ISAIAH 60 - DAÜLANGPÜ LAIHING (BSI)

Zion Müknyinshekhanghen Nang

¹ Paotuh, Jerusalem, hatü vanghenyü keiha nyatuh, hatü Shembüpalei müknyinshekhang am kü khangnyüke.

² Veituh, kahdok kü shangmangi jümshi nyüke, hatü nanglakthü kü phumnyaki jümshi nyüke; Shejao Shembüpa am mü yaongnyüke, hatü büpalei müknyinshekhangi am kü khangnyüke.

³ Ammei vangngai touei jatthü peikahen, hatü ammei vangngai eeyei ongthü thaikahen.

⁴ Mük vamei am shinei veituh; jom peü thaitü am touei peikünyüke; Ammei yeshangthü tailu kahdok leipü peikünyüke, hatü ammei yiükhathü jomei lakei paümshi leikünyüke.

⁵ Ammi ha eetü mongonghen; ammei mong kü mongongpai mahen; Mehenangkü yungching homei mopnyümopha am touei leikahen, jatthülei mophimo am touei leikahen.

⁶ Midian hatü Ephah leipü utthü leikahen, Shebalei nyupü kemei leikahen. Jomi hon hatü ayingshü koei leikahen, hatü Shembüpalei menvih baonghen.

⁷ Kedar amei mithü am touei thaikahen, Nabaioth amei mi chehathüi am chongphohen; Hathü peü ngelei moidülei moila keiha yahhen, hatü ngelei Phopshem nyeinya müknyinshekhangshi linghen.

⁸ Phumtem keiha hatü athubathü jepei leipü keiha leiküpü jahasthüyü meheang?

⁹ Mehenangkü büpai am müknyinshekhanghüpü nangkü, Shembüpa, ammei Kahvang, daülangpü Israel Kahvangei men kü, ammei hapeüthü tailu kahdok leipü, hatü hon hi ngin jom mü kotü tailu kahdok Tarshish leipü jahasthü leikünyüke.

¹⁰ Kung ami ammei bhamthü lingphahen, hatü jomei ongthüi am chongphohen; Ngei mongshihpai am kü bheiteke, shejao ngei bampai am kü phahji hupeih.

¹¹ Jatthüi jomei mophimo kotü jomei ongthüi mütü peikahen. Ammei penyüshathü neküpi nyakhingai thüngei apshi nyuhen.

¹² Mepa jat nevaijü ongchingi am chongnephohenshang mahhen; hathü jatthüyü chemjalak kü mangtükhen.

¹³ Lebanon müknyinshekhang am touei peikahen, haleipü awkaongpü, juniper hatü cypress püthü yah-ei ngelei Phopshem nethe meishi linghen, hatü ngelei chingmei bah-ei meihen shingvaishi hapa koei leikahen.

¹⁴ Am kü shüveipüthülei hühihathü peiyei am kü dhüm shuoh-ei aümei khümhen, hatü am kü, “Shembüpalei Chingnyü, Zionü daülangpü Israel Kahvangei chingnyü” shei nyükphahen.

¹⁵ Üpaiyao am peih-ei nekamtei-i peüi am yaktük hatü jiühitteke, shejao ngei am den kü müknyinshekhangpü hatü denshem peü kü mongongmonglepü leihühen.

¹⁶ Ammi jatthülei amma yinghen: ongthülei nyühaüm kü choihen. Shejüang ammi ngeiyü am yemleipü Shembüpa, wong longpü Israel Kahvang shei nyinghen.

¹⁷ Melangnyiam nangjei ngei hon leikahen, nyiam nangjei ngin, Pü nangjei melangnyiam, yaong nangjei nyiam leikahen. Chingmeivangmeiyü am veibü, hatü daülangshemshepeyü ammei shembü vaishi ngei jehen.

¹⁸ Depülaopü nevaijü lomoh aühaü, benpülangpü jung ammei kahmük konmong kü nedanhen, shejao ami ammei bham kü Yemleipü hatü ammei penyüsha kü Menvih shei nyükhen.

¹⁹ Hajük kü nyihnüng am shingvaishi vanghenyü, nevaijü yanüng shing lennyü vangngai nenahen; Mehenangkü Shembüpayü nedohnetenpü ammei vangngai, hatü Kahvangü ammei müknyinshekhang vaikahen.

²⁰ Hajük kü ammei vanghenyü neshüdaihen, hatü ammei lennyü lenha neyimdaihen; Shembüpayü ammei nedohnetenpü vangngai vaihen, hatü am mongmangpü nyih dohdaihen.

²¹ Ammei nanglakthü peü daülangi leihen, hatü jomi denshing kahdok yahhen. Ngelei müknyinshekhang huhen shingvaishi amü ngei sheipü sheili; ngelei lakdou.

²² Peü mü maanpü phangi wong kohpü jat, hatü maanpü shemdepi jat longpü leihen. Ngeiyü Shembüpa; mechem hepak ngoihen, ngei lomi hapa dükhen.