ISAIAH 66 - DAÜLANGPÜ LAIHING (BSI)

Shembüpa i Jatthü Shahphenpü

¹ Shembüpai hapakei enyüke: “Vangsho-ü ngelei ong uoshing, kahdoknyü-ü ngelei la shoupshing. Menüng keipü shem amphongi ngei kü melei vephahenang? Ngei nyiumeihen shing melei nyüpa?

² Hathü douthü kemei ngelei laki lingpeih; hanangkü hathü kemei ngelei shei Shembüpai enyüke. Shejao üpai maanpü leiyei mong lepnya, hatü nyemei ngelei shah bangnya, ngei henüng shennyak lümnyeih.

³ Üpai mohohbaong jüei moilanya, büpayü shennyak jüpü keipü hih, hatü üpai mi cheha moilanya, büpayü shi üng kü vetpü keipü hih; Üpai hahying moila shuohnya, büpayü ookei iy moilapü keipü hih, hatü üpai ayingshü jakei moila shuohnya, büpayü lajei kü khümpü keipü hih. Jomi laophüi lümpü lemthü jeteke, hatü jiühitnalaipü dou kü jom mongmeinyüke.

⁴ Hanangkü jomi düngei nyemei nyupü shanghah ngei koei peihen, Mehenangkü mechem ngei jom kü nyük, jom üpaiyao nejang, mechem ngei e, ha üpaiyao nebang. Jomi ngei touei mang dükhen jeteke, hatü mehe kü ngei mongneong, ha jomi jeteke.”

⁵ Am üami Shembüpalei shah kü nyemnya, büpalei shah bangtuh: “Ammei jeihinaüthü üami am kü jiühitnya, hatü ngelei men kü amphong laktük hathüi eteke, ‘Hami am mongongpü eehen shingvaishi Shembüpa müknyinshekhanghütuh’ shejao jomphongü veühühen.”

⁶ Chingnyülei mophicheüpü ngeü; Phopshem leipü ngeü! Shembüpai vepathü kü bhüh yempü ngeü kü bangtuh!

⁷ Pinnyüi aokvom tüngshekü hapeü angnyüke; pinnyü kü tüngpü peishekü yeshang bühnyüke.

⁸ Üpaiyao henüng keipü danla? Üpai henüng eeyei nyüpa? Nyihcha hük kü kahmük hük bühnyu je? Kansho hük mong aa kü jat hük lingnyu je? Melak aa kü shangü Zionü aokvomi tüngnyüke, pinnyüi laophülei hapeüthü angnyüke.

⁹ Ngei naü uoshing apphei kü naü ne-angi tuhnyu je? shei Shembüpai enyüke. Am yangpü ngei ammei naü uoshing küptükphahen je? shei ammei Kahvangi enyüke.

¹⁰ Jerusalem mü mongongtuh, pinnyü nangkü mongmeituh, amphong pinnyü kü bampüthü; Mongongpai pinnyü mü mongongteituh, am pinnyü nangkü mahng theppüthü peü.

¹¹ Naü hüki laophülei nyühaüm kü choipükei, amphong hüshemei mongonghen; Pinnyü kübü moihiman aüh-ei yenpai am moh-ei yinghen.

¹² Shembüpai hapakei enyüke: “Ngei yungnyüyen keiha pinnyü kü chingmeivangmei shuohhen, hatü jatthülei mop yungnyübüng keiha shuohhen; Nyüi hapeü kü jungpü keiha amü pinnyülei lak, hatü shüngkung shangkü paümshi junghen.

¹³ Nyü hüki laophülei hapeü nyiumeihüpü keiha, ngei Jerusalemei am nyiumeihühen.

¹⁴ Ammi ha eetü ammei mongkü mongongkahen; ammei bümao phenha longpükei nyuhen, hatü hapai-üng Shembüpalei lakü büpalei chongphobüthü mü nyüke, hatü büpalei mongshih büpalei vepathü mü nyüke shei nyinghen.

¹⁵ Mehenangkü Shembüpayü aw mü peikahen, hatü büpalei koyei khariyü alüngleple keiha heihkahen; Büpa mongshihpai laophülei mongshih, hatü lohpümangpü awlom keiha peikahen.

¹⁶ Mehenangkü aw mü hatü laophülei yanlui Shembüpai shennyakthü peü kü shahphenhen, hatü Shembüpai jüpüthü longi chongkahen.”

¹⁷ Shembüpai enyüke: “Üami lebü kahvang kü khümhen, laophü nyingi daüeilangtüktü khongnyü mü hatü ookphai hatü yüphüh hatü lebü jiühitnalaipü hetlem hahpüthü mü vukei daihen, jom peü chemi mahkemhen” shei Shembüpai enyüke.

¹⁸ Shembüpai enyüke: “Ngei jomei douthü hatü jomi deihpü nyingnyeih, hatü ngei jatthü hatü shahlem laolao epüthü peü thaihen peihen, hatü jom peü peiyei ngelei müknyinshekhang eehen.

¹⁹ Ngei jomphong kü nyangeihepü hük shuohhen, hatü jomphong khongkü hanei yangei nyupüthü Tarshish, Libya, hatü Lydia (lahhan meishi kap-aokpüthü), Tubal hatü Greek hatü ngelei men mangdanpü hatü ngelei müknyinshekhang mang-eepü tailu kahdokthülei ngei jomphong shomhen. Jomphongi ngelei müknyinshekhang jung jatthü kü baonghen.

²⁰ Shembüpa kü moila vaishi jomphongi ammei jeihinaüthü jatthü peülei haidaipü Jerusalemei koyei kü, gadu kü, hatü ut kü, koyei khari kü hatü khari kü Israel ami hahying moila daülangpü shung kü Shembüpalei shemei deipükei müei leikahen,

²¹ hatü ngei amphong khongkü hanei ngongpa hatü Levi am vaihen jehen.”

²² Shembüpai enyüke: “Ngei lingpü vangsho jathü, hatü kahdoknyü ja denden kü nyupü keiha ammei men hatü hühihathü denden kü nyuhen.

²³ Lenja hük kübü hük thahshi, Sabbath hük kübü hük thahshi hangkuli peü peiyei ngei touei aümei khümhen.

²⁴ Jomphong daishingkü jom khüei yaongpüthülei mahng jomi eehen; jomei büm kübü laong nedihen, nevaijü jom kü bahpü aw nemetdaihen, hatü jomphongi hangkuli peü touei jiühitbenüng leidaihen.”