ISAIAH 8 - DAÜLANGPÜ LAIHING (BSI)

Isaiahlei Cheha Homei Lappü Shuohpü

¹ Shembüpai ngei kü, “Yaongshung longpü hük yahtuh, hatü hapa kü laknyang kuk longshi Maher-shalal-hash-baz shei nyangtuh,

² hatü mongnyangaokpü denbü vaishi Uriah ngongpa hi Jeberekhiahlei cheha Zekhariah nyi yahtuh” shei ephüteke.

³ Kanja angpheikü ngelei shembünyü büm nekongi lei, hatü yeshang hük büh. Hahepak kü Shembüpai ngei kü, “Büpa kü Maher-shalal-hash-baz shei mentuh.

⁴ Hapa naüi, ‘Onyü’ nevaijü ‘Opa’ shei nyükhen nyingshekü Damaska amei mophimo hatü Samaria amei dounyünangba kemei Assyria ongpai koei lüdaihen” shei eteke.

Assyria Ongpa Peipü

⁵ Shembüpai ngei kü shao eteke:

⁶ Mehenangkü hathü nanglakthüi nenmü yenpü Shiloah yungyen tuhphongtü Rezin ongpa hi Pekah ongpa nyi kü nyempü nangkü;

⁷ Shembüpai jom khüei Euphrates yungnyü büng keiha Assyria ongpa mü büpalei veshanthü müei peihen; hapayü yunglemthü peü linei yungphaang küpei longhen;

⁸ hapai Judah kü nyüpmaohangküei maoei shanhen, hatü üng thahshi longhen, hatü hapalei yang paanpai kahdokba kemei jümlanghen, Oh Immanuel.

⁹ Chemi vehok ngeü antuh, nanglakthü, hatü nyemtuh! Am tailu kahmükthü bangtuh. Hokhen temtuh, shejao nyemtuh! Hokhen temtuh, shejao nyemtuh!

¹⁰ Küpjanthü lingtuh shejao aokpü nedangpih; aokpüshük shah shükteituh, shejao yahlak neshiü; mehenangkü Kahvang jen mü nyüke.

Shembüpa i Thibü kü Shahvüng Shuohpü

¹¹ Shembüpai büpalei wong longpü laki hongtü ngei kü hathü shennyakthülei lem kü tekam shei shahvüng yahphopeih. Büpai,

¹² hathü shennyakthüi phaüshah showpeih shei epü kü nüngi hayü khih shei te-e; hathüi nyempü kü nüngi tenyem.

¹³ Shejao Jeiyong Shembüpa, büpa mon daülangpü shei deihtuh; büpa kü mon ammi nyemei hanei deihtuh.

¹⁴ Mehenangkü büpa ahshi daülangpü vaipü nangkü Judah hatü Israel ongching nyiphen kü büpayü huluh yaong, hatü jom dohen yaongnyü vaihen– Jerusalem am shingvaishi taikam hatü hühhihang leihen.

¹⁵ Jom longi huluh shuohtü dohen, hatü ngümtükhen; jomphong taikam kü mantü yah-ei lüdaihen.

Yimpi kü Phepü Nangkü Shahvüng

¹⁶ Ngelei denpü shahjangmei yomtuh, hatü shahkungthü ngelei nanglakthü mü jungeilangei tuhtuh.

¹⁷ Jakob am shem kübü dhe jolangpü Shembüpa kü ngei omdanhen hih; ngei büpa kü hinglemhen hih.

¹⁸ Shembüpai ngei kü shuohpü hashihthü mü ngei hammü nyüpeih. Hamphongü Israel am shingvaishi Zion Kahshangei nyupü Shembüpalei dou hük hih.

¹⁹ Mechem shennyakthüi ngeü lemmü lemmü vamei lashüh tetpüthü, hatü phongyompüthü kü phetuh shei ephahenshang, nanglakthüi laophülei Kahvang kü nephehen je? Yemmü nyupü am nangkü yimpi am kü mehekei phenya?

²⁰ Shahkungnyü vaijao, denpü vaijao jomi hapa shah keiha ne-ejema, jom kü vangngai neshiü.

Shanghahhen Hepak Hük

²¹ Shanghahpai hatü aeipai jomi kahmük kü longteihen; mechem jom aeihen, hatü mongshihhen, jomi shang philei veitü jomei ongpa, hatü jomei Kahvang kü thaüvaühen. Jomi shang philei veihen,

²² nevaijü jomi kahdokei veihen, shejao jomi shanghah, vangnyak hatü nyempühanpü mon eehen, hatü jomü shangmang vangnyakei shüktükhen.