ISAIAH 6 - DAÜLANGPÜ LAIHING (BSI)

Kahvangi Isaiah kü Kangpü

¹ Uzziah ongpa dipü bong, Shembüpa ong uoshing longi shaopü kü uoshi ee, hatü büpalei ashak maijung Phopshem maei yaüshi nyu.

² Büpa shak kü Seraphthü yang kukvok baong kohtü nyu: Yang nyi-i jomei dhe kü jüm, yang nyi-i jomei la kü jüm, hatü yang nyi-i piteke,

³ hatü jomphong hüki hük kü nyüktü e: “Daülangpü, daülangpü, daülangpü Jeiyong Kahvang; Kahdoknyü kemei büpalei müknyinshekhangi maei nyüke.”

⁴ Jomei ngeüi shaden kübü shemhathü hatü shakungthü jenteke, hatü Phopshemü awshiti maei nyuteke.

⁵ Ngei, “Onyükei!” shei lenteke. “Ngeiyü yahlak neshiü! Mehenangkü ngeiyü jubenyeijaang nedaüpü shennyak, hatü ngeiyü jubenyeijaang nedaüpü shennyakthü mü nyunyüpeih; shejao ngelei müki Ongpa, Jeiyong Shembüpa eeteke.”

⁶ Hahepak kü Seraphthü khong kübü hük moidü leipü awtao hük ajap kü japtü noei ngei touei piyei heihküteke.

⁷ Büpai hapa yah-ei ngelei ju kü hongtü, “Veituh, hapai nüngei ju kü hongteke; shaang nüngei mang lüdai, hatü nüngei mang tükteke” shei e.

⁸ Shembüpai, “Ngei üpa shomhen, hatü ngei shingvaishi üpa daihenang?” shei epü ngeü ngei dan, Hatü ngei eteke, “Ngei hammü nyüpeih; ngei shomtuh.”

⁹ Hanangkü büpai ngei kü daiyei nanglakthü kü hapa shahjang etuh shei e: “Amphongi düngei dannyüke, shejao nenyingnyu; düngei veinyüke, shejao ne-eenyu.

¹⁰ Hapa nanglakthülei mongdang yawtüktuh; dhaong aangtükhütuh hatü mük phüngtüktuh. Hei nevaijema jomi eehen, danhen, nyinghen, hatü ngei touei mong lepei leiyei meitükpü danghen khih.”

¹¹ Hahepak kü ngei, “Oh Shembüpa, nyih meshük lushi hapakei tuhhen?” shei phe. Büpai ngei kü, “Chingnyüthü kü, hatü shemthü kü nyuhen shennyak neshiüi, hatü kahdok chemjalak kü lavüngtoiyei manglei thahshi;

¹² Shembüpai jom peü tailuei shomei kahdok shingkong manglei thahshi;

¹³ Phaihan an kü hük hapa kahdokei nyujao, hapayü shao lavüngtoiyei leihen, shejao büpayü longkhampü agtükjao pütüng kahdokei aopükei nyuhen. Kahdokei pütüng aopeyü daülangpü li vaihen” shei eteke.