ISAIAH 57 - DAÜLANGPÜ LAIHING (BSI)

Israel ami Lajeithü kü khümpü

¹ Daülangpüthü mahjü üpaiyao mong kü nyah-ei nedeihnyu; hinglempüthü dijü üpaiyao ha nenyingnyu. Mehenangkü daülangpüthüyü shanghah vongshüh kübü yanglangnyüke,

² Hatü daülangi kampüthüi chingmei kü nyuei nyiushemmei kü dinyüpeih.

³ Peikei, amphong thibülanyülei hapeüthü, mükbongjuyung hatü büm yupüthülei lihilathü.

⁴ Üam kü thaüvaünya? Üam kü loh-ei ju katü shahlong enya? Amü mangei hapeüthü, hatü lupülempüthülei li nevaipü je?

⁵ Amü püdhüm vungdhüm ieyeilei mükbongjuyung dükei lihila kahvangthü kü khümnyüke; Ammi kahjithü hatü yaongsha püsha peülei laophülei hapeüthü jüei moila shuohnyüke.

⁶ Kahji leipü nyülükpü yaongthü yah-ei kahvang vaishi khümnyüke, hathüyü ammei kahvangthü; Hathü kü ammi yiü moila langei, hahying moila shuohnyüke. Hathü kü ngei mongmeihen je?

⁷ Shaopü kahshang hatü shangchingthü kü ammi shinshing lingnyüke, hatü halei paümei thaümei moila shuohhen aongnyüke.

⁸ Shaden mongei hatü shaden shemhathü kü ammi ammei lajeithü tuhnyüke. Ngei tuhphongnyüke, ammi ashak nyiuktüktü laophülei chühimai mü lüngei aongei shinyüke; Amphongi jom mü shihen nangkü lop shuohnyüke, hatü ammi jomei bümkong kü veinyüke.

⁹ Amü melivungla nyiotü olive mainga notü Molekh kahvang kü khümnüng dainyüke. Amphongü kahvang yemei tailu kahdok ngoishi, hatü mahngchong thahshi laophülei shennyak shomnyüke.

¹⁰ Amphongi lebü kahvangthü yemei longteipai nyiudaijao, “Hajük khih, danghen mong nelemang” shei ne-enyu. Ammi wongja ngaitü ngaitü daipü nangkü nenyiunyu.

¹¹ Üam kü nyemei hanei ammi ngei kü shahshem etü ngei betüknya? Ngei hepak luangi nenmü nyudaipü nangkü ngei kü dhüm neshuoh-i dohdaipüje?

¹² Am daülangshemshepü hatü ammei douthü ngei shakei vamhühen, hatü hapai am kü nanglei neshuohhen.

¹³ Mechem ammi sheühpü naei nyükhen, ammei lajeithüi am nyemyangpha! Vanglüki hathü shetei lüdaihen, hatü hapai am kü nanglei neshuohhen. Shejao üami ngei kü loihen, kahdok mükjüp danghen, hatü ngeilei phopshemei khümhen.

Kahvangi Sheühhen hatü Meihühen Lahpü

¹⁴ “Lingtuh, lingtuh, lemnyüshong temtuh! Ngelei nanglakthülei lem kü bangpü peü nüngtüktuh” shei ehen.

¹⁵ Peü mü shopü hatü daülangpü Kahvang, üpa denden kü nyu, hatü büpalei men daülangpü, büpai hapakei enyüke: “Ngeiyü shaopü hatü daülangpü shingei nyuhen, shejao maanpü leipü shennyak jatonghühen, hatü mong leppüthü ja linghühen shingvaishi üpai mongmangei mong lepnya, ngeiyao büpa mü nyuhen.

¹⁶ Ngei düngei nethaüvaühen nevaijü ngei düngei mongshih-ei nenyuhen, Hei nevaijema ngei lingpü hangkulei laangha mahdaihen, hatü hangkuli ngü kemdaihen.

¹⁷ Jomei hahnempü mang kü ngei mongshihpeih, ngei jom hanghihü, hatü mongshih-ei ngelei dhe jodaipeih, shejao jomi jomei lemthü kü mon nyokei leidainyüke.

¹⁸ Ngei jomei lemthü eetepih, shejao jom meihühen; Ngei jom mühen hatü mahng theppüthü kü nyiumei shuohhen.

¹⁹ Yoshi hatü tailuei nyupüthü kü chingmeivangmei shuohhen, hatü ngei jom meihühen shei Shembüpai enyüke.

²⁰ Shejao nemeipüthüyü nenmü nenyupü, shing nelingpü yungmoki nyüphihang, hatü nyaühut küei küei deipükei nyüke.

²¹ Nemeipüthü shingvaishi chingmei neshiü” shei ngelei Kahvangi enyüke.