa kahdok Mediterranean Yungching kübü Jordan yungdang Kung am nyupü Galil thahshi büpai müknyinshekhang dhüm shuohhen.

² Vangnyak kü kampü shennyakthüi vangngai longpü eeteke; shangmang kahdok kü nyupüthü kü vangngai-i khangteke.

³ Nüngi hapa jat longhüteke; nüngi jom nyeinya mongonghüteke. Hah vetshingkü mongongpükei, nevaijü vehok neütü yah-ei leipü mop hanjü mongongpükei, nüngi dükpü dou kü jomi mongongnyüke.

⁴ Mehenangkü Midian am neütükpü nyih kü keiha, nüngi nüngei nanglakthülei bhagchong kübü kenh, hatü jom kü bheipü nyiamlüng mangtükteke.

⁵ Vehok kü thuhpü veshanthülei lathuh peü, hatü iy hoitükpü owhilang peü aw kü jaktükhen.

⁶ Mehenangkü jen kü naü hük büh-ei nyüke, jen kü yeshang hük shuoh-ei nyüke, hatü vanglem lempü büpalei bhagchong shangkü nyuhen. Büpa kü kahmükvangphapü, Shahnying Venbü, Jeiyong Kahvang, Nedohnetenpü Pa, Chingmei Ongpa shei nyükhen.

⁷ Büpalei longhiong ngan longkhan longhen, hatü chingmeivangmei nedoh-i nyuhen. Büpai David ongpalei ong uoshing, hatü büpalei ongching kü shahhing hatü daülangshemshepai, shaang mebü dohpü neshiüi vanglem lemhen. Jeiyong Shembüpa nyakpükenpai ha dükkahen.

Shembüpa i Israel am Hanghihühen

⁸ Shembüpai Jakob khüei shahjang shomteke, hatü hapa jiüshi dhaümteke;

⁹ hatü Ephraim hi Samarialei nyupüthü peüi ha nyingteke, shejao jomei mong kü changmeipü hatü maühepai jomi,

¹⁰ “Itayaongi vepü shem laamdaiteke, shejao hami yaonglang shangkü shao vehen, adhapüi vepü shem bentükteke, shejao cedar pü yah-ei ha kü jeihen” shei eteke.

¹¹ Hanangkü Shembüpai jom khüei vepathü vamhü, hatü jomei vepathü mongnang thonghüteke.

¹² Aram am heongphi leipü, hatü Philistia am heshüphi leipü peiyei ju katü Israel am lühtükteke. Hapaiyao büpa mongshihpü nemeinyu; büpalei lak shaang thahshi noshi nyüke.

¹³ Shembüpai hajük Israel am kü hanghi shuohjao, mong lepei nelei, nevaijü büpa neyemnyu.

¹⁴ Hanangkü Shembüpai Israel amei mei hatü shangjing daktükhen, nyihcha kü palm püthü hatü pingu kemei aütükhen;

¹⁵ behe hatü longhivangthüyü shangjing, hatü shahshem nyuhpü thibüthüyü mei.

¹⁶ Hapa nanglak müpüthüi jom lem pungei mü, hatü jomi müei daipüthü peü ai mah-ei tuh.

¹⁷ Hanangkü Shembüpai thehilathü kü neshinshangnyu, nevaijü jomei hashihha hatü vaümnyüthü kü nephahjinyu; mehenangkü peüi Kahvang nenying, hatü mang dükpüthü mon, hatü peüei jui ngashah enyüke. Hapaiyao büpa mongshihpü nemeinyu; hatü büpalei lak shaang thahshi noshi nyüke.

¹⁸ Hingmei mangü aw keiha bahnyüpeih; hapai hühhihang hahtüknyeih; hapai shüying kü aw bahhünyeih, hatü shang philei awshit temmü temmü lepei aongnyeih.

¹⁹ Jeiyong Shembüpa mongshihpai kahdok hahtük, hatü nanglakthü awbhaong kübü pü kei leitük; üpaiyao haleipü neyangaokpih.

²⁰ Jomei lakdah phi-i lühhen, shejao aeipü nemeihen; laknyong phi-i hahhen, shejao hüneshemhen. Shennyak peüi laophülei hapeü jüei hahhen.

²¹ Manasseh ami Ephraim am hahhen; Ephraim ami Manasseh am hahhen; jom chemi Judah am khüei yaonghen. Hapaiyao büpa mongshihpü nedoh; büpalei lak shaang thahshi noshi nyüke.