ISAIAH 58 - DAÜLANGPÜ LAIHING (BSI)

Hingshangpü Shüaeiyunglepü

¹ Nenmü nenyui wongmü lentuh! Ngelei nanglakthü kü jomi khüei yaongpü, hatü Jakob phang kü jomei mang baongeishuoh.

² Mechem shangao daülangshemshepü düknyüpü jat keiha, hatü jomei Kahvangei shahkungthü neyakphongnyüpü keiha, nyihjeih jomi ngei yemnyüke, hatü ngelei lemthü nyinghünyüke; Jomi ngei kü shahhing shahphenpü nang phenyüke, hatü jomi Kahvang yopailei peihünyüke.

³ “Shembüpai neveiyaki mehekei jen shüaeiyunglehen? Büpai nenyingyaki mehekei jen nük nehah-i nyuhen?” shei jomi enyüke. Veituh, am shüaeiyunglepü nyih ammi lümbenüng mon düknyüke, hatü ammei dou dükbüthü kü shüveinyüke.

⁴ Veituh, amphong shüaeiyunglepeyü, deyeilaoei, üpteilenteiyei, hüki hük kü lak shihteiyeidohnyüke. Am shinnyihpü keiha shüaeiyunglepai ammi phoppü shang Kahvangi nedanlangphapih.

⁵ Shennyak hük mong lephenü henüng keipü nyih ngei jenyu je? Ammi ammei shangjing bhuknyübong kei laamei shatü dhoila ashak ümtü depla kü lemtü khümnyüke. Ammi hapa kü Shembüpa touei yah-aokhenüng shüaeiyunglepü nyih shei nyükhen je?

⁶ Ngei nabenüng shüaeiyunglepeyü hapa hih: Shahhing ne-epü nyiamvü laihen, hatü mih kü shapü vü shehen, Ponghahpüthü bümei leihühen, hatü lungsha kemei laitükhen.

⁷ Aeipüthü kü ammei hahying hanhen, shem neshiüpü taopathü kü loihen shem shuohhen; Bümkong eejü ashakviha shuohhen, hatü laophülei shem am kü sheühhen, hathü hih.

⁸ Shejüang ammei vangngai vanghela aongpükei nyahen, hatü am meihen lomi vamkahen; Ammei Yemleibü am she shongkahen, hatü Shembüpalei müknyinshekhang ammei ngaümpheilei mükahen.

⁹ Hahepak kü ammi nyükhen, hatü Shembüpai janghen; Ammi sheühshih shei lenhen, büpai, “Ngei hamü nyüpeih” shei ephahen. Ammi am shüveiteipü, ammi mih kü lakjaangi jüpü, hatü nemeipü peü dohdaijema,

¹⁰ Aeipülepüthü kü ammei hahying shuoh-ei, ponghahpüthü napü hüshemhüjema, ammei vangngai vangnyak kü nyaei vamhen, hatü ammei vangnyakü nyihnüng heshotapa hepak kei leidaihen.

¹¹ Shembüpai am düngei mühen, hatü nyahpü shaampü kahdokeiyao ngei am napü shuohhen. Amü yung changshi shuohpü pemong, hatü mechemao nejeppü yunglok kei nyuhen.

¹² Ammei nanglakthüi aivang den mü yaktükpü chingnyüthü linghen, hatü den longi lüdaipü chongnyiam shing lingei leihen; Am keyü mangdaipü bham lingbüthü, chingyangshong nyushing meipü lingei leibüthü shei nyükhen.

¹³ Ammi laophülei la-i Sabbath nyeü nemang, hatü ngelei daülangpü nyih kü am nadang kü nelongtei-i, ammi mongpü lem kü nedai-i nevaijü ammi mongpükei nedüki shahten ne-e-i nyujema,

¹⁴ Shembüpa kü ammi mongongpü danghen, hatü kahdoknyü peü shak kü am kü dhüm shuohhen, hatü ambü Jakob kü ngei shuohpü mükjüp monghamshi noteihen shei Shembüpalei ju kübü ha eteke.