ISAIAH 61 - DAÜLANGPÜ LAIHING (BSI)

Shembüpa i Bampü Bong

¹ Shembüpa Kahvangei laangha ngei kü nyüpeih, mehenangkü Shembüpai ngei jepeih; Büpai ngei tokvaihanghipüthü touei shahjangmei kohen, mongdang mangdaipüthü meihühen, Wüpküpei nyupüthü kü bümei baonghen, hatü khoklatei nyupüthü laihühen;

² Shembüpai phahjipü bong, hatü jenei Kahvang bhüh yemhen nyih baonghen; mahng theppüthü nyiushem meihühen,

³ Mongtok mongshang kü Zionlei nyupüthü kü depla nangjei nethe meipü ong athen, mahng theppü nangjei mongongpü mainga, mongmahdaipü laangha nangjei dupü-oupü owhiai shuohhen shompeih. Jomphong keyü Shembüpai laophülei müknyinshekhang huhen shingvaishi büpai sheipü daülangshemshepü longkhampüthü shei nyükhen.

⁴ Jomi aivang den mebü bentükpü, hatü den luangi lavüngtoiyei yakphongpü chingnyüthü neyei lingei leihen.

⁵ Yenpathüi ammei mithü hamhen, kung ammi ammei kah linghen, hatü nyalingngupai kah kü junghen.

⁶ Shejao amphong keyü Shembüpalei ngongpathü shei nyükhen, hatü jenei Kahvang chongphobüthü shei menhen. Ammi jatthülei mopi mohmeihen, hatü jomei nükhinyiami am changmeihen.

⁷ Am shelei longi veütükpü nangkü ammi moihiman shingnyi danghen; Am veü pongpü nangjei nedohnetenpü mongongü amphongei vaihen.

⁸ Mehenangkü Shembüpa ngeiyü shahhing kü bamnyeih; Ngeiyü gühpükaaipü hatü mang kü jiühitnyeih. Ngei hingshangi ngelei nanglakthü kü thintho shuohhen, hatü ngei nedohnetenpü vangpüshuwpü jomphong mü linghen.

⁹ Jatthüi jomei hühihathü, hatü shennyakthüi jomei lihilathü nyinghen. Jom eepü peüi jomü Shembüpai moihimanpü shennyakthü shei nyinghen.

¹⁰ Ngei Shembüpa kü longi mongmeinyeih, ngelei laanghai ngelei Kahvang kü mongongnyeih. Mehenangkü yiük yahbüi laophülei shangjing kü ngongpalei athen thenpü kei, hatü doidainyüi laophülei yüknyü yükpü kei, Shembüpai ngei kü yemleipü ow owhüpeih, hatü daülangshemshepü bhagthuh thuhphopeih.

¹¹ Mehenangkü kahdoki sheili nyem phaathüpü kei, hatü pemongi halei sheili kohhüpü keiha, Shembüpa Kahvangi daülangshemshepü hatü dupü-oupü jatthü peü eeshi kohhühen.