ISAIAH 64 - DAÜLANGPÜ LAIHING (BSI)

¹ Oh nüng paoh vangsho shaden aptüktü yiükülangmeyü kahshangthü nyemei kheühah shepeih.

² Pü kü aw bah-ei yungdük laukpükei, nüngei men vepathü kü nyinghühen, hatü nüng touei jatthü kheühühen shingvaishi nüng yiükei!

³ Hami nedeihnelepü kü mechem nüngi nyempü hanpü dou dükpa, nüng yiüjajü kahshangthü nyemei nüng touei kheüteke.

⁴ Nüng kü hinglemei omdanpüthü kü nüngi dükpü keiha mepa kahvangiyao dükpü jung, üpalei dhaongiyao mangdan, hatü üpalei mükiyao mang-ee.

⁵ Mongongshi jiüpü dükpüthü, hatü nüng deih-ei dangpüthü kü nüng peiyei sheühnyüke. Shejao hami mang thahpü nangkü nüng mongshihteke, ham pungpü nangkü nüngei dhe jolangpeih.

⁶ Ham peüi mang thahteke, hatü hamei daülangpü douthü kemei ashakten kei leidai; Ham peü phenlak lei kaudai, hatü vanglüki keiha hamei mangi ham maoei lüdai.

⁷ Nüngei men kü üpaiyao nenyük, nevaijü nüng kü neshong; Mehenangkü nüngei dhe ham toueipü jolang, hatü hamei mang tata kü ham yakphongteke.

⁸ Shejao Oh Shembüpa, nüngü hamei Pa; hamü haüm kahdok, nüngü dük shükbü; ham peü nüngei laki lingpü nüngei lakdouthü.

⁹ Nüng ahshi mongshih te-ankei, Oh Shembüpa, hatü denden kü hamei mang deih-ei tedangkei. Hamü nüngei nanglakthü, phahjishihma.

¹⁰ Nüngei daülangpü chingnyüthü phaü leidaiteke, Zionü yingnyü yingchong, hatü Jerusalemü lavüngtoiyei leidaiteke.

¹¹ Hamei bühipai nüng kü menvih shuohhampü hamei daülangpü Phopshemü awi shamtükteke, hatü hamei veinyuhüpü shingthü peü lavüngtoidaiteke.

¹² Hathü peü eetü, Oh Shembüpa, nüngi meheyao nedüki nenmü nyudaihen je? Hatü hami nenenaokhen mü ham kü hanghi shuohhen je?