ISAIAH 65 - DAÜLANGPÜ LAIHING (BSI)

Shahphenpü hatü Yemleipü

¹ Ngei kü nephepüthü touei ngei shakei vamei hupeih; Ngei neyempüthüi ngei yemei dang. Ngelei men kü nenyükpü jat kü, “Ngei hammü nyüpeih, ngei hammü nyüpeih” shei epeih.

² Helushoei nemeipü shennyakthü, nemeipü lem kü kampüthü, laophüi deihpükei daipüthü,

³ düngei ngelei dhe kü ngaakshi epüthü, pemongei moila shuohpüthü, hatü lebü kahvangthü kü ayingshü jakei khümpüthü,

⁴ mahngchongei uoshi, vangnyak joshi paümteipüthü, ookphai hahpüthü, dük kü jiühitnalaipü phai cheüteipüthü;

⁵ Nüng khaatdaishih, “Nüng meyü ngei longi daülangpeih” shei epüthü touei ngelei lak haongshi nyüpeih. Hapa keipü shennyakthüyü ngelei shongsha kü awshit, hatü helu bahshi thempü aw khih.

⁶ “Veituh, hapayü ngei nyangtüktü nyüpeih; Ngei nenmü nenyupih, jomi dükpü shangshi shuohhen; Ngei jomi dükpü shangshi

⁷ Jomi dükpü mangthü kü ngei shemhen” shei Shembüpai enyüke. Mehenangkü jomi kahshangthülei moila shuohteke, hatü shangtaothülei ngei nang nemei-i epeih. Jomi shelei dükpü doulemthü kü shettü ngei hapa kü nekomi nyokei shemhen.

⁸ Shembüpai hapakei enyüke: “Nyalingngupai choung kübü yiü vamnyeih shei nyingei shennyakthüi, ‘Ha temangtük, halei moihiman nyüpeih’ shei epü keiha, Ngei ngelei chongphobüthülei men kü ngei jom nemahtükpih.

⁹ Ngei Jakob kübü hühihathü, hatü Judah leipü ngelei kahshangthü mükjüp yahhenthü vamhühen; Ngei jepü nanglakthüi hathü mükjüp yahhen, hatü ngelei chongphobüthü halei nyuhen.

¹⁰ Ngei yempü ngelei nanglakthü shingvaishi Sharonü jomei mithüi het hahshing, hatü Akhor kahjiyü jomei yemhathü lemeilehen shing vaihen.

¹¹ Shejao am üami Shembüpa yaktük, üami ngelei daülangpü kahshang betük, üami lashüh tetpü kahvang kü khümei yiü lem longi vuktü shuohnya;

¹² Ngei amphongü yani mahhühen, hatü am peüi jüpü am kü aümei khümhen; Mehenangkü mechem ngei am kü nyükpa, amphongi ngei kü nejang, mechem ngei epa, amphongi nebang, Shejao ngei touei mehe mang ammi ha dük, hatü ngei mepa kü mong nehah, ammi ha dükpeih.”

¹³ Hanangkü Shembüpa Kahvangi hapakei enyüke: Ngelei chongphobüthüi hahhen, shejao amphong aeiyei nyuhen; Ngelei chongphobüthüi yinghen, shejao am yung leyei nyuhen; Ngelei chongphobüthüi mongonghen, shejao am veühühen;

¹⁴ Ngelei chongphobüthüi mongkü mongongpai kesho lokhen, shejao amü mongkü tüngpai thephen, hatü laangha mangei mahng thephen.

¹⁵ Ammei menü ngei jepüthüi thaüvaüteihen shingvaishi tuhphonghen, hatü Shembüpa Kahvangi am dihühen; shejao büpa chongphopüthü kü büpai lebü men shuohhen.

¹⁶ Üami hapa kahdokei moihiman yühen, shahhing Kahvangi ha moihimanhen; Üami hapa kahdokei vangeishuwhen, shahhing Kahvangei men kü mon vangeishuwhen. Mehenangkü peihdaipü shanghahthü bedaihen, hatü ngelei müksho kübü ha jodaihen.

Vangsho Ja hatü Kahdoknyü Ja

¹⁷ Veituh, ngei vangsho ja hatü kahdoknyü ja hük linghen. Peihdaipü douthü deih-ei nedanghen, nevaijü hathü mongkü leyei nepeiküpih.

¹⁸ Shejao ngei mehe lingkahen ha kü ammi mongongtuh hatü mongmeituh; Mehenangkü ngei Jerusalemü mongongbenüng, hatü haleipü shennyakthüyü mongmeibenüng vaishi linghen.

¹⁹ Ngei Jerusalem kü mongonghen, hatü nanglakthü kü mongmeihen. Hajük kü halei theppü hatü vaüpü eepü ngeü nedanhen.

²⁰ Hajük kü halei aküngnaüha dipütoipü nenyukahen, nevaijü den nelui dipü bahijei nenyukahen. Üpai bong kho hük lomei dihen, hapayü nethe dipükei deihhen, hatü üpai bong kho hük nelomi dihenshang büpayü thaüvaü homei khih shei deihhen.

²¹ Jomphongi bükhishemthü veyei halei nyuhen, jomi nyalingngupai sheihen, hatü haleipü betjük hahhen.

²² Hajük kü jomi vepü shem kü mih nenyuhen, nevaijü jomi sheipü mih-i nehahhen. Pü hükei den lupü keiha ngelei nanglakthü yangnyu shoshoshi nyuhen.

²³ Jomi angsha kü dou dükei nenyuhen, nevaijü denshohvanlohhen hapeü nebühhen; Jomü Shembüpai moihimanpü nanglakthü vaihen, hatü jomei hühihathüao hapakei nyuhen.

²⁴ Jomi nyükshekü ngei janghen, jomi mang-e shekü ngei danhen.

²⁵ Shuw hatü mi cheha nyi chemi het hahhen, mailangiyao mohoh-i keiha hahtang hahhen; shejao biüei hahyingü bhihla nyuhen. Ngelei daülangpü Zion Kahshangei jom hüki hük kü neketteihen, nevaijü nejüteihen shei Shembüpai enyüke.